ޕީއެސްޖީން ޗެޓިއޮރޮކްސް ބަލިކޮށްފި

ފްރާންސް ކަޕްގައި ޗެޓިއޮރޮކްސްއާ ދެކޮޅަށް ކުޅުނު މެޗުން ޕެރިސް ސެއިންޓް ޖާމަން (ޕީއެސްޖީ) މޮޅުވެއްޖެއެވެ.

ހުކުރު ދުވަހުގެ ރޭ ކުޅުނު މެޗުން ޕީއެސްޖީ މޮޅުވީ 3-1ންނެވެ. މެޗުގައި ފުރަތަމަ ލަނޑު ޖަހައި ލީޑު ނެގީވެސް ޕީއެސްޖީންނެވެ. މެޗުގެ 13 ވަނަ މިނެޓުގައި ޕީއެސްޖީއަށް ލީޑު ނަގައިދިނީ ހޫގޯ އެކިޓީކޭއެވެ. ޗެޓިއޮރޮކްސްގެ އޭރިޔާ ތެރޭގައި ހުރެ އެކިޓީކޭ ފޮނުވާލި ބޯޅަ ގޯލަށް ވަނީ ގޯލް ކީޕަރު ޕައުލް ޑެލެކްރޮއިސްގެ އަތުގައި ޖެހި، ގޯލުގެ އަރިމަތީ ދަނޑީގައި ޖެހިފައެވެ. ފުރަތަމަ ހާފު ނިމުމުގެ ކުރިން ޗެޓިއޮރޮކްސްއިން ވަނީ ނަތީޖާ ހަމަހަމަކޮށްފައެވެ. މެޗުގެ 37 ވަނަ މިނެޓުގައި އެ ޓީމަށް ނަތީޖާ ހަމަހަމަކޮށްދިނީ ނަޓަނައެލް އެންޓޮލާއެވެ.

މެޗުން ޕީއެސްޖީ މޮޅުވީ ދެވަނަ ހާފުގައި ޖެހި ދެ ލަނޑުންނެވެ. ދެވަނަ ހާފުގެ 78 ވަނަ މިނެޓުގައި ޕީއެސްޖީގެ ތިންވަނަ ލަނޑު ޖެހީ ކާލޮސް ސޮލާއެވެ. އެއީ ޕީއެސްޖީގެ ވިޓީނިއާ ހުރަސްކޮށްދިން ބޯޅައެއް އެކިޓީކޭ ފޮނުވާލި ވަގުތު، ޗެޓިއޮރޮކްސްގެ ކީޕަރުގެ ގައިގައި ޖެހި, ރީބައުންސަށް ނުކުތް ބޯޅަ ގޯލަށް ފޮނުވާލައިގެން ސޮލާ ކާމިޔާބުކޮށްދިން ލަނޑެކެވެ. ޕީއެސްޖީގެ ތިން ވަނަ ލަނޑު މެޗުގެ ފުރިހަމަ ވަގުތު ހަމަވެ، އިތުރަށް ދެއްކި މިނެޓުގައި ޖެހީ ހުއާނ ބާނަޓްއެވެ. އެއީ ފަބިއާ ރުއިޒް ދިން ބޯޅައެއް ގޯލުގެ ތިރީ ކަނަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ.

ޕީއެސްޖީގެ މެޗެއް ދެން އޮންނާނީ މި މަހުގެ 12 ވަނަ ދުވަހު އެވެ. ފްރާންސް ލީގުގައި އެ ޓީމު ނިކުންނާނީ އެންޖާސްއާ ދެކޮޅަށެވެ.