އަނެއްކާ ވެސް ރީސް ޖޭމްސް އަށް އަނިޔާވެއްޖެ

ޗެލްސީ އަށް ކުޅެމުން އަންނަ އިނގިރޭސި ޑިފެންޑަރު ރީސް ޖޭމްސް އަށް އަނެއްކާ ވެސް އަނިޔާވެއްޖެ އެވެ.

ޖޭމްސް އަށް އަނިޔާވެފައިވަނީ ވޯލްޑް ކަޕް ބްރޭކަށްފަހު ޕްރިމިއާ ލީގުގައި ޗެލްސީން ކުޅުނު މެޗުގަ އެވެ. އެ މެޗުގެ 53 ވަނަ މިނެޓުގައި އަނިޔާގެ ސަބަބުން އޭނާ ވަނީ ބަދަލުކޮށްފަ އެވެ. މިއީ މިއަހަރުގެ ތެރޭގައި ޖޭމްސް އަށް އަނިޔާވި ދެ ވަނަ ފަަހަރެވެ. ވޯލްޑް ކަޕްގެ ކުރިން ޔުއެފާ ޗެމްޕިއަންސް ލީގުގައި ޗެލްސީން އޭސީ މިލާނާ ދެކޮޅަށް އޮކްޓޫބަރު މަހުގެ ތެރޭގައި ކުޅުނު މެޗުގައި ވެސް ޖޭމްސް އަށް ވަނީ ސީރިއަސް އަނިޔާއެއްވެފަ އެވެ. އެ އަނިޔާގެ ސަބަބުން އޭނާ ވަނީ ކުޅުމާ ދުރުގައި ހުންނަން ޖެހިފަ އެވެ. އޭގެ ސަބަބުން ފީފާ ވޯލްޑް ކަޕަށް އިންގްލެންޑުން ނެގި ސްކޮޑުން ވެސް ޖޭމްސް އަށް ޖާގަ ގެއްލުނެވެ. ޕްރިމިއާ ލީގުގައި ބޯންމައުތާ ދެކޮޅަށް ކުޅުނު މެޗަކީ ޖޭމްސް އަނިޔާ އިން އެނބުރި އައިސް ކުޅުނު ފުރަތަމަ މެޗެވެ.

ޖޭމްސް އަންނަނީ ޗެލްސީގައި މޮޅަށް ކުޅެމުންނެވެ. އެކަން އެ ޓީމުގެ ކޯޗު ގްރަހަމް ޕޮޓާ ވެސް ވަނީ ފާހަގަކޮށްފަ އެވެ. ބޯންމައުތު މެޗަށްފަހު ވާހަކަ ދައްކަމުން ޕޮޓާ ބުނީ، އަނިޔާގެ މާ ބޮޑު ތަފްސީލެއް ނޭންގޭ ކަމަށެވެ. އޭނާ ބުނީ އެކަމަށް ކޮމެންޓެއް ކުރަން އަދި މާ އަވަސް ކަމަށާއި، ޖޭމްސްގެ ފެންވަރު ފެންނާނެ ކަމަށެވެ. އަދި ޖޭމްސް އަށް އަނެއްކާ ވެސް އަނިޔާވުމަކީ ޗެލްސީ އަށް ލިބޭނެ ގެއްލުމެއް ކަމަށާއި، އަނިޔާވެފައިވާ މިންވަރު މެޑިކަލް ޓީމު މެދުވެރިކޮށް ބަލަމުންދާނެ ކަމަށެވެ.

އެކަމާ ގުޅިގެން ޖޭމްސް އާންމުކުރި ސްޓޭޓްމަންޓެއްގައި ބުނީ، 2022 ވަނަ އަހަރަކީ ވަރަށް އުނދަގޫ އަހަރެއް ކަމަށެވެ. އަދި މި އަހަރުގެ ތެރޭގައި އެތައް ބައެއްގެ ފަރާތުން ލިބުނު ސަޕޯޓަށް ޝުކުރު އަދާ ކުރާ ކަމަށެވެ. އޭނާ ބުނީ މެންޓާލިޓީ ގޮތުން ވެސް އަސަރުކޮށްފައިވާ ކަމަށާއި، ދިއިރުޅުމުގައި އެކަހަލަ ކަންކަމާ ކުތިމަތިލާން ޖެހޭނެ ކަމަށެވެ. އެގޮތުން އުންމީދު ކުރަނީ މިއަހަރަކީ އެންމެނަށް ވެސް އަމާން ރައްކާތެރި އަހަރަކަށްވުން އެދޭ ކަމަށެވެ. ނިންމާލަމުން ޖޭމްސް ބުނީ ކުރިއަށް އޮތް އަހަރުގައި އެންމެނާ ބައްދަލުވާނެ ކަމަށެވެ.

ޖޭމްސްގެ އަނިޔާ އަށް ފަހު ހެދި ޓެސްޓުތަކަށްފަހު ޗެލްސީން ބުނީ، ޖޭމްސް އެނބުރި ކުޅުމުގެ ތެރެއަށް އަންނަން މަސް ދުވަސް ނަގާނެ ކަމަށެވެ.