ބަޔާން މިއުނިކަށް ކުޅެމުން އަންނަ ފްރާންސްގެ ޑިފެންޑަރު ލޫކަސް ހެނާންޑޭޒް އަށް އައު އެއްބަސްވުމެއް ހުށަހަޅަން ތައްޔާރުކަމަށް އެ ކުލަބުން ބުނެފި އެވެ.

ސްޕެއިންގެ އެތުލެޓިކޯ މެޑްރިޑުން ސީނިއާ ކެރިއަރު ފެށި ހެނާންޑޭޒް ބަޔާނަށް ބަދަލުވީ 2019 ވަނަ އަހަރު އެވެ. ބަޔާނަށް ބަދަލުވެ، އެ ކުލަބާއެކު އޭނާ ހަދާފައިވާ އެއްބަސްވުމުގެ މުއްދަތު ހަމަވާނީ 2024 ވަނަ އަހަރު އެވެ. އޭރު ބަޔާނުން ހެނާންޑޭޒް ހޯދީ އެ ކުލަބުގެ އަދި ޖަރުަމަނު ލީގުގެ ވެސް ރެކޯޑު އަގަކަށެވެ. ބަޔާނަށް ބަދަލުވެ ހެނާންޑޭޒް އެކުލަބުގައި މޮޅު ކުޅުމެއް ދައްކާތީ، ކޯޗު ހޫލިއަން ނާގަލްސްމަން ވެސް ބޭނުންވަނީ ހެނާންޑޭޒް ކުލަބުގައި މަޑު ކުރުމަށެވެ. ހެނާންޑޭޒް ވަނީ ބަޔާނަށް ކުޅެދިން 107 މެޗުގައި ދެ ލަނޑު ޖަހާފަ އެވެ.

ހެނާންޑޭޒްއާ ގުޅޭ ގޮތުން ވާހަކަ ދައްކަމުން ބަޔާންގެ ޑިރެކްޓަރު ބުނީ، ހެނާންޑޭޒްގެ އެޖެންޓާއެކު ކުރިއަށްދާ މަޝްވަރާތައް ވަރަށް ރަނގަޅު ކަމަށާއި، ނަތީޖާ ވެސް ރަނގަޅުވާނެ ކަމަށެވެ. އޭނާ ބުނީ ހެނާންޑޭޒްގެ ހުރީ ބަޔާންގެ ސްޓައިލް ކަމަށާއި، އޭނާގެ ކުޅުމުން ވެސް އެކަން ފާހަގަވެގެންދާނެ ކަމަށެވެ. މީގެ އިތުރުން އޭނާ ބުނީ ހެނާންޑޭޒްގެ ކުރިމަގު އޮތީ ބަޔާންގައި ކަމަށާއި، އެކަމާމެދު އެއްވެސް ޝައްކެތް ނެތް ކަމަށެވެ. އަދި އަންނަ އަހަރު ހެނާންޑޭޒް އަށް އައު އެއްބަސްވުމެއް ހުށަހެޅުމަށް ބަޔާނުން ތައްޔާރު ކަމަށެވެ.

ހެނާންޑޭޒް އަންނަނީ ފްރާންސް ޤައުމީ ޓީމުގައި ވެސް ކުޅެމުންނެވެ. އޭނާ އަށް ފްރާންސް ޤައުމީ ޓީމު ޖާގަ ލިބުނީ 2018 ވަނަ އަހަރު އެވެ. އުމުރުން 26 އަހަރުގެ ޑިފެންޑަރު ވަނީ ފްރާންސްއާއެކު 2018 ވަނަ އަހަރުގެ ފީފާ ވޯލްޑް ކަޕް މުބާރާތް ކާމިޔާބުކޮށްފަ އެވެ. މީގެ އިތުރުން މިއަހަރު ޤަތަރުގައި އޮތް ފީފާ ވޯލްޑް ކަޕް މުބާރާތުގައި ވެސް އޭނާ ވަނީ ކުޅެފަ އެވެ. ހެނާންޑޭޒް ވަނީ ބަޔާނާއެކު ޖުމުލަ އަށް ތައްޓެއް ކާމިޔާބުކޮށްފަ އެވެ.