ރައީސްގެ އިރުޝާދާއެކު ދާންދޫގައި ހައުސިންގ ޕްރޮގްރާމެއް ހިންގާނަން - އަސްލަމް

ސަރުކާރުން ދާންދޫގައި ހިއްކި 25 ހެކްޓަރުގެ ބިމުގައި ހައުސިންގ ޕްރޮގްރާމެއް ހިންގާނެކަމަށް ޕްލޭނިންގ މިނިސްޓަރ މުހައްމަދު އަސްލަމް ވިދާޅުވެއްޖެއެވެ.

ސަރުކާރުން ދާންދޫގައި ހިއްކި 25 ހެކްޓަރުގެ ބިން ކައުންސިލާއި ހަވާލުކުރުމުގެ ރަސްމިއްޔާތުގައި ވާހަކަ ދައްކަވަމުން ޕްލޭނިންގ މިނިސްޓަރ މުހައްމަދު އަސްލަމް ވިދާޅުވީ ސަރުކާރުން ހިއްކި ދާންދޫގެ 80 އިންސައްތަ ބިން ރަނގަޅު ގޮތުގައި ޕްލޭން ކުރައްވާނެކަމުގެ ޔަގީންކަން އެބައޮތް ކަމަށެވެ.

Advertisement

އަދި ކޮންމެ ގޮތަކަށް ޕްލޭން ކުރެއްވި ނަމަވެސް އެންމެ ބޮޑު އެއް ބޭނުމަކަށް އޮންނާނީ ރައްޔިތުންނަށް ގޯތި ދިނުމާއި ބޯހިޔާވަހިކަން ހޯދައިދެއްވުން ކަމަށެވެ. އޭގެ ތެރޭގައި ގޯތި ވެސް ދެވޭނެކަމަށާއި، ސަރުކާރުން ހިއްކި ބިމުގައި މަދުވެގެން 700 ގޯތި ދެވޭނެ ކަމަށެވެ. އެއީ ދާންދޫގެ ރައްޔިތުންނަށް ލިބިގެންދާނެ ވަރަށް ބޮޑު ހިތްހަމަޖެހުމެއް ކަމަށެވެ.

މިނިސްޓަރ އަސްލަމް ވިދާޅުވީ ރައީސް އިރުޝާދު ދެއްވާފައިވަނީ ސަރުކާރުން ހިންގާ ހައުސިންގ ޕްރޮޖެކްޓްތަކުގެ ތެރެއިން ދާންދޫގައި ހައުސިން ޕްރޮޖެކްޓް ކުރިއަށް ގެންދިއުމަށް ކަމަށެވެ.

މިނިސްޓަރ އަސްލަމް ވިދާޅުވީ މި ހިނގާ ރިޔާސި ދައުރުގެ ތެރޭގައި މުޅި ރާއްޖޭގައި ބައިވަރު ކަންކަން ކުރަމުން ގެންދަވާ ކަމަށެވެ. އަސްލަމް ވިދާޅުވީ ބޮޑު މަޝްރޫއެއް ނުހިނގާ އެންމެ ރަށެއްވެސް ރާއްޖޭގައި ނޯންނާނެ ކަމަށާއި، ފެނާއި ނަރުދަމާ، ފުޓްބޯޅަ، ފުޓްސަލް، ބިން ހިއްކުން އަދި ބަނދަރު ފަދަ ކޮންމެވެސް މަސައްކަތެއް ނުހިނގާ އެއްވެސް ރަށެއް ނޯންނާނެ ކަަމަށެވެ.

މި މަސައްކަތް ކުރިއަށް ގެންދެވީ ކޮވިޑްގެ ތެރޭގައި ކަމަށާއި، ރައީސް އެއިރު ނިންމެވި އެންމެ މުހިންމު އެއް ނިންމެވުމަކީ ތަރައްގީގެ އެއްވެސް މަޝްރޫއެއް ހުއްޓާނުލާ ކުރިއަށް ގެންދެވުން ކަމަށެވެ. ބައެއް ގައުމުތަކުގައި ކަންކަން ވެގެންދިޔައީ އެހެން ނޫން ކަމަށާއި، އެ ގައުމުތަކުގައި ހުރިހާ ކަމެއް ހުއްޓާލާ މުޅި ގައުމު ހުއްޓުވުމަކަށް ގެނައި ކަމަށެވެ. އަދި އެގޮތަށް ހެދި ގައުމުތައް ބަނގުރޫޓް ވެގެންދިޔަ ކަމަށެވެ. ރާއްޖެއިން ތަރައްގީގެ މަޝްރޫއުތައް ހުއްޓާނުލާ ކުރިއަށް ގެންދިއުމަކީ ހިކުމަތްތެރިކަމުގެ އަމަލެއް ކަމަށް މިނިސްޓަރ ވިދާޅުވިއެވެ.