ސަރުކާރު ހިންގާ ޕީޕީއެމް އަށް ނިސްބަތްވާ ރައްޔިތުންގެ މަޖިލީހުގެ މެމްބަރުންނާއި ކޯލިޝަން ޕާޓްނަރު އެމްޑީއޭގެ މަޖިލިސް މެމްބަރުންގެ ފުރިހަމަ ތާއިދު ފިޝަރީޒް މިނިސްޓަރު ޑރ. މުހައްމަދު ޝައިނީ އަށް އެބައޮތް ކަމަށް ޕީޕީއެމްގެ ޕާލަމެންޓްރީގެ ގުރޫޕްގެ ނިލަންދޫ ދާއިރާގެ މެމްބަރު ޑރ. އަބްދުﷲ ހަލީލް ވިދާޅުވެއްޖެއެވެ.
ފިޝަރީޒް މިނިސްޓަރުގެ މަގާމުން ޑރ. ޝައިނީ އިސްތިއުފާ ދެއްވުމަށް ޕީޕީއެމް އަށް ނިސްބަތްވާ މަހިބަދޫ ދާއިރާގެ މެމްބަރު އަހުމަދު ތޯރިގް (ޓޮމް) ގޮވާލައްވާފައި ވަނިކޮށް ޑރ. ހަލީލް ކުރެއްވި ޓްވީޓްތަކެއްގައި ވިދާޅުވީ ފިޝަރީޒް މިނިސްޓަރު ޝައިނީއަށް ޕީޕީއެމް ކޯލިޝަން މެންބަރުންގެ ފުރިހަމަ ތާއީދު އެބައޮތް ކަމަށެވެ.
ޑރ. ހަލީލު ވިދާޅުވީ މަސްވެރިންގެ ކުރިއެރުމަށް ޑރ.ޝައިނީ ގިނަ މަސައްކަތްތަކެއް ކުރައްވާފައިވާ ކަމަށެވެ. އެހެންކަމުން ޕީޕީއެމް ޕީޖީ ގުރޫޕާއި އެމްޑީއޭގެ ޕީޖީ ގުރޫޕް މެންބަރުންގެ ފުރިހަމަ ތާއިދު ޑރ ޝައިނީ އަށް އެބަ އޮތް ކަމަށް ވެސް ވިދާޅުވިއެވެ.
ޑރ ހަލީލް ވިދާޅުވީ ރައީސް ޔާމީންގެ މެނިފެސްޓޯގައި މަސްވެރިންނާ ގުޅުންހުރި ކަންކަން ތަންފީޒް ކުރުމަށާއި ކުރަން ޖެހޭ މަސައްކަތްތައް ކެނޑިނޭޅި ކުރަމުންދާ ކަމަށެވެ. އަދި ރައީސް ޔާމީން ގައުމަށް ގެންނަވާ ހެޔޮބަދަލުތަކާއެކު މަސްވެރިންނަށް ވެސް އޭގެ ފައިދާ ލިބެމުންދާ ކަމަށް ޑރ. ހަލީލް ވިދާޅުވިއެވެ.
ޑރ ހަލީލް މިހެން ވިދާޅުވި ނަމަވެސް މަހިބަދޫ ދާއުރާގެ މެމްބަރު ތޯރިގް އޭނާގެ ފޭސްބުކްގައި ވިދާޅުވީ މަސްވެރިކަމުގެ ސިނާއަތުގައި މަސައްކަތްކުރާ ރައްޔިތުންގެ ދަތިތައް ހައްލު ނުވެގެން ދިއުމުގެ ޒިންމާ ޑރ. ޝައިނީ ނަންގަވަން ޖެހޭނެ ކަމަށެވެ.
ތޯރިގް ވިދާޅުވީ ޑރ. ޝައިނީ އިތުރަށް ފިޝަރީޒް މިނިސްޓަރުގެ މަގާމުގައި ހުންނަވައިގެން މަސްވެރިންނަށާއި މަސްވެރިކަމުގެ ދާއިރާގައި ހަރަކާތްތެރިވާ ފަރާތްތަކަށް ދިމާވެފައިވާ ދަތިތަކަށް ހައްލެއް ލިބިދާނެ ކަމަށް ގަބޫލު ނުކުރައްވާ ކަމަށެވެ.
ސަރުކާރުގެ މެނިފެސްޓޯގައި ހިމެނޭ "ބެޔަސް ނުބެޔަސް" ސިޔާސަތު ތިން އަހަރު ވީއިރު ވެސް ކާމިޔާބު ވެފެއިނުވާއިރު މަސްވެރިން ބާނާ މަސް ގަނެވޭނެ އެންމެ ދަށް އަގެއް ކަނޑައެޅުމާ ބެހޭ ރެގިޔުލޭޓަރީ ބޮޑީ އުފެއްދުމަށް ރައްޔިތުންގެ މަޖިލީހުގެ ޕީޕީއެމް އަށް ނިސްބަތްވާ މެމްބަރުން އެދުނު އެދުން ކުރިއަށް ނުގެންދާ ކަމަށް ތޯރިގް ވިދާޅުވެފައި ވެއެވެ.
ތޯރިގް ވިދާޅުވީ މާލޭގެ ފަޅުން މަސްވެރިންނަށް ދިމާވާދަތިތަކަށް ހައްލުކޮށް މަސްވެރިންގެ ހައްގުތައް ހޯދައިދިނުމަށް މިނިސްޓަރު ޝައިނީ މަސައްކަތް ނުކުރައްވާ ކަމަށެވެ.
މީގެ އިތުރުން އޮޑިޓް އޮފީހުން މާލީއްޔަތު ކޮމެޓީ އަށް ހުށަހަޅާފައިވާ ފިޝަރޯޒް މިނިސްޓްރީގެ ފާއިތުވެދިޔަ އަހަރުގެތަކުގެ އޮޑިޓްރީޕޯޓްތަކުގައި މާލީއްޔަތު ގަވާއިދާއި އަދި ބެސްޓްޕްރެކްޓިސްއާ ހިލާފަށް ހުރި ކަންކަން ރަނގަޅުކުރުމުންދާ ކަމަށް އޮޑިޓް ރިޕޯޓްތަކުން ނުފެންނަ ކަމަށް ވެސް ތޯރިގް ވިދާޅުވިއެވެ.
މީގެއިތުރުން ތޯރިގް ވިދާޅުވީ، ބޮޑު ކަންނެލި އެކްސްޕޯޓު ކުރާ ފަރާތްތަކާ މިނިސްޓަރާ މެދެދު ޖާއިޒް ނޫން ގުޅުންތަކެއް އޮންނަ ކަމަށް ގިނަ ފަރާތްތަކުން ބުނަމުން ދާ ކަމަށެވެ.
އެހެން ކަމުން ދިވެހިރައްޔިތުންނަށް އެންމެ ފައިދާ ބޮޑު ގޮތަކީ މިނިސްޓަރު ޝައިނީ މަގާމުން އިސްތިއުފާ ދެއްވުން ކަމަށް ތޯރިގް ވިދާޅުވެފައި ވެއެވެ.
މި ނޫން ވެސް ގިނަ ތުހުމަތުތަކެއް ތޯރިގް ވަނީ ޝައިނީ އަށް ކުރައްވާފައެވެ. މި ކަމާ ބެހޭ ގޮތުން ރާއްޖެއެމްވީން ސުވާލުކުރުމުން ޝައިނީ ޖަވާބު ދެއްވީ ހިނިފުޅުވަޑުވާލެއްވުމަކުންނެވެ. އިތުރު އެއްޗެއް ވިދާޅެއް ނުވެއެވެ.
