އާރަށު ހިޔާނާތް: ޖޫރިމަނާއަކީ މުއްސަނދިންނަށް ޖަލު ޙުކުމުން މިންޖުވެވެން އޮތް މަގަކަށް ވެގެން ނުވާނެ
ޖޫރިމަނާ ފަދަ އަދަބަަކަށް ބަދަލު ކޮށްދެއްވުމަށްވެސް ވަކީލު އެދިލައްވާފައިވޭ
ވ އާރަށު ހިޔާނާތުގެ މައްސަލައިގެ ޙުކުމް ކުރެއްވުމުގެ އަޑުއެހުން
ޖޫރިމަނާއަކީ މުއްސަނދިންނަށް ޖަލު ޙުކުން ނުވަތަ އެފަދަ އަދަބުތަކުން މިންޖުވުމަށް އޮންނަ މަގަކަށް ވެގެން ނުވާނެކަމަށް ޕްރޮސެކިއުޓަރ ޖެނެރަލް އޮފީހުން ބުނެފިއެވެ.
ޤާނޫނުލްއުޤޫބާތާ ޙަވާލާދީ ދައުލަތުގެ ވަކީލުން އެހެން ވިދާޅުވީ ވ އާރަށު ހިޔާނާތުގެ މައްސަލައިގައި ޙުކުމް ކުރުމަށް އާދިއްތަ ދުވަހު ބޭއްވި އަޑުއެހުމުގައި އަދަބާ ގުޅޭގޮތުން ދިފާއީ ވަކީލު ދެއްކެވި ވާހަކައަށް ރައްދު ދެއްވަމުންނެވެ.
އެ އަޑުއެހުމުގައި ރައީސް އަބްދުﷲ ޔާމީނަށް ދެއްވި ފުރުސަތަށްފަހު މި މައްސަލައިގައި ދައުވާލިބޭ ޔޫސުފް ނައީމްގެ ވަކީލު ވަނީ އަދަބާ ގުޅޭގޮތުން ވާހަަކަ ދައްކަވާފައެވެ.
އެގޮތުން ޔޫސުފް ނައީމަކީ މީގެ ކުރިން އެފަދަ އެއްވެސް މައްސަލައެއްގައި އަދި ޖިނާއީ ކުށެއްގައިވެސް ތުހުމަތެއް ރައްދުވެފައިވާ ފަރާތެއް ނޫންކަން ފާހަގަ ކުރައްވައި އޭނާގެ ވަކީލު ވަނީ، އޭނާގެ އަދަބުގެ ދަރަޖަ ދަށް ކޮށްދިނުމަށް އެދިލައްވާފައެވެ.
ޔޫސުފް ނައީމަކީ 1993 ވަނަ އަހަރުން ފެށިގެން، ޓޫރިޒަމް ސިނާއަތުގައި މަސައްކަތް ކޮށްފައިވާ ފަރާތެއް ކަމަށާއި، އަދި 2004 ވަނަ އަހަރު، މިހާރު އަމަލު މި ކުރާ ޤާނޫނޫ އަސާސީ އެކުލަވާލި ޚާއްސަ މަޖިލީހުގެ މެންބަރެއްކަމަށް ވަކީލު ވިދާޅުވިއެވެ.
ޔޫސުފް ނައީމްގެ ސިއްޙީ ޙާލަތަށް އަލިއަޅުވާލައްވައި އޭނާގެ ވަކީލު ވަނީ ޔޫސުފް ނައީމްގެ ޖަލު އަދަބުގެ އެއް ބައި ގޭބަންދަށް ބަދަލު ކުރައްވައި، މަސްހުނި އަދަބެއް ދެއްވުމަށް އެދިލައްވާފައެވެ.
ގޭބަންދުގެ އިތުރުން، މަސްހުނިކޮށް އަދަބު ކަނޑައަޅުއްވާއިރު، ޖޫރިމަނާ ފަދަ އަދަބަަކަށް ބަދަލު ކޮށްދެއްވުމަށްވެސް ވަކީލު އެދިލައްވާފައިވެއެވެ. އެގޮތުން އާމްދަނީއަށް އަސަރު ކުރި ނަމަވެސް، ޔޫސުފް ނައީމަކީ އަދަބަކާއި ގުޅިގެން އެ ދޭންޖެހޭ ޖޫރިމަނާއެއް ދެއްކުމުގެ ޤާބިލުކަން ހުރި ފަރާތެއްކަމަށް ވަކީލު ވިދާޅުވިއެވެ.
އެ ވާހަކަތަކަށް ރައްދު ދެއްވައި ދައުލަތުގެ ވަކީލު ވިދާޅުވީ، ޔޫސުފް ނައީމަކީ ރާއްޖޭގެ ޤާނޫނު އަސާސީ އެކުލަވާލެއްވުމުގައިވެސް އުޅުއްވި ފަރާތެއްކަމަށް ދިފާއުން ބުނާއިރު، އެ ތަޖުރިބާގެ އަލީގައި އާންމު ފަރުދަކަށްވުރެ ބޮޑަށް، އެކަހަލަ ކަންކަން ނުކުރުމަށް އޭނާ އިތުރަށް ސަމާލުކަން ދޭންޖެހޭނެ ކަމަށެވެ.
ދައުލަތުން ދެކޭ ގޮތުގައި އެއީ އަދަބު މަތިވެސް ކުރެވިދާނެ ފަދަ ޙާލަތެކެވެ.
ދައުލަތުން ދެކޭ ގޮތުގައި، ޖޫރިމަނާގެ އަދަބަކީ މުއްސަނދިންނަށް ޖޫރިމަނާ ދެއްކުމަށްފަހު އަދަބުން ސަލާމަތްވުމަށް އޮތް މަގަކަށްވެގެން ނުވާނެއެވެ. އެގޮތުން ޤާނޫނުލްއުޤޫބާތުގައި ވެސް އެކަން ބަޔާންކޮށްފައިވާކަން ވަކީލު ފާހަގަ ކުރެއްވިއެވެ.
އަދަބާ ގުޅޭގޮތުން ދެފަރާތުން ދެއްކި ވާހަކަތަކަށް ބައްލަވައި އިސްގާޒީ އަހުމަދު ޝަކީލު ވަނީ އޭނާއަށް ކުރާ ދައުވާގެ އަދަބު ދަށްވާނެ އަދި މަތިވާނެ ޙާލަތެއްވެސް ނެތްކަން ފާހަގަ ކުރައްވައި، މި ކުށް ކޮށްފައިވާ ގޮތާއި، މިއީ ދުރާލާ ރާވައިގެން ކޮށްފައިވާ ކުށަކަށްވާތީ، އޭނާގެ މައްޗަށް 3 އަހަރާއި، 2 މަހާއި 12 ދުވަހުގެ ޖަލު ޙުކުމެއް އިއްވަވާފައެވެ.
މި މައްސަލައިގައި ޔޫސުފް ނައީމްގެ އަތުން ރިޝްވަތު ނަގައި، އެ ފައިސާ ލޯންޑަރ ކޮށްފައިވާތީ ޔާމީނުގެ މައްޗަށް ވަނީ 11 އަހަރުގެ ޖަލު ޙުކުމެއް އިއްވައި، 5 މިލިއަން ޑޮލަރުން ޖޫރިމަނާކޮށްފައެވެ.
