އެއް ކެންޑިޑޭޓް އަށް ތާއީދުކުރާ މެމްބަރުން ޕާޓީން ވަކިކުރިކަމަކަށް ގަބޫލެއް ނުކުރަން: އެމްޑީޕީ
2 ޖެނުއަރީ 2023 | ހޯމަ 13:36ހާމިދު އަބްދުލްޣަފޫރަކީ އަމިއްލަފުޅަށް ޕާޓީން ވަކިވެވަޑައިގަންނަވާފައިވާ ބޭފުޅެއް
ރިޔާސީ ޕްރައިމަރީގެ އިންތިޚާބު ކޮމިޓީގެ ނޫސްވެރިންގެ ބައްދަލުވުމުގެ ތެރެއިން
ރައީސް މުހައްމަދު ނަޝީދަށް ތާއީދުކުރާ މެމްބަރުން އެމްޑީޕީން ވަކިކުރިކަމަށް ގަބޫލުނުކުރާކަމަށް އިންތިޚާބާ ބެހޭ ކޮމިޓީން ބުނެފިއެވެ.
މިމަހުގެ 28 ވަނަ ދުވަހު ބޭއްވުމަށް ހަމަޖެހިފައިވާ އެމްޑީޕީ ރިޔާސީ ޕްރައިމަރީގެ ކެމްޕެއިންގައި ވާހަކަދައްކަވަމުން ނަޝީދު ވަނީ އެމަނިކުފާނުގެ އަރިސް ބޭފުޅުންތަކެއް ޕާޓީން ވަކިކޮށްފައިވާކަމަށް ވިދާޅުވެފައެވެ. އެގޮތުން އެމަނިކުފާނުގެ ބޭބެ ޑރ. އަހުމަދު ނާޝިދު އަދި ރައްޔިތުންގެ މަޖިލީހުގެ ކުރީގެ މެމްބަރު ހާމިދު އަބްދުލްޣަފޫރުގެ އިތުރުން އަނބިކަބަލުން ލައިލާ އަލީ ވެސް ޕާޓީއިން ވަކިކޮށްފައިވާ ކަމަށް ވިދާޅުވިއެވެ.
ރިޔާސީ ޕްރައިމަރީގެ ކަންކަން އިންތިޒާމުކުރުމަށް އެކުލަވާލާފައިވާ އިންތިޚާބީ ކޮމިޓީން އެމްޑީޕީ އޮފީހުގައި ބޭއްވި ނޫސްވެރިންގެ ބައްދަލުވުމުގައި އެކަމާއި ގުޅޭގޮތުން ވާހަކަދައްކަވަމުން ކޮމިޓީ މެމްބަރު އިބްރާހީމް ވަހީދު (އިބުރޭ) ވިދާޅުވީ ނަޝީދުގެ ގާތް ބޭފުޅުންނާއި ނަޝީދަށް ތާއީދުކުރާ މެމްބަރުން ޕާޓީން ވަކިކުރިކަމަށް ގަބޫލުނުކުރައްވާކަމަށެވެ. ރައީސް ނަޝީދު އިޝާރާތްކުރެއްވި ބޭފުޅުންގެ ތެރެއިން ހާމިދު އަބްދުލްޣަފޫރަށް އިޝާރާތްކުރައްވާ އިބުރޭ ވިދާޅުވީ ހާމިދު އަބްދުލްޣަފޫރަކީ އަމިއްލަފުޅަށް ޕާޓީން ވަކިވެވަޑައިގަންނަވާފައިވާ ބޭފުޅެއްކަމަށެވެ.
39،000 މެމްބަރުންގެ ތެރޭގައި ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ އެއްބަނޑު އެއްބަފާ ބޭބޭފުޅުންވެސް ހިމެނޭކަމަށާއި އެބޭފުޅުން ޕާޓީން ކެނޑިފައި އޮތުމުން އަލުން ޕާޓީއަށް ރަޖިސްޓްރީވީ ކަމަށް އިބުރޭ ވިދާޅުވިއެވެ. އެއިރު އެކަންކޮށްފައިވަނީ އެނިޔަތެއްގައި ނޫންކަމަށާއި އެ ނިންމުން ނިންމިއިރު ބޮޑަށް ދާންއޮތީވެސް ފެންނަ ނުފެންނަ ވޯޓަކަށްކަމަށް އިބުރޭ ވިދާޅުވިއެވެ.
އެމްޑީޕީގެ ދަފްތަރުން 39،000 މެމްބަރުން ވަކިކުރި މައްސަލަ ފެންމަތިވެފައިވަނީ މިދިޔަ އަހަރުގެ މެއި މަހުގެ ތެރޭގައި އެމްޑީޕީގެ ގައުމީ މަޖިލީހުން އީސީގެ އެމްޑީޕީގެ ދަފުތަރުގައި ނެތް މެމްބަރުންނަކީ އެމްޑީޕީގެ މެމްބަރުން ނޫންކަމަށް ނިންމި ހިސާބުންނެވެ. އެއާއެކު އެމްޑީޕީން ގެންގުޅުނު ޕާޓީގެ ލިސްޓުން 39000ށް ވުރެ ގިނަ މެމްބަރުން ވަނީ އުނިވެފައެވެ. އިބުރޭ ވިދާޅުވީ އޭގެތެރެއިން 18،000ށް ވުރެ ގިނަ މެމްބަރުންނަކީ އެހެން ޕާޓީތަކުގެ ދަފުތަރުގައި ތިބި މެމްބަރުންކަމަށެވެ.
ޕާޓީގެ ދަފުތަރަށް މިބަދަލު ގެނައީ އެންމެ ޞައްހަ ވޯޓާސް ލިސްޓެއް ބޭއްވުމަށްކަމަށާއި އޭރު އެބަދަލު ގެނެސް ޕާޓީއަށް ވަނުމަށް ތިންމަސް ދުވަސް މެމްބަރުންނަށް ދިންކަމަށް ކޮމިޓީ މެމްބަރުން ވިދާޅުވިއެވެ. އެމުއްދަތުގެ ތެރޭގައި 5500 މެމްބަރުން އަލުން ޕާޓީއާ ގުޅުނުކަމަށް ވިދާޅުވިއެވެ. މިއީ ނޭންގި ހިނގާފައިވާކަމެއް ނޫންކަމަށާއި ކުއްލިއަކަށް ހިނގާފައިވާކަމެއްވެސް ނޫންކަމަށް އިބުރޭ ވިދާޅުވިއެވެ.
މިބަދަލު ގެނެސްފައިވަނީ ކޮންމެ ޕްރައިމަރީއަކާ ދިމާކޮށް ކެންޑިޑޭޓުން ބޭނުންވާ މީހުން ޕާޓީއަށް ވެއްދުމުގެ މައްސަލަ ފެންމަތިވާތީ އެކަން ހައްލުކުރުމަށްކަމަށް އިބުރޭ ވިދާޅުވިއެވެ.
