ކްރިސްމަސް ފާހަގަ ކުރުމުން ގިނަ ބައެއްގެ ނުރުހުން ޞަލާޙު އަށް

ލިވަޕޫލަށް ކުޅެމުން އަންނަ މިޞްރުގެ ފޯވާޑް މުޙައްމަދު ޞަލާޙު އަށް ގިނަ ބައެއްގެ ނުރުހުން އަމާޒުވެއްޖެ އެވެ.

ޞަލާޙު އަށް ގިނަ ބަޔަނު ނުރުހުން ފާޅުކުރަމުން އަންނަނީ ކްރިސްމަސް ފާހަގަ ކުރުމުގެ ގޮތުން، ކްރިސްމަސް ގަހަކާއެކު އޭނާ ހިއްސާ ކުރި ފޮޓޯއެއްގެ ސަބަބުންނެވެ. އެ ފޮޓޯގައި ޞަލާޙުގެ އިތުރުން އޭނާގެ އަންހެންނުންނާއި، ދެ ދަރިން ވެސް ތިއްބެވެ. އެ ފޮޓޯ ހިއްސާކުރުމަށްފަހު ޞަލާޙު ވަނީ ކްރިސްމަސްގެ ތަޙުނިޔާ ކިޔައިފަ އެވެ. ޞަލާޙު އަކީ މުސްލިމު ކުޅުންތެރިޔެކެވެ. ފުޓުބޯޅަ އަށް ލޯބި ކުރާ ގިނަ ބައެއްގެ މެދުގައި ޞަލާޙު އަކީ މަޤުބޫލު ކުޅުންތެރިޔެކެވެ. މެޗުތަކުގައި ލަނޑު ޖެހުމަށްފަހު އުފާ ފާޅުކުރުމުގެ ގޮތުން ޞަލާޙު ޝުކުރުގެ ސަޖިދަ ޖަހާތީ، ގިނަ ބަޔަކު އޭނާ އަށް ތައުރީފު ވެސް ކުރެ އެވެ. ނަމަވެސް ކްރިސްމަސްގެ ފާހަގަ ކުރުމުން ގިނަ ބަޔަކު ވަނީ ސޯޝަލް މީޑިއާގައި ޞަލާޙު އަށް ނުރުހުން ފާޅުކޮށްފަ އެވެ.

ކްރިސްމަސް ފާހަގަ ކުރުމަކީ މުސްލުމިނުންނަށް ހުއްދަކަމެއް ނޫން ކަމަށް ބުނެ ގިނަ ބަޔަކު ބުނީ، ޞަލާޙު އެފަދަ ކަމެއްގައި ބައިވެރިވުމަކީ ލަދުވެތި ކަމެއް ކަމަށެވެ. ބައެއް ފަރާތްތަކުން ބުނީ ލިވަޕޫލަށް ސަޕޯޓުކުރަމުން އަންނަނީ ޞަލާޙުގެ ސަބަބުން ކަމަަށެވެ. ނަމަވެސް ޞަލާޙު ކްރިސްމަސް ފާހަގަ ކުރުމުން މިހާރު އެ ސަޕޯޓު ކުރަން ބޭނުންނުވާ ކަމަށާއި، ޞަލާޙު އަށް ވެސް ސަޕޯޓު ކުރަން ބޭނުންނުވާ ކަމަށެވެ. އެހެން މީހަކު ބުނީ އޭނާ އުފަންވީސުރެ ސަޕޯޓުކުރަމުން އަންނަނީ ލިވަޕޫލަށް ކަމަަށާއި، ނަމަވެސް ޞަލާޙުގެ އަމަލާ ގުޅިގެން މިހާރު ސަޕޯޓު ކުރަން ބޭނުންނުވާ ކަމަށެވެ. އަދި ޞަލާޙުގެ ސަޕޯޓަރެއްގެ ގޮތުގައި ހުންނަން ބޭނުންނުވާ ކަމަށެވެ.

މީގެ އިތުރުން އެހެން މީހަކު ބުނީ މިއަަދާ ހަމައަށް ވެސް ޞަލާޙު ދެކެމުން އައީ ނަމޫނާ މީހެއްގެ ގޮތުގައި ކަމަށެވެ. ޞަލާޙުގެ ސަބަބުން އޭނާ އަށް މީގެ ކުރިން އެތައް އުފަލެއް ލިބުނު ކަމަށާއި، ޞަލާޙު އަކީ ރޯލްމޮޑެލެއް ކަމަށެވެ. ނަމަވެސް މުސްލިމެއްގެ ގޮތުގައި ހުރެ ކްރިސްމަސް ފާހަގަ ކުރުމުން އެކަންކަން މިހާރު ދޫކޮށްލަން ބޭނުންވާ ކަމަށާއި، އެއްވެސް ވަރަކަށް ޞަލާޙު އަށް ސަޕޯޓިކުރަން ބޭނުންނުވާ ކަމަށެވެ. ޞަލާޙުގެ އެ އަމަލުގެ ސަބަބުން ވަރަށް ބޮޑަށް އުނދަގޫވި ކަމަށާއި، ސޯޝަލް މީޑިއާ އެކައުންޓުތަކުން ވެސް ޞަލާޙު އަށް ފޮލޯ ކުރުން ހުއްޓާލާާނެ ކަމަށް ވެސް ބުންޏެވެ.

މީގެ ކުރިން ވެސް ޞަލާޙު ވަނީ ކްރިސްމަސް ފާހަގަކޮށްފަ އެވެ. އެ ފަހަރު ވެސް ގިނަ ބަޔަކު ވަނީ ޞަލާޙު އަށް ފާޑުކިޔައިފަ އެވެ.