ރާއްޖެ އަށް ޑިމޮކްރަސީ ގެނައުމަށް ކުރި މަސައްކަތުގެ ތެރޭގައި އެންމެ ބޮޑު އަނިޔާއެއް ލިބިވަޑައިގެންނެވި އެއް ބޭފުޅަކީ ކުރީގެ ރައީސް މުހައްމަދު ނަޝީދެވެ. އެތައް ފަހަރެއްގެ މަތިން ހައްޔަރުކުރެވި ހުރަގޭގައި ބަންދުކުރެވި އެތައް އަނިޔާތަކެއް ދީފައި ވެއެވެ. ދިގު 30 އަހަރުގެ ވެރިކަމުގައި ނުހައްގުން ލިބުނު އަނިޔާތަކަށްޓަކައި އޭރުގެ ރައީސް މައުމޫނު އަބްދުލްގައްޔޫމަށް ދުވަހަކު މައާފްނުކުރައްވާނެ ކަމަށް ރައީސް ނަޝީދުގެ ބައެއް ސަޕޯޓަރުން އަދި ވެސް ބުނެއެވެ. އަދި އެމަނިކުފާނުގެ ކިބައިން ބަދަލު ހިއްޕެވުމަށް ރައީސް ނަޝީދުގެ އަރިސް ބައެއް ބޭފުޅުން ގެންދެވީ ހިތްވަރު ދެއްވަވަމުންނެވެ. އެގޮތުން 2008 ގައި ވެރިކަމަށް ވަޑައިގެންނެވުމާ އެކު އަރިސް ބައެއް ބޭފުޅުން ވަނީ ރައީސް މައުމޫނު ހައްޔަރުކޮށް ޝަރީއަތް ހިންގުމަށް ހިއްވަރު ދެއްވާފައެވެ. ހަމައެހެންމެ އެމްޑީޕީގެ ބައެއް ހާޑްކޯ އެކްޓިވިސްޓުންނާއި އާންމުންގެ ތެރެއިން ވެސް ގިނަ ބަޔަކު އެކަމަށް އުންމީދުކުރިއެވެ. ނަމަވެސް ކަންވީ އެހެނެއް ނޫނެވެ.

ތިރީސް އަހަރުގެ ވެރިކަމުގައި ސިއްކަޖެއްސެވުމަށް ފަހު ރައީސް ކަމަށް ނަޝީދު ވަޑައިގެން ފުރަތަމަ ވެސް ވިދާޅުވީ ކާމިޔާބީގައި ހިތްތިކުރުމަށެވެ. އަދި ނާކާމިޔާބީގައި ހިތްވަރު ކުރުމަށް ގޮވާލެއްވީ އެކަންޏެއް ނޫނެވެ. އަމަލީ ގޮތުން އެކަން ދެއްކެވިއެވެ. ހުވާކުރުމުގެ ރަސްމިއްޔާތުގަ އާއި އޭގެ ފަހުން ވެސް ފެނިގެންދިޔައީ ދިގު މުއްދަތެއް ވަންދެން ގައުމަށް ޚިދުމަތްކޮށްދެއްވި ރައީސް މައުމޫނަށް ދޭންޖެހޭ ޝަރަފާއި އިއްޒަތް ދެއްވި ތަނެވެ. އެމަނިކުފާނުގެ ދައުރުގައި ހިންގާފައިވާ ކޮރަޕްޝަނުގެ މައްސަލަތައް ތަހްގީގުކުރުމަށް ރިޔާސީ ކޮމިޝަނެއް ހެއްދެވި ނަމަވެސް ޝަރީއަތެއް ހިންގަވާފައެއް ނުވެއެވެ.

ބަދަލު ހިއްޕަވަން ބޭނުންފުޅު ނަމަ ރައީސް ނަޝީދަށް ވެސް ފުރުސަތުތަކެއް ލިބިވަޑައިގެންނެވި އެވެ. ނަމަވެސް އޭގެ ބަދަލުގައި އެމަނިކުފާނުގެ ކިބައިން ފެނުނީ ހިތްތިރިކަމާއި މައާފްކުރުމުގެ ރިވެތި ސިފައެވެ.

ރައީސް ނަޝީދުގެ ވެރިކަން ބަދަލުވެގެން ދިޔައީ ވެސް ވަރަށް އަނިޔާވެރި ގޮތަކަށެވެ. އެއީ ބަޣާވާތެއް ނޫން ކަމަށް ދުނިޔެ ކުރިމަތީގައި ސިއްކަ ޖެހިއެއް ކަމަކު ރައްޔިތުންގެ ތެރެއިން ގިނަ ބަޔަކު ގަބޫލުކުރާ ގޮތުގައި އެއީ ސިފައިންނާއި ފުލުހުން ބޭނުންކޮށްގެން ހިންގި ބަޣާވާތެކެވެ. އޭގެ ފަހުން ވެސް ފުލުފުލުގައި އެމަނިކިފާނަށް ބޮޑެތި އަނިޔާތަކެއް ސަރުކާރުން ދިޔައީ ދެމުންނެވެ. އެންމެ ފަހުން ޓެރަރިޒަމްގެ ދައުވާކޮށް 13 އަހަރަށް ހުކުމްކޮށް ޖަލުގެ ތޭރިތަކުގެ ތެރޭގައި ބަންދު ވެސް ކުރިއެވެ. އަދި ފަހުން މަޖުބޫރީ ހާލަތުގައި ގައުމު ދޫކުރައްވައި ވަޑައިގެންނެވުމަކީ ވެސް މި ސަރުކާރުން ދިން އަނިޔާއެކެވެ.

މިފަދަ އެތައް އަނިޔާތަކެއް ލިބިވަޑައިގެންނެވި ނަމަވެސް ރައީސް ނަޝީދުގެ ފަރާތުން ފެންނަނީ ހިތްތިރިކަމެވެ. ފެންނަނީ އެމަނިކުފާނާ މެދު ކޮންމެ ފަދަ ގޮތަކަށް ކަންތައް ކުރެއްވި ބޭފުޅެއް ނަމަވެސް ހަމަޔާއި އިންސާފަށް މަސައްކަތްކުރައްވާ ނަމަ އެ ބޭފުޅަކާ ކޮނޑާކޮނޑު ޖައްސަވައި އެކުގައި ވަޑައިގަންނަވާ މަންޒަރެވެ.

ބަދަލުހިއްޕަވަން ބޭނުންފުޅު ނަމަ ލިސްޓް ވަރަށް ދިގެވެ. ރައީސް މައުމޫނާއި ސަރުކަރުގެ އިސްކޮށް ތިއްބެވި ބޭފުޅުންނާއި ވެރިކަން ވައްޓާލުމުގައި އިސްކޮށް ތިއްބެވި ބޭފުޅުން ވެސް މިއަދު ފެންނަނީ އެމަނިކުފާނުގެ ވިސްނުމަށް ތަބާވެ ތިބި މަންޒަރެވެ. އޭގެ ބަދަލުގައި އެ ބޭފުޅުންނަށް ހިތާމަވެރި ގޮތެއް ދިމާވެއްޖެ ނަމަ އެކަމާވެސް އެންމެ ފުރަތަމަ އަޑުއުފުއްލަވާ ބޭފުޅުންގެ ތެރޭގައި އެމަނިކުފާނު ހިމެނެއެވެ.

ނަމަވެސް ބައެއް މީހުން ގަބޫލުކުރާ ގަބޫލުކުރުމެއް އެބަ އޮތެވެ. އަދި ބައެއް މީހުން ޖެއްސުމަށް ނަމަވެސް ބުނެ އުޅޭ ވާހަކައެއް އެބަ އޮތެވެ. އެގޮތުން ރައީސް ނަޝީދަށް އިހާނެތިކޮށް ކަންތައްކުރެއްވި ބޭފުޅުންގެ ކިބައިން މިހާރު ވެރިކަމުގައި ހުންނެވި ރައީސް ޔާމީން ބަދަލުހިއްޕަވާ ވާހަކައެވެ.

ރައީސް ނަޝީދުގެ ވެރިކަން ބަދަލުކުރުމަށް އަޑު އުފުއްލެވި ބޭފުޅުންނަށް މިއަދު ވަނީ އެކަމުގެ ހިތި ރަހަ ފެނިފައެވެ. އެގޮތުން މި ސަރުކާރުގެ ޑިފެންސް މިނިސްޓަރު ކާނަލް ނާޒިމަކީ ރައީސް ނަޝީދުގެ ސަރުކާރު ބަދަލުވި ދުވަހު ޖުމްހޫރީ މައިދާނުގައި އެމަނިކުފާނަށް ފަހުގެ އިންޒާރު ދެއްވި އެއް ބޭފުޅާއެވެ. މިއަދު އޮތީ ދޮގު ތުހުމަތުތަކެއްގެ ސަބަބުން ދިގު ޖަލު ހުކުމެއްގައެވެ. ނާޒިމާއެކު އެ ދުވަހު ހުންނެވި އަދި ފަހުން ޕޮލިސް ކޮމިޝަނަރަކަށްވި އަދި މިހާރު ކިނބިދޫ ދާއިރާގެ މެންބަރު އަބްދުﷲ ރިޔާޒްގެ މައްޗަށް ވެސް ދައުވާތައް އުފުލި ޝަރީއަތްތައް ކުރިއަށްދާ އިރު އިރުއިރުކޮޅާ ފުލުހުންގެ އިދާރާ އަށް ހާޒިރުވާންޖެހެއެވެ. އެމްޑީޕީގެ ވެރިކަމާ ދެކޮޅަށް މަސައްކަތްކުރެއްވި އަދާލަތު ޕާޓީގެ ރައީސް އިމްރާން އަބްދުﷲ ވެސް ހުންނެވީ ޖަލު ހުކުމެއްގައެވެ. ޖުމްހޫރީ ޕާޓީގެ ލީޑަރަށް ވެސް އެތައް ފިއްތުންތަކެއް ވަނީ ކުރިމަތިކުރުވާފައެވެ.

ކުރީގެ ރައީސް މައުމޫނަށް ވެސް އޮތީ މި ދަތުރެވެ. އެމަނިކުފާނުގެ ވެރިކަމުގައި ހިންގާފައިވާ ކަމަށް ބުނާ ކޮރަޕްޝަންގެ ތުހުމަތުތަކާ ގުޅިގެން ތަހްގީގު ހިންގައި އޭސީސީން މިހާރު އެ ވަނީ ބަޔާން ނަގަން ނިންމައި ސިޓީ ފޮނުވާފައެވެ. ގާނޫނުގައި ވެސް ބުނާ މުއްދަތު ފަހަނަ އަޅައި ދިޔަ ފަހުން އެ މައްސަލަ ފެންމަތިކުރުމުގެ މައިގަނޑު ބޭނުމަކީ ރައީސް މައުމޫނު ނިކަމެތިކޮށްލުމެވެ. އޭގެ އިތުރުން އެމަނިކުފާނުގެ ދަރިކަލުން ފާރިސް މައުމޫނަށް ވެސް ހަމަ އެހާލު ވަނީ ޖައްސާފައެވެ.

މިހެން ގޮސް މި ލިސްޓް ވަރަށް ދިގެވެ. އިދިކޮޅު ފަރާތްތަކުން އޭރު ބުނަމުން ދިޔަ ބަޣާވާތުގައި ބައިވެރިވި ގިނަ ބޮޑުންނަށް މިއަދު ވަނީ ވަރަށް ދަތި ހާލު ޖައްސާފައެވެ. އެ ހުރިހާ ކަމެއް ވެގެން މިދިޔައީ ރައީސް އަބްދުﷲ ޔާމީންގެ ވެރިކަމުގައެވެ. އެހެންކަމުން ދުރުގައި ކުޅިބަލަން ތިބޭ ބައެއް މީހުން ދެކޭ ގޮތުގައި ރައީސް ނަޝީދަށްޓަކައި އެ ފަރާތްތަކުގެ ކިބައިން ބަދަލު ހިއްޕަވާ ބޭފުޅަކީ ރައީސް ޔާމީނެވެ.