އެމްޑީޕީގެ ޕްރައިމަރީގައި ވޯޓުލެވޭ ވޯޓަރސް ލިސްޓާމެދު ޝަކުވާ ހުށަހަޅަން މިހާރު ދީފައިވާ މުއްދަތު އިތުރުކުރުމުގެ ވިސްނުމެއް ނުގެންގުޅުއްވާކަމަށް، ރިޔާސީ ޕްރައިމަރީއަށް ތައްޔާރުވުމުގެ ގޮތުން އެކުލަވާލި ޚާއްސަ ކޮމިޓީގެ މެމްބަރު އަދި އެމްޑީޕީގެ ތަރުޖަމާނު އަނަސް އަބްދުއްސައްތާރު ވިދާޅުވެއްޖެއެވެ.
ކުރިއަށް އޮތް ރިޔާސީ އިންތިޚާބުގައި އެމްޑީޕީގެ ޓިކެޓްގައި ވާދަކުރާނެ ފަރާތެއް ހޮވުމަށް ބާއްވާ ޕްރައިމަރީ ބޭއްވުމަށް ތާވަލުކޮށްފައިވަނީ 2023 ވަނަ އަހަރުގެ ޖެނުއަރީ މަހުގެ 28 ވަނަ ދުވަހުއެވެ. ރިޔާސީ ޕްރައިމަރީގައި ވާދަކުރައްވަނީ ރައީސުލްޖުމްހޫރިއްޔާ އިބްރާހީމް މުހައްމަދު ސާލިހާއި ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދެވެ. ޕްރައިމަރީ ބޭއްވުމަށް ވަމުންދާ ތައްޔާރީތަކަށް ބަލާއިރު، އެމްޑީޕީގެ ޕްރައިމަރީގައި ވޯޓުލެވޭ ވޯޓަރސް ލިސްޓާމެދު ޝަކުވާ ހުށަހަޅަން ފުރުސަތު ހުޅުވާލާފައިވަނީ އަންނަ އާދީއްތަ ދުވަހާ ހަމައަށެވެ.
އެ މުއްދަތަކީ އެންމެ އެކަށީގެންވާ މުއްދަތެއް ކަމަށް ގަބޫލު ނުކުރެއްވޭކަމަށް، އެމްޑީޕީގެ ކުރީގެ ޗެއާރޕަރސަން އަދި ރައްޔިތުންގެ މަޖިލިހުގެ ހެންވޭރު ހުޅަނގު ދާއިރާގެ މެމްބަރު ހަސަން ލަތީފް ވަނީ ދާދިފަހުން ބޭއްވި ނޫސްވެރިންގެ ބައްދަލުވުމެއްގައި ވިދާޅުވެފައެވެ. އަދި ޝަކުވާ ހުށަހެޅުމުގެ މުއްދަތު އިތުރުކޮށްދިނުމަށް އޭނާ ވަނީ ގޮވާލައްވާފައެވެ.
އެކަމާގުޅިގެން "ރާއްޖެ އެމްވީ"ން ދެންނެވި ސުވާލަކަށް ޖަވާބުދެއްވަމުން އަނަސް ވިދާޅުވީ، އެމްޑީޕީން ހާމަކުރި ވޯޓަރސް ލިސްޓުގައިވާ ގޮތުން 57،714 މީހުންނަށް ވޯޓުލެވޭނެ ކަމަށެވެ. ވޯޓަރސް ލިސްޓަށް ޝަކުވާ ހުށަހަޅަން ފުުރުސަތު ހުޅުވާލާފައި ވަނީ އާދިއްތަ ދުވަހުގެ 04:00ށް ކަމަށާއި، އެ މުއްދަތަކީ ޝަކުވާ ހުށަހަޅަން އެކަށީގެންވާ މުއްދަތެއް ކަމަށެވެ. އަދި މިހާރު ލިބެމުންދާ ޝަކުވާތަކުގެ ތަފްސީލްތައް ސުންގަޑި ހަަމަވުމުން ހާމަކުރައްވާނެ ކަަމަށާއި، ޝަކުވާތައް ބަލައި، އަޅަންޖެހޭ ފިޔަވަޅުތައް އަޅާނެކަަމަށް އޭނާ ވަނީ ވިދާޅުވެފައެވެ.
އަނަސް މިފަދައިން ވިދާޅުވެފައިވާއިރު، ވޯޓަރސް ލިސްޓާމެދު ރައީސް ނަޝީދުގެ ގިނަ ޝަކުވާތައް ހުރިކަން ފާހަގަކޮށްލެވެއެވެ. އެކަންކަން ތަފްސީލްކޮށްދެއްވައި ހަަސަން ލަތީފް ވިދާޅުވީ، ވޯޓަރސް ލިސްޓް ރައީސް ނަޝީދާ ހިއްސާކުރިއިރު އަމަލުކުރީ ކުރިން އަމަލުކުރާ އުސޫލުތަކާ ވަރަށް ބޮޑަށް ތަފާތުކޮށް ކަަމަށެވެ. ވޯޓަރސް ލިސްޓުގައި މެމްބަރުންގެ އައިޑީކާޑު ނަމްބަރު ނެތުމުން ވަރަށް ބޮޑަށް ދަތިވާކަަމަށް ހަސަން ވިދާޅުވިއެވެ. އެ ލިސްޓުގައި އައިޑީކާޑު ނަމްބަރު ނެތީ އިލެކްޝަންސްއިން އެ ލިސްޓު ދިންއިރު އައިޑީކާޑު ނަމްބަރު ނެތުމުންކަމަށް ޕާޓީން ބުނިނަމަވެސް އިލެކްޝަނުން އެކަން ދޮގުކުރާ ކަމަށް ހަސަންލަތީފް ވަނީ ވިދާޅުވެފައެވެ.
މީގެ އިތުރުން ހަސަން ލަތީފް ވަނީ، އެމްޑީޕީގެ ދަފްތަރުން 39،000 މެމްބަރުން ވަކިކޮށްފައިވާކަމަށާއި، އެ ފަރާތްތަކުގެ ތެރޭގައި ގިނައީ ރައީސް ނަޝީދަށް ކުރިއަށް އޮތް ޕްރައިމަރީގައި ވޯޓުލާން ތިބި ފަރާތްތައް ކަމަށް ވިދާޅުވެފައެވެ. މިހާރު އެމްޑީޕީގައި ތިބި މީހުންގެ ތެރޭގައި ރައީސް ސާލިހު ވެރިކަމަށް ވަޑައިގަތްފަހުން އެމްޑީޕީއާ ގުޅުނު މީހުން ގިނަކަަމަށާއި، ޕާޓީގައި ކުރިން ތިބި މީހުން ވަކިކުރީ ގަސްދުގައި ރައީސް ނަޝީދަށް އޮތް ތާއީދު ފަނޑުކޮށްލުމަށް ކަމަށްވެސް އޭނާ ވަނީ ވިދާޅުވެފައެވެ. ވަކިކުރި މެމްބަރުންގެ ތެރެއިން 80 އިންސައްތަ މީހުންނަކީ ރައީސް ނަޝީދަށް ތާއީދުކުރާ މީހުންކަން، ރައީސް ނަޝީދަށް ތާއީދުކުރާ ފަރާތްތަކުން ކުރި ދިރާސާއަކުން ދައްކާކަަމަށް އޭނާ ވަނީ ވިދާޅުވެފައެވެ.
