ކުނޫޒު އޮތީ ހިސޯރުކޮށްފަ، އެއްޗެއް ޕްލާންޓް ކޮށްފާނެތީ ކަންބޮޑުވޭ: ޕާޓީތައް
ކުނޫޒު ހިސޯރުކޮށްފައިވަނީ ކޯޓް އަމުރާ ޚިލާފަށް
ކުނޫޒު ފުލުހުންގެ ބެލުމުގެ ދަށުގައި
ޖުމްހޫރީ ޕާޓީގެ މައި އޮފީސް މ. ކުނޫޒު މިހާރު ފުލުހުންގެ ބެލުމުގެ ދަށުގައި އޮތީ ހިސޯރުކޮށްފައި ކަމަށާއި، އެއްޗެއް ޕްލާންޓް ކޮށްފާނެތީ ކަންބޮޑުވާ ކަމަށް އިދިކޮޅު ޕާޓީތަކުން ބުނެފި އެވެ.
ގުޅިފައިވާ ޕާޓީތަކުން ބުރާސްފަތި ދުވަހު ނެރުނު ނޫސްބަޔާނެއްގައި ބުނީ އަންގާރަ ދުވަހުގެރޭ ކުނޫޒް ފުލުހުންގެ ބެލުމުގެ ދަށަށް ގެންގޮސް އެތަން ބަލާ ފާސްކުރުމަށްފަހު، ފާސްކުރުން ނިމުނު ކަމަށާއި ތުހުމަތު ކުރެވޭ މައްސަލައާ ގުޅޭ އެއްވެސް އެއްޗެއް ފެނިފައިނުވާ ކަމުގެ ލިޔުން ޖުމްހޫރީ ޕާޓީއާ ހަވާލުކުރުމަށްފަހު އަދިވެސް އެ އޮފީސް ފުލުހުންގެ ބެލުމުގެ ދަށުގައި، ކޯޓު އަމުރާ ޚިލާފަށް ހިސޯރުކޮށްފައިވާތީ އެކަން ޕާޓީތަކުން ކުށްވެރިކުރާ ކަމަށެވެ.
ކުނޫޒް ބަލާފާސްކުރުމަށް ފަހު ޖުމްހޫރީ ޕާޓީއާ އަނބުރާ ހަވާލުކުރި އެވެ.. ނަމަވެސް، އެ އޮފީހުގެ އެއްވެސް މުވައްޒަފަކަށް އަދި ޕާޓީގެ އިސް ފަރާތަކަށްވެސް އެ އިމާރާތަށް ނުވަދެވޭނެ ކަމަށް އަންގައި އޮފީހަށް ވަނުމަށް ފުލުހުން ދަނީ ހުރަސް އަޅަމުންނެވެ. ފުލުހުން ބުނާ ގޮތުގައި ކުނޫޒް ބެލުމުގެ ދަށުގައި އަދިވެސް އޮތީ ބަލާފާސްކުރުމަށް ނެރުނު ކޯޓް އަމުރުގެ ދަށުންނެވެ.
ޕާޓީތަކުން ނެރުނު ބަޔާނުގައި ބުނީ އަންގާރަ ދުވަހުގެރޭ މ. ކުނޫޒް އަނބުރާ ޖުމްހޫރީ ޕާޓީއާ ޙަވާލުކޮށްފައިވީނަމަވެސް، ބާރު ކެނޑިފައިވާ ކޯޓު އަމުރެއްގެ ދަށުން ފުލުހުން މިހާރު އަންނަނީ އެ ޢިމާރާތަށް ވަންނަން މަސައްކަތް ކުރަމުން ކަމަށެވެ. އެހެންނަމަވެސް އެއް އަމުރެއްގެ ދަށުން އެއްފަހަރަށްވުރެ ގިނަ ފަހަރު އެތަނަށް ނުވަތަ ތަންތަނަށް ވަދެވޭނެނަަމަ އެކަން އެ ކޯޓު އަމުރުގައި ބަޔާންކޮށްފައި އޮންނަން ޖެހޭނެ ކަމުގައި ޖިނާޢީ އިޖްރާއަތުގެ ޤާނޫނުގެ 32 ވަނަ މާއްދާގެ 'ހ' (9) ގައި ބަޔާންކޮށްފައިވާކަން ފާހަގަކޮށް ޕާޓީތަކުން ބުނެފައިވަނީ ޖުމްހޫރީ ޕާޓީގެ އޮފީހުގެ މީހުން ވަނަނުދީ ހިފަހައްޓަމުންދަނީ ޤާނޫނާ ޚިލާފަށް ކަމަށާއި އެހެންކަމުން ފުލުހުން މިހާރުވަނީ ޖުމްހޫރީ ޕާޓީގެ އޮފީސް ހިސޯރުކޮށްފައި ކަމަށެވެ.
ޖުމްހޫރީ ޕާޓީގެ މައި އޮފީސް ފުލުހުން ހިސޯރުކޮށްފައިވާ ކަމަށް ބުނެ ޕާޓީތަކުން ވަނީ މި ވަގުތުގައި އެތަނުގައި އެއްޗެއް ޕްލާންޓްކުރުން ފަދަ ކަންކަން ހިނގާފާނެތީ ކަންބޮޑުވުން ފާޅުކޮށްފަ އެވެ.
އެ ބަޔާނުގައި ބުނެފައިވަނީ މި ދަނޑިވަޅުގައި ޖުމްހޫރީ ޕާޓީގެ އޮފީސް ބަލާ ފާސްކުރުމަށް އެ ޕާޓީގެ ސެކްރެޓަރީ ޖެނެެރެލް އަހުމަދު ސަމީރު ހުރަސް އަޅާ ކަމަށް ބުނެ ފުލުސް އޮފީހަށް ހާޒިރުވުމަށް އަންގާފައިވަނީ އެއްވެސް ހަމައެއް ނެތި، ސިޔާސީ ޕާޓީ ތަކުގެ ވެރިންނަށް ބިރުދެއްކުމަށާއި ސުލްޙަވެރި ސިޔާސީ ޙަރަކާތް ހިންގުމަށް ހުރަސް އެޅުމަށް ކަމަށެވެ.
ކުނޫޒުގައި މިވަގުތު ހިންގާ ސިޔާސީ ޙަރަކާތްތަކަކީ ރާއްޖޭގެ ހުރިހާ ސިޔާސީ ޕާޓީތައް ގުޅިގެން، ރާއްޖޭ ރައްޔިތުން ތާޢީދާއެކު ހިންގޭ ޙަރަކާތްތަކެއް ކަމަށާއި މިފަދަ ދަނޑިވަޅެއްގައި ވަކި ފަރާތެއްގެ މަޞްލަޙަތު ހިމާޔަތް ކުރުމަށް ކުރެވޭ ޣައިރު ޤާނޫނީ ކަންކަމުގައި ފުލުހުންގެ މުއައްސަސާއިން ހިއްސާވާތީ ކަންބޮޑުވާ ކަމަށް ބުނެ ބަޔާނުގައި ބުނެފައިވެ އެވެ.
"މިނިވަންކަމާއެކު ޞުލްޙަވެރި ސިޔާސީ ޙަރަކާތްތައް ހިންގުމުގެ ޙައްޤު ސިޔާސީ ޕާޓީތަކަށް ލިބިދީފައިވާހިނދު، ފުލުހުންގެ މިފަދަ ނޭއްގާނީ ޢަމަލުތަކުން ރައްޔިތުންގެ ހިތްތަކުގައި ފުުލުހުންގެ މުވައްސަސާއާމެދު ނަފްރަތު އުފެދިގެންދާނެއެވެ." ބަޔާނުގައި ބުނެފައިވެ އެވެ.
ޤާނޫނުގައިވާ ގޮތުގެ މަތިން ފުލުހުން ޢަމަލުކޮށް ޖުމްހޫރީ ޕާީޓީއާ އެ ޕާޓީގެ އިދާރީ ހިންގުމާއި ސިޔާސީ ޙަރަކާތްތައް ހިންގާ އޮފީސް ޙަވާުލުކުރުމަށް ޕާޓީތަކުން ވަނީ ފުލުހުންނަށް ގޮވާލާފަ އެވެ.
