މާރޗްގެ ފަހުން ޕީއެސްޖީ ފުރަތަމަ ފަހަރަށް ބަލިވެއްޖެ
2 ޖެނުއަރީ 2023 | ހޯމަ 03:00ލެންސްއާއި ޕީއެސްޖީއާ ދެމެދު އޮތީ ހަތަރު ޕޮއިންޓްގެ ފަރަގެއް
ލެންސްގެ ދެވަނަ ލަނޑު ޖެހުމަށްފަހު އުފާފާޅުކުރަނީ
ފްރެންޗް ލީގުގެ އެއްވަނާގައި އޮތް ވަރުގަދަ ޕީއެސްޖީ މިދިޔަ އަހަރުގެ މާރޗް މަހުގެ ފަހުން ފުރަތަމަ ފަހަރަށް ބަލިވެއްޖެއެވެ.
ޕީއެސްޖީ ބަލިކުރީ ލީގުގައި ވަރަށް ރަނގަޅު ފޯމެއްގައި އޮތް ލެންސްއިންނެވެ. އެޓީމް އޮތީ ތާވަލުގެ ދެވަނާގައެވެ. ޕީއެސްޖީއާ ދެމެދު މިހާރު އޮތީ ހަތަރު ޕޮއިންޓްގެ ފަރަގެކެވެ. މިސީޒަންގައި ލީގުގައި ކުޅުނު ފުރަތަމަ 17 މެޗުގެ ތެރެއިން ލެންސް ބަލިވީ އެއް މެޗުންނެވެ. 17 މެޗުން 40 ޕޮއިންޓް ވަނީ ހޯދާފައެވެ.
ޕީއެސްޖީ ބަލިކުރީ 3-1 ނެވެ. ފަސްވަނަ މިނެޓުގައި ފުރަތަމަ ލަނޑު ޖަހާ ލެންސްއަށް ކުރިހޯދައިދިނީ ފްރާންކޮވްސްކީއެވެ. އެކަމަކު އޭގެ ދެ މިނެޓު ފަހުން އެކިޓިކޭ ލަނޑުޖަހާ ޕީއެސްޖީއަށް ނަތީޖާ ހަމަހަމަކޮށްދިނެވެ. ލެންސްއަށް ދެވަނަ ފަހަރަށް ކުރިހޯދައި ދިނީ އޮޕެންޑާއެވެ. ލީޑް ފުޅާކޮށްދިނީ ދެވަނަ ހާފް ފަށައިގެން ދެވަނަ މިނެޓުގައި ކްލައުޑޭ މައުރީސްއެވެ. އޭނާ ލަނޑު ޖެހީ ލެންސްގެ ދެވަނަ ލަނޑުޖެހި ލޮއިސް އޮޕެންޑާ ތަނަވަސްކޮށްދިން ފުރުޞަތަކުންނެވެ.
މެޗަށް ޕީއެސްޖީ ނުކުތީ ސަސްޕެންޝަންގެ ސަބަބުން ނޭމާ ނުލައެވެ. އަދި ވަރލްޑްކަޕަށްފަހު މެސީވެސް ހުރީ ރިކަވަރީގައެވެ.
