މަގުތައް ކުނިވެގެން ގޮނޑަކަށްވެގެން ގޮސްދާނެތީ ކަންބޮޑުވޭ: އީޕީއޭ
28 ޑިސެމްބަރު 2022 | ބުދަ 02:12ވެމްކޯއާއި މާލެސިޓީ ކައުންސިލާ ދެމެދު ވެފައިވާ އެއްބަސްވުން އައު ނުކުރަން ކައުންސިލުން ވަނީ ނިންމާފައި
އީޕީއޭގެ ޑިރެކްޓަރު ޖެނެރަލް އިބްރާހިމް ނަޢީމް
މާލެ ސިޓީ ކައުންސިލާއި ވެމްކޯއާ ދެމެދު ވެފައިވާ އެއްބަސްވުމުގެ މުއްދަތު ހަމަވެ، މާލެ ސިޓީ ކައުންސިލުން އަމިއްލައަށް މާލެ އާއި ވިލިމާލޭގެ އާއްމު ސަރަހައްދުތައް ކުނި ކަހައި، ކުނި ނެގުމުގެ މަސައްކަތް ފަށާފައިވާއިރު މަގުތައް ކުނިވެގެން، ގޮނޑަކަށްވެދާނެތީ ކަންބޮޑުވާ ކަމަށް އެންވަޔަރަމަންޓް ޕްރޮޓެކްޝަން އެޖެންސީ (އީޕީއޭ)ގެ ޑިރެކްޓަރު ޖެނެރަލް އިބްރާހިމް ނަޢީމް ވިދާޅުވެއްޖެއެވެ.
އިބްރާހިމް ނަޢީމް މިފަދައިން ވިދާޅުވީ "ރާއްޖެ ޓީވީ" ގެ ފަލަސުރުޚީ ޕްރޮގްރާމުގައި ވާހަކަދައްކަވަމުންނެވެ. އެގޮތުން، ކައުންސިލުން ގެނައި ބަދަލާއެކު ކުނި ނެގުމުގެ ކަންކަން ކުރަމުން އަންނަ ގޮތް އީޕީއޭއިން ކުރިން ވެސް ބަލަމުންއައި ގޮތަށް ބަލަމުން ގެންދާނެ ކަމަށް އޭނާ ވިދާޅުވިއެވެ.
އޭނާ ވިދާޅުވީ އީޕީއޭގެ ޒިންމާއަކީ ގަވާއިދާ ޚިލާފަށް މަގުމައްޗަށް ކުނި އަޅާ ފަރާތްތައް ހޯދުމާއި އެ ފަރާތްތަކާ މެދު ފިޔަވަޅު އެޅުމާއި ސަރަހައްދުތައް ބެލެހެއްޓުމަށް ހަވާލުކުރެވިފައިވާ ފަރާތްތަކުން އެ ޒިންމާ އަދާ ކުރާކަން ކަށަވަރު ކުރުން ކަމަށެވެ. އެގޮތުން، ސިޓީތަކުގެ މަގުތަކުގައި ކުނިކެހުމާއި އެ ކުނި ނެގުމާއި ނައްތާލުމުގެ މަސައްކަތް ހަވާލުކޮށްފައިވަނީ ސިޓީ ކައުންސިލްތަކަށް ކަމަށްވާއިރު އެ ކައުންސިލްތަކުން ބަޔަކާ ހަވާލުކޮށްގެން ކަމުގައި ވީ ނަމަވެސް އެކަން ރަނގަޅަށް ކުރެވޭތޯ ކަށަވަރު ކުރަން ޖެހޭ ކަމަށް ނަޢީމް ވިދާޅުވިއެވެ.
ވެމްކޯއާއި ކައުންސިލާ ދެމެދު ވެފައިވާ އެއްބަސްވުން އައު ނުކުރަން ނިންމުމުން، ވެމްކޯއިން މާލެ އާއި ވިލިމާލޭގެ މަގުތަކާއި ޕާކުތަކުގެ ކުނި ކެހުން ހުއްޓާލަން ނިންމާފައިވާކަން ފާހަގަކުރައްވައި ނަޢީމް ވިދާޅުވީ މިހާރު އެ އެޖެންސީގެ ކަންބޮޑުވުމަކީ މާލޭގެ މަގުތައް ގޮނޑުވެގެންދިއުން ކަމަށެވެ. މީގެ ސަބަބުން ރައްޔިތުންނަށް ދަތިތަކާ ދިމާވާނެ ކަމަށާއި މާލެ ސިޓީ ކައުންސިލުން ވެމްކޯއިން އަދާ ކުރި ރޯލު ރަނގަޅަށް އަދާ ކުރާނެ ކަމަށް އުއްމީދު ކުރައްވާ ކަމަށް ވެސް އޭނާ ވިދާޅުވިއެވެ.
ވެމްކޯއިން ހޯމަ ދުވަހު ނެރުނު ބަޔާނެއްގައި ބުނީ ސިޓީ ކައުންސިލާއެކު ހަދާފައިވާ އެއްބަސްވުމުގެ މުއްދަތު މި މަހުގެ 25 އަށް ހަމަވެފައިވާ ކަމަށާއި ސިޓީ ކައުންސިލުން އެއްބަސްވުން އައު ނުކުރަން ނިންމާފައިވާ ކަމަށެވެ. އަދި ސިޓީ ކައުންސިލުން އެ މަސައްކަތްތައް ކުރިއަށްގެންދިއުމަށް ނިންމާފައިވަނީ އަމިއްލައަށްކަން ފާހަގަކޮށް ވެމްކޯއިން ބުނީ އެއާއެކު އެ ކުންފުނިން ފޯރުކޮށްދެމުން އައި ބައެއް ޚިދުމަތްތައް ހުއްޓާލަން ނިންމާފައިވާ ކަމަށެވެ.
ވެމްކޯއިން ހުއްޓާލަން ނިންމި ޚިދުމަތްތަކުގެ ތެރޭގައި މާލެ އާއި ވިލިމާލޭގެ ހުރިހާ މަގުތަކާއި ގޯޅިތަކާއި ޕާކުތަކާއި އަދި މައިޒާންތަކާއި އެ މައިޒާންތަކާ ގުޅިފައިވާ މަގުތަކާއި ގޯތިތައް ހިމެނޭގޮތަށް ކުނިކަހައި ސާފުކޮށް، ކުނި ނަގައި ކުނި އުކާލައި އެ ކުނި ނައްތާލުމުގެ މަސައްކަތާއި ދަތުރުވެރިންގެ މާރުކޭޓާއި ލޯކަލް މާރުކޭޓުން ކުނި ނެގުމާއި އަދި ކުނި ނައްތާލުމުގެ މަސައްކަތާއި މާލެއާއި ވިލިމާލޭގެ މަގުތަކާއި ގޯޅިތަކުގެ ކަންމައްޗަށް ގަވާއިދާ ޚިލާފަށް އަޅާ ކުނި ނެގުމާއި އެ ކުނި ނައްތާލުމުގެ މަސައްކަތް ހިމެނެއެވެ.
ވެމްކޯއިން މާލެއާއި ވިލިމާލޭގައި ދެމުން އައި ގިނަ ޚިދުމަތްތައް ހުއްޓާލަން ނިންމި ނަމަވެސް ގޭބީސީތަކުން އަދިވެސް ކުނި ނަގާނީ އެ ކުންފުނިންނެވެ. ނަމަވެސް އެ ކުންފުނިން މިގޮތަށް ކުނި ނަގާނީ އެ ކުންފުނީގައި ރަޖިސްޓްރީވެގެން ޚިދުމަތް ހޯދާ ތަންތަނުން އެކަންޏެވެ.
މާލެ ސިޓީ ކައުންސިލުން ވެމްކޯއާއެކު ވެފައިވާ އެއްބަސްވުން އައު ނުކުރުމަށް ނިންމީ އެ އެއްބަސްވުމުގެ ސަބަބުން ކައުންސިލުގެ ޚަރަދު އިތުރުވާނެ ކަމަށާއި ކައުންސިލުން އަމިއްލައަށްކުރާނަމަ ޚަރަދު ދަށްވާނެ ކަމަށް ބުނެއެވެ. އެ ކައުންސިލުން މިގޮތަށް ނިންމާފައިވާއިރު މާލެއާއި ވިލިމާލޭގެ މަގުތަކުގައި ކުނި ކެހުމުގައި ވެމްކޯގެ ގިނަ އަދަދެއްގެ މުވައްޒަފުން ހަރަކާތްތެރިވެއެވެ.
