ރައީސް ސާލިހުގެ ކެމްޕެއިން ދަތުރުފުޅުތައް ފައްޓަވައިފި
ކެމްޕެއިން ދަތުރުފުޅުގައި ފުރަތަމަ ވަޑައިގެންނެވީ މާކުރަތަށް
ރައީސުލްޖުމްހޫރިއްޔާ މާކުރަތަށް ވަޑައިގެންނެވުން
ކުރިއަށް އޮތް އެމްޑީޕީގެ ރިޔާސީ ޕްރައިމަރީ ކެމްޕެއިންގެ ދަތުރުފުޅުތައް ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު ފައްޓަވައިފިއެވެ.
އެމްޑީޕީގެ ޕްރައިމަރީ ބޭއްވުމަށް ހަމަޖެހިފައިވަނީ މިމަހުގެ 28 ގައެވެ. ޕްރައިމަރީގެ ކެމްޕެއިން ދަތުރުފުޅުތައް ރައީސް ފެއްޓެވީ މާޅޮސްމަޑުލު އުތުރުބުރީ އަލިފުށްޓަށް ކުރެއްވި ދެދުވަހުގެ ރަސްމީ ދަތުރުފުޅު ނިންމަވާލެއްވުމަށްފަހުއެވެ.
ކެމްޕެއިން ދަތުރުފުޅުތަަކުގެ ފުރަތަމަ މަންޒިލެއްގެ ގޮތުން އެމަނިކުފާނު ވަނީ ހުކުރު ދުވަހުގެ ހެނދުނު ރ. މާކުރަަތަށް ވަޑައިގެންފައެވެ. މާކުރަތު ބަނދަރުމަތިން އެމަނިކުފާނަށް ވަނީ ހޫނު މަރުހަބާއެއް ދަންނަވާފައެވެ.
ރައީސް ވަނީ މާކުރަތުގެ އެމްޑީޕީ މެންބަރުންނާ ބައްދަލުކުރައްވާފައެވެ. އެމްޑީޕީން ބުނީ އެ ޕާޓީގެ މާކުރަތު މެންބަރުން ތިބީ އެ ޕާޓީ ކުރިއަށް ގޮސް ރިޔާސީ އިންތިހާބު ކާމިޔާބު ކުރަން ކަމަށެވެ.
ރައީސުލްޖުމްހޫރިއްޔާ އިބްރާހީމް މުހައްމަދު ސާލިހުގެ ކެމްޕެއިން ދަތުރުފުޅުގެ ތެރެއިން ރ. އިންނަމާދޫ އަދި ރ. މީދޫއަށްވެސް ވަޑައިގަންނަވާގޮތަށް ވަނީ ހަމަޖެހިފައެވެ. މި ރަށްރަށަށް ވަޑައިގެން އެރަށްރަށުގެ އެމްޑީޕީ މެންބަރުންނާ ބައްދަލުކުރައްވާނެއެވެ. އަދި މިރޭ މީދޫގައި ކެމްޕެއިން ޖަލްސާ ބާއްވަން ވަނީ ހަމަޖެހިފައެވެ.
