މާލޭގައި ފެންހޮޅި އެޅުމާއި މަގުކޮނުމުގެ އުސޫލު އާންމުކޮށްފި
4 ޖެނުއަރީ 2023 | ބުދަ 07:32އުސޫލުގައި ބުނެފައިވާ ގޮތުގައި މާލޭގެ ބިމުން ފެން ބޭރު ކުރުމަށް ހޮޅި އެޅޭނީ ޔުޓިލިޓީ އޮތޯރިޓީގެ ހުއްދަ ލިބިގެން ކައުންސިލަށް ހުށަހަޅައިގެން
އަމީނީ މަގު
މާލޭގެ ބިމުން ފެން ނަގައިގެން ފެން ބޭރު ކުރުމަށް މަގުތަކުގައި ހޮޅި އެޅުމާއި މަގުތައް ކޮނުމާ ބެހޭ އުސޫލުތައް މާލޭ ސިޓީ ކައުންސިލުން އާންމުކޮށްފިއެވެ.
ހޯމަ ދުވަހު އާއްމު ކުރި އެ އުސޫލުގައި ބުނެފައިވާ ގޮތުގައި މާލޭގެ ބިމުން ފެން ބޭރު ކުރުމަށް ހޮޅި އެޅޭނީ ޔުޓިލިޓީ އޮތޯރިޓީގެ ހުއްދަ ލިބިގެން ކައުންސިލަށް ހުށަހަޅައިގެންނެވެ. އަދި، މާލޭގެ މަގުތައް ކޮނުމުގެ އުސޫލުގެ ދަށުން ޖަންކްޝަންގެ މަތި ނަގައިގެން ކުރަންޖެހޭ މަސައްކަތް ކުރުމަށް ވެސް ހުއްދަ ނަގަން ޖެހޭނެ ކަމަށް ވަނީ ބުނެފައެވެ.
މާލެ ސިޓީ ކައުންސިލުން ނެރެފައިވާ ބިމުން ފެންނަގައި ބޭރުކުރުމުގެ ގަވާއިދުގެ ދަށުން ހުއްދަ ނަގާފައިވާ ފަރާތްތަކުން, ސިޓީއާއެކު ގަވާއިދުގައި ބަޔާންކޮށްފައިވާ ލިޔެކިޔުންތައް ހުށަހެޅުމުން، ހުއްދަ ދޭނީ ސުޕަވައިޒަރުން ހޮޅިލައިންގެ ރޫޓު ޗެކްކުރުމަށްފަހުއެވެ. އަދި، މަސައްކަތް ކުރަން ޖެހެނީ މަގު ކޮނެގެން ނަމަ، ކޮންނަން ބޭނުންވާ ސަރަހައްދުގެ ދިގުމިނާއި، ފުޅާމިން އެނގޭނެހެން ޗާޓެއް ހުށަހަޅަން ޖެހޭނެ ކަމަށާއި ޖަންކްޝަން މަތި ނަގައިގެން ކުރަންޖެހޭ މަސައްކަތެއްނަމަ ޖަންކްޝަންގެ އަދަދާއި ހުރިތަން ފާހަގަކޮށް, އެ ސަރަހައްދެއްގެ ޗާޓެއް ހުށަހަޅަން ޖެހޭނެ ކަމަށް ވެސް ވަނީ ބަޔާންކޮށްފައެވެ.
އުސޫލުގައި ބަޔާންކޮށްފައިވާ ގޮތުގައި އިމާރާތް ކުރުމަށްޓަކައި ގެއެއްގެ އިންފާރުން އެތެރޭގައި ކުރެވޭ މަސައްކަތްތަކުގެ ތެރެއިން ކޮނެގެން ކުރަންޖެހޭ މަސައްކަތެއްގެ ސަބަބުން އެ އިމާރާތަކާ ނުވަތަ މަސައްކަތް ކުރަމުންދާ ސަރަހައްދާ އިންވެގެން އޮންނަ މަގު، ދުވާރު ނުވަތަ ކާނަކަށް ގެއްލުން ލިބިއްޖެކަން ސާބިތުވެއްޖެ ނަމަ، 10،000 ރުފިޔާއާއި 100،000 ރުފިޔާއާ ދެމެދުގެ އަދަދަކުން ޖޫރިމަނާ ކުރެވޭނެއެވެ.
މީގެއިތުރުން، ގަވާއިދާ ޚިލާފަށް ނުވަތަ ކައުންސިލުގެ ހުއްދައެއްނެތި އެފަދަ މަސައްކަތެއް ކުރާނަމަ ޖޫރިމަނާ ކުރާނެ ކަމަށް ވެސް ވަނީ ބަޔާންކޮށްފައެވެ.
މާލޭގެ ބިމުން ފެން ބޭރުކުރުމަށް ހޮޅި އެޅުމާއި މަގު ކޮނުމުގެ އުސޫލު ފާސްކުރީ ސިޓީ ކައުންސިލުން މިދިޔަ ޑިސެމްބަރު މަހު ބޭއްވި ޖަލްސާގައެވެ.
