ލޯނު އެއްބަސްވުމެއްގެ ދަށުން އެތުލެޓިކޯ މެޑްރިޑަށް ކުޅެމުން އައި ބްރެޒިލްގެ ފޯވާޑް މަތެއުސް ކުންހާ ޕްރިމިއާ ލީގުގެ ވުލްވްސް އަށް ބަދަލުވެއްޖެ އެވެ.

އުމުރުން 23 އަހަރުގެ ފޯވާޑް އެ ކުލަބަށް ގުޅުނުކަން ވުލްވްސް އިން މިހާރު ވަނީ ރަސްމީކޮށް އިއުލާނު ވެސް ކޮށްފައެވެ. ކުންހާ ވުލްވްސް އަށް ގުޅުނީ ފަސް އަހަރު ދުވަހުގެ އެއްބަސްވުމެއްގެ ދަށުންނެވެ. އެ އެއްބަސްވުމުގެ މުއްދަތު ހަމަވާނީ 2027 ވަނަ އަހަރު އެވެ. ކުންހާ ވުލްވްސް އަށް ބަދަލުވީ ލޯނު އެއްބަސްވުމުގެ މުއްދަތު ހަމަވުމުން، ދާއިމީ އެއްބަސްވުމެއް އެކުލަވާލެވޭނެ ގޮތަށެވެ. ކުންހާ ހޯދުމަށް ވުލްވްސް އިން އެތުލެޓިކޯ އަށް 50 މިލިއަން ޔޫރޯ ދައްކާނެ އެވެ.

ވުލްވްސް އަށް ބަދަލުވުމަށްފަހު ވާހަކަދައްކަމުން ކުންހާ ބުނީ، ކުލަބަށް އައީ މާ ރަނގަޅު ހާލަތެއްގައި އޮވެގެން ނޫން ކަމަށެވެ. ކުރިއަށް އޮތް ދުވަސްތަކުގައި ގިނަ މަސައްކަތްތަކެއް ކުރަން ޖެހޭކަން ފާހަގަކުރަމުން ކުންހާ ބުނީ، ޓީމުގެ ކޯޗާއި ޓީމާމެދު އޭނާ އިތުބާރު ކުރާ ކަމަށެވެ. ކުންހާ ބުނީ ތީމުގައި ތިބި ކޮންމެ ކުޅުންތެރިޔަކާ އެކު ކޯޗު ކުރަން ޖެހޭ ވަރަށް ގިނަ ކަންކަން ހުރި ކަމަށެވެ. ޓީމުގެ ކުޅުންތެރިންނާމެދު ވާހަކަ ދައްކަމުން ކުންހާ ބުނީ، ވުލްވްސް ގައި ވެސް މޮޅެތި ކުޅުންތެރިން ތިބި ކަމަށެވެ. އަދި ހުރިހާ ފަރާތްތަކެއް އެކުގައި މަސައްކަތްކޮށް، ވުލްވްސް އޮންނަން ޖެހޭ ހިސާބަށް ގެންދެވޭނެ ކަމަށެވެ.

ކުންހާ އޭނާގެ ސީނިއާ ކެރިއަރު ފެށީ 2017 ވަނަ އަހަރު އެވެ. އޭގެ ފަހުން އޭނާ ވަނީ އާރްބީ ލައިޕްޒިގާއި، ހާތާ ބީއެސްސީ އަދި އެތުލެޓިކޯ އަށް ކުޅެފަ އެވެ. ކުންހާ ވަނީ އެތުލެޓިކޯ އަށް ކުޅެދިން 54 މެޗުގައި ހަތް ލަނޑު ޖަހާފަ އެވެ.