ޔޫރަޕުގެ ކުލަބުތަކާއި، އޮސްޓްރޭލިޔާ، ބްރެޒިލް އަދި އަމިއްލަ ގައުމުކަމަށްވާ ޕޯޗުގަލްގެ ކުލަބުތަކުގެ ހުށަހެޅުން ލިބުނުކަމަށް ކްރިސްޓިއާނޯ ރޮނާލްޑޯ ބުނެފިއެވެ.

ރޮނާލްޑޯ މިހެން ބުނީ ސައޫދީ އަރަބިއްޔާގެ އައްނަސްރުގެ ކުޅުންތެރިޔެއްގެ ގޮތުގައި ރަސްމީކޮށް އޭނާ ދައްކާލުމުގެ ކުރިން ޕްރެސްގައި ވާހަކަ ދައްކަމުންނެވެ. ރޮނާލްޑޯއާއެކު އެ ޕްރެސްގައި އައްނަސްރުގެ ރައީސްގެ އިތުރުން ކޯޗުވެސް ވަނީ ބައިވެރިވެފައެވެ. އެ ޕްރެސްގައި ރޮނާލްޑޯ ބުނީ، އޭނާއަށް ގިނަ ހުށަހެޅުންތަކެއް ލިބުނުކަމަށެވެ. އެގޮތުން ޔޫރަޕުގެ ކުލަބުތަކުގެ ހުށަހެޅުން ލިބުނުކަމަށްވެސް ބުންޏެވެ. ނަމަވެސް އޭނާ ހަމައެކަނި އަންނަން ބޭނުންވީ އައްނަސްރަށް ކަމަށާއި، އެ ކުލަބާ ގުޅުނީ އެހެންވެ ކަމަށް ރޮނާލްޑޯ ބުންޏެވެ.

މީގެ އިތުރުން ރޮނާލްޑޯ ބުނީ އޭނާ ސައޫދީގެ ކުލަބަކާ ގުޅުނީ އެކި ގޮތްގޮތުން ވިސްނާފައި ކަމަށެވެ. ރޮނާލްޑޯ ބުނީ އޭނާ ބޭނުންވަނީ މޮޅު ކުޅުމެއް ދައްކައި، ރެކޯޑުތަކެއް ހެދުމުގެ އިތުރުން ސައޫދީގެ ފުޓުބޯޅަ ކުރިއެރުވުމަށް އެހީތެރިވެ ދިނުމަށް ކަމަށެވެ. ރޮނާލްޑޯ ބުނީ ސައޫދީގައި ފުޓުބޯޅަ ކުރިއަރާފައިވާ ކަަމަށާއި، ދާދި ފަހުން ނިމުނު ވޯލްޑް ކަޕްގައިވެސް ސައޫދީން މޮޅު ކުޅުމެއް ދެެއްކިކަމަށެވެ. އެގޮތުން މުބާރާތުގެ ޗެމްޕިއަންކަން ހޯދި އާޖެންޓީނާ ބަލިކުރެވުނު ހަމައެކަނި ޓީމަކީ ސައޫދީކަމަށް ރޮނާލްޑޯ ވަނީ ބުނެފައެވެ.

ރޮނާލްޑޯ އައްނަސްރަށް ސޮއިކުރީ ދެ އަހަރުގެ އެއްބަސްވުމެއްގަ އެވެ. އޭނާގެ އެއްބަސްވުމުގެ އަގު 213 މިލިއަން ޑޮރަލަށް އަރާކަމަށް ރިޕޯޓުތައް ބުނެއެވެ. 37 އަހަރުގައި ރޮނާލްޑޯ ސައުދީގެ ކްލަބް އައްނަސްރަށް ބަދަލުވީ މިސީޒަންގެ ނިޔަލަށް މެންޗެސްޓަރ ޔުނައިޓެޑާއެކު އޮތް އެއްބަސްވުން ނިމުމަކަށް ގެނެސްފައެވެ. ދެފަރާތުން ވާހަކަދައްކައި އެއްބަސްވުން ނިމުމަކަށް ގެނައީ ޓީވީ ޝޯވއެއްގައި ޔުނައިޓެޑާ އަދި އެކްލަބްގެ ކޯޗާމެދު ދެއްކި ވާހަކަތަކާ ގުޅިގެންނެވެ. ރޮނާލްޑޯ އެވާހަކަތައް ދެއްކީ ކްލަބް ބަދަލުކުރަން ބޭނުންވެ ހުރެއެވެ.

ރޮނާލްޑޯއަކީ ސައޫދީ ލީގުގައި ކުޅޭނެ އެންމެ ޓޮޕް އެތުލީޓެވެ. އައްނަސްރުން ދެކެނީ ރޮނާލްޑޯ އެކްލަބަށް ސޮއިކުރުމަކީ ފުޓްބޯޅަ ތާރީޚު ބަދަލުކޮށްލުން ކަމަށެވެ. އަދި އެއީ އެކުލަބާއި, އެގައުމާއި, އެގައުމުގެ އަންނަން އޮތް ޖީލުތަކަށްވެސް ނަމޫނާއެއްކަމަށެވެ.