އެމްޑީޕީ ގައުމީ މަޖިލިސް ޖަލްސާ - "ރައީސް ނަޝީދަށް ތާއީދުކުރައްވާ ބޭފުޅުން ޖަލްސާ ދޫކޮށްވަޑައިގެންނެވީ ހިތްހަމަޖެހިވަޑައިނުގެން"
ފައްޔާޒް ވަނީ އެމްޑީޕީގެ ރިޔާސީ ޓިކެޓް ދޭނެ ފަރާތެއް ހޮވުމަށް ބާއްވާ ޕްރައިމަރީގައި ކެނޑިޑޭޓުންނަށް ހަމަހަމަ ފުުރުސަތެއް ލިބިގެން ދާނެކަމަށް ފާހަގަކުރައްވާފަ
އެމްޑީޕީ ޤައުމީ މަޖިލީހުގެ ޖަލްސާ
އެމްޑީޕީގެ ރައީސް އަދި ރައްޔިތުންގެ މަޖިލިހުގެ ރައީސް މުހައްމަދު ނަޝީދު އަށް ތާއީދުކުރައްވާ ބޭފުޅުން ހޯމަ ދުވަހު ބޭއްވި ގައުމީ މަޖިލީހުގެ ޖަލްސާ ދޫކުރައްވާ ވަޑައިގަތީ ހިތްހަމަޖެހިވަޑައިނުގެން ކަމަށް، ރައީސް ނަޝީދަށް ތާއީދުކުރައްވާ މެންބަރުންގެ ތެރޭގައި ހިމެނިވަޑައިގަންނަވާ އެމްޑީޕީގެ ޕާލިމެންޓްރީ ގްރޫޕްގެ، މެދު ހެންވޭރު ދާއިރާގެ މެންބަރު އަލީ އާޒިމް ވިދާޅުވެއްޖެއެވެ.
ތާޖުއްދީން ސްކޫލްގައި ހޯމަ ދުވަހު ބޭއްވި ޤައުމީ މަޖިލީހުގެ ޖަލްސާގައި އޮތީ އެ ޕާޓީގެ ރިޔާސީ ޕްރައިމަރީއަށް ގައުމީ މަޖިލީހުން ފަސް މެންބަރުންގެ ކޮމިޓީ ހޮވުމުގެ މަސައްކަތެވެ. ޖަލްސާ ކުރިއަށް ދަނިކޮށް ވަކި ހިސާބަކުން ރައީސް ނަޝީދަށް ތާއީދުކުރައްވާ މެންބަރުން ވަނީ އެ ޖަލްސާ ދޫކުރައްވާ ނުކުމެވަޑައިގަންނަވާފައެވެ. "ރާއްޖެ އެމްވީ" އިން ދެންނެވި ސުވާލަކަށް ޖަވާބުދެއްވަމުން އާޒިމް ވަނީ ކުރިއަަށް އޮތް ޕްރައިމަރީއާމެދު އެމްޑީޕީގެ ލީޑަރޝިޕުން އަމަލުކުރަނީ ރަނގަޅަށް ނޫން ކަމަށާއި ހަމަހަމަކޮށް ކަންކަން ނުކުރާ ކަމަށް ވިދާޅުވެފައެވެ. އާޒިމް ވިދާޅުވީ ޕްރައިމަރީގައި ގައުމީ މަޖިލީހުން ނަގާ ކޮމިޓީގައި ރައީސް ނަޝީދަށް ތާއީދުކުރައްވާ ދެ ބޭފުޅަކާއި ރައީސް އިބްރާހިމް މުހައްމަދު ސާލިހަށް ތާއީދުކުރައްވާ ދެ ބޭފުޅަކު ހިމަނަން ހުށަހެޅުއްވި ކަމަށާއި އެކަން އެގޮތަށް ކުރަން ފުރުސަތު ނުދެއްވިކަމަށެވެ. އެކަމާއި ގުޅިގެން އުފެދުނު ޚިޔާލުތަފާތުވުންތަކަށް ފަހު ޖަލްސާގައި ތިއްބަވަން ރައީސް ނަޝީދަށް ތާއީދުކުރައްވާ މެންބަރުން ބޭނުން ނުވީ ކަމަށް ވެސް އޭނާ ވިދާޅުވިއެވެ.
އާޒިމް މިފަދައިން ވިދާޅުވެފައިވާ އިރު އެމްޑީޕީގެ ޗެއާޕަރސަން ފައްޔާޒް އިސްމާއިލް ވަނީ ޕްރައިމަރީގެ ހުރިހާ ކަމެއްވެސް ކުރިއަށް ގެންދަނީ ގަވާއިދާއި އުސޫލުތަކާއި އެއްގޮތަށް ކަމަށް ވިދާޅުވެފައެވެ. އަދި އެމަނިކުފާނު ޗެއަޕަރސަންކަމުގައި ހުންނަވަައިގެން އެމްޑީޕީގެ މުޅި ނިޒާމާ މެދު ސުވާލު އުފެއްދުމަށް ފުރުސަތު ނުދެއްވާނެ ކަަމަށް ވިދާޅުވިއެވެ. ފައްޔާޒް ވަނީ އެމްޑީޕީގެ ރިޔާސީ ޓިކެޓް ދޭނެ ފަރާތެއް ހޮވުމަށް ބާއްވާ ޕްރައިމަރީގައި ކެނޑިޑޭޓުންނަށް ހަމަހަމަ ފުުރުސަތެއް ލިބިގެން ދާނެކަމަށް ފާހަގަކުރައްވާފައެވެ.
އެމްޑީޕީގެ ހިންގާ ގަވާއިދުގެ ހަވަނަ މާއްދާގެ (ހ) ގެ ދަށުން އެކުލަވައިލި މި ކޮމިޓީއަށް ހޮވިފައިވަނީ އެ ޕާޓީގެ ޑެޕިއުޓީ ޗެއަރޕާސަން އިބްރާހިމް ވަހީދު (އިބުރޭ) އާއި ކުރީގެ ސެކްރެޓަރީ ޖެނެރަލް އަދި މިހާރު އެ ޕާޓީގެ ތަރުޖަމާނު އަނަސް އަބްދުއްސައްތާރު އާއި މަތި އުތުރު ޕްރޮވިންސްގެ ރައީސް އަކްރަމް ކަމާލުއްދީން އާއި އެ ޕާޓީގެ ޤާނޫނީ މަޖިލީހުގެ ކުރީގެ މެންބަރު އަހުމަދު އަބްދުﷲ އަފީފް އަދި ކެނދިކުޅުދޫ ދާއިރާގެ ރައީސް މުޙައްމަދު އީމާންއެވެ.
އަންނަ ޖެނުއަރީ މަހުގެ 28 ވަނަ ދުވަހު ބޭއްވުމަށް ހަމަޖެހިފައިވާ އެމްޑީޕީގެ ރިޔާސީ ޕްރައިމަރީގައި ވާދަކުރައްވަނީ ނަޝީދުގެ އިތުރުން ރައީސް އިބްރާހިމް މުހައްމަދު ސާލިހެވެ.
