އަންނަ އަހަރު ބާއްވާ ރިޔާސީ އިންތިޚާބުގައި އެމްޑީޕީގެ ފަރާތުން ވާދަކުރާ ކެންޑިޑޭޓަކީ ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ކަމުގައިވާނަމަ އެމްޑީޕީއަށް ލިބޭނީ 20 އިންސައްތަ ވޯޓުކަމަށް އެމަނިކުފާނާ ޕްރައިމަރީގައި ވާދަކުރައްވާ އެމްޑީޕީގެ ރައީސް، ރައީސް މުހައްމަދު ނަޝީދު ވިދާޅުވެއްޖެއެވެ.
ނަޝީދުގެ ރިޔާސީ ޕްރައިމަރީ ކެމްޕެއިން "ފިކުރެއްގެ ދިރުން" ފެށުމަށް ސަލްޓަން ޕާކުގައި ބުދަ ދުވަހުގެ ރޭ ބޭއްވި ކެމްޕެއިން ޖަލްސާގައި ވާހަކަފުޅުދައްކަވަމުން ނަޝީދު ވަނީ ރައީސް ޞާލިހަށް 20 އިންސައްތަ ލިބިވަޑައިގަންނަވާނެކަމަށް އެމަނިކުފާނު ގަބޫލުކުރައްވާ ސަބަބުތައް ބަޔާންކުރައްވާފައެވެ. އަދި ވިދާޅުވީ އެމްޑީޕީގެ ރިޔާސީ ޕްރައިމަރީގައި ވާދަކުރެއްވަން ނިންމެވީ ރައީސް ޞާލިހަށް 20 އިންސައްތަ ވޯޓު ލިބިވަޑައިގެން އެމްޑީޕީއަށް އިންތިޚާބުގެ ދެ ވަނަ ބުރު ގެއްލިދާނެކަމުގެ ބިރުހީފުޅުވާތީކަމަށެވެ.
ނަޝީދު ވިދާޅުވީ އެމްޑީޕީގެ ފިކުރަކީ ރައްޔިތުންގެ ފިކުރެއްކަމަށެވެ. ރައީސް ޞާލިހާއި އެމަނިކުފާނުގެ ޓީމުން ފާއިތުވި 5 އަހަރު މަސައްކަތްކުރައްވަމުން ގެންދެވީ ޕާޓީގެ ވަރަށް ގިނަ އަދަދެއްގެ މެންބަރުންނާއި ހުދު ރައީސް ނަޝީދު އެއްކައިރިކޮށް ބާކީކުރުމަށްކަމަށް ނަޝީދު ވިދާޅުވިއެވެ. ރައީސް ޞާލިހުގެ ވިސްނުންފުޅަކަށްވީ އެމްޑީޕީގެ ލޯގޯ އާއި ނިޝާނާއި ކުލަ އާއި ޖޯޝް ބޭނުންކުރައްވައިގެން އެމްޑީޕީގެ 39،000 މެންބަރުން އެމްޑީޕީން ވަކިކޮށް އަނެއް ޕާޓީއަށް އެމްޑީޕީ ހެދުމުގެ ނިޔަތުގައިކަމަށް ނަޝީދު ވިދާޅުވިއެވެ.
ނަމަވެސް މިރޭ ވެސް މާދަމާ ވެސް ސާފުވާ ކަމަކީ މި ޕާޓީ މިފިކުރު ދޫކޮށްލުމަށް އެކަކުވެސް އެއްބަސްނުވާކަން. މި މަސައްކަތުގައި އަބަދުވެސް ދެމި ތިބޭނެކަން. އަޅުގަނޑު ޕްރައިމަރީއަށް މިކުރިމަތިމިލަނީ އެމްޑީޕީއަށް ލިބިދާނެ ވޯޓު މަދުވެދާނެކަމުގެ ބިރުވެރިކަން އޮތީމާ. ދިވެހިންނަށް ދިވެހިންގެ ވެރިކަމެއް ކޮށްދިނުމަށް. ރައްޔިތުންނަށްޓަކައި ކޮށްދޭ ވެރިކަމެއް ކޮށްދިނުމަށް.ރައީސް މުހައްމަދު ނަޝީދު / އެމްޑީޕީގެ ރައީސް
ނަޝީދު ވިދާޅުވީ 2018 ވަނަ އަހަރާ އަޅާބަލާއިރު ރާއްޖޭގެ ސިޔާސީ މަސްރަހުން ދެ ކަމެއް ބަދަލުވެފައިވާކަމަށެވެ. އެއްކަމަކީ ރައީސް އަބްދުﷲ ޔާމީން ފިޔަވައި ރާއްޖޭގެ އެހެން ހުރިހާ ސިޔާސީ ލީޑަރުންނަށް 2023 ވަނަ އަހަރުގެ ރިޔާސީ އިންތިޚާބުގައި ވާދަކުރުމުގެ ފުރުސަތު އޮތުންކަމަށެވެ. 2018 ވަނަ އަހަރުގެ ވިސްނުމަކަށްވީ ކޮންމެ ގޮތަކަށް ހަދައިގެން ވެސް އޭރު އޮތް ރައީސް ޔާމީންގެ ވެރިކަން ބަދަލުކުރުންކަމަށާއި އިއްތިހާދެއް ހެދީ އެސަބަބަށްޓަކައި ކަމަށެވެ.
ނަމަވެސް މިއަދު ޖުމްހޫރީ ޕާޓީ ވެސް، އެމްއާރުއެމް ވެސް އަދާލަތު ޕާޓީ ވެސް އެމްއެންޕީގެ ލީޑަރުންނަށް ވެސް އިންތިޚާބުގައި ވާދަކުރެއްވޭނެކަމަށާއި ރައީސް ޞާލިހު އެ ވިދާޅުވާ ކޯލިޝަންގެ ޗޮއިސްއެއް މިފަހަރު ނެތްކަމަށެވެ. އެއިން ކޮންމެ ޕާޓީއަކުން ވެސް ކެންޑިޑޭޓުން ނުކުންނާނެކަމަށް ނަޝީދު ވިދާޅުވިއެވެ.
ނަޝީދު ވިދާޅުވީ އަލަށް ކޮންމެ މީހަކު ނުކުތަސް ވެސް އެމީހަކަށް ލިބެނީ 20 އިންސައްތަ ވޯޓުކަމަށެވެ. ރައީސް ޞާލިހު 2018 ގައި ނުކުންނެވީ ކޯލިޝަނަކުން ކަމަށާއި ނަމަވެސް މިފަހަރު ނުކުންނަވާނީ ގައުމީ އިންތިޚާބަށް އަލަށްކަމަށް ނަޝީދު ވިދާޅުވިއެވެ.
ނަމަވެސް މިފަހަރު މިއީ ރައީސް ޞާލިހުގެ ފުރަތަމަ ފަހަރު. 2008 ވަނަ އަހަރު ހަސަން ސައީދަށް ވެސް އެނގިވަޑައިގަންނަވާނެ އަދި ގާސިމް އިބްރާހީމަށް ވެސް އަޅުގަނޑަށް ވެސް އެނގޭފަދައިން ރައީސް ޞާލިހަށް 20 އިންސައްތަ ލިބިވަޑައިގަންނަވަފާނެ ކަމުގެ ބިރު އެބައޮތް. އެހެންވީމާ އަޅުގަނޑު މި އިންތިހާބަށް ނުކުތުން ކޮންމެހެން ބޭނުންކަމެއްކަމަށް ދެކެން.ރައީސް މުހައްމަދު ނަޝީދު / އެމްޑީޕީގެ ރައީސް
ނަޝީދު ވިދާޅުވީ ސިޔާސީ މަސްރަހަށް ދެން އައި އެންމެ ބޮޑު ބަދަލަކީ ރިޔާސީ ކެންޑިޑޭޓެއްގެ ގޮތުގައި ޔާމީން ނެތުންކަމަށާއި އެހެންކަމުން ޖޭޕީ އާއި އަދާލަތާއި އެމްއާރުއެމްގެ ވެސް އުންމީދު ބޮޑުވާކަމަށެވެ. އަދި ޔާމީނަށް ތާއީދުކުރާ މީހުންގެ ވޯޓެއް ރައީސް ޞާލިހަށް ލިބިވަޑައިނުގަންނަވާނެކަމަށާއި އެމްޑީޕީން ވަކިކުރި 39،000 މެންބަރުންގެ ވޯޓު ވެސް ރައީސް ޞާލިހަށް ލިބިވަޑައިނުގަންނަވާނެކަމަށެވެ.
ކަންބޮޑުވާ ކަންބޮޑުވުމަކީ މި ބޮޑު އަދަދުގެ ވޯޓު ރައީސަށް ގެއްލުމުން އަނެއްކާވެސް މިދަނީ 20 އިންސައްތައަށް، ނަމަވެސް ސިޔާސީ ތަބީއަތް އެއީ އަޅުގަނޑުވެސް ދަންނަ އެއްޗެއް. ވަރަށް އިހުލާސްތެރިކަމާއެކު މިދަންނަވަނީ އަޅުގަނޑުމެން ހޯދަން މިއުޅެނީ އެމްޑީޕީގެ ވެރިކަމެއް، ތިބޭފުޅުންގެ ވެރިކަމެއް. ރައީސް ޞާލިހުއާއި ތިބޭފުޅުންނާ ދުރުވި ކިތަންމެ ސަބަބެއް އެބައޮތް.ރައީސް މުހައްމަދު ނަޝީދު / އެމްޑީޕީގެ ރައީސް
ނަޝީދު ތަކުރާރުކޮށް ވިދާޅުވީ ރައީސް ޞާލިހު އެމްޑީޕީގެ މެންބަރުންނާ ފެޔަށް ޖެހިވަޑައިގަންނަވާފައިވާކަމަށާއި އެމްޑީޕީގެ މެނިފެސްޓޯ ތަންފީޒުކުރެއްވުމުގައި ފަހަތަށް ޖެހިވަޑައިގަންނަވާފައިވާކަމަށެވެ. އަދި މެނިފެސްޓޯގައިވާ އެމްޑީޕީގެ ސިޔާސަތުތައް ތަންފީޒުކުރެއްވުމަށް "ރިއެކްޓް" ނުކުރެއްވިކަމަށް ވިދާޅުވިއެވެ.
