"އަންހެން ދަރިވަރުންނަށް އިލްމުގެ ދޮރު ބަންދުކުރުމަކީ މުޖުތަމައު ވާގިނެތިކޮށްލުން"

ގަދަ ބާރުން އަފްޣާނިސްތާނުގެ ކޮންޓްރޯލް ނަގައިގެން އުޅޭ ހަތިޔާރުއެޅި ހަނގުރާމަވެރި ތާލިބާން ޖަމާއަތުން ޑިސެމްބަރު 20 ވަނަ ދުވަހު ނިންމި ނިންމުމަކީ، އަންހެން ދަރިވަރުންނަށް އަފްޣާނިސްތާނުގެ ޔުނިވަރސިޓީތައް ބަންދުކުރުމަށް ނިންމި ނިންމުމެވެ. މަތީ ތައުލީމު ހާސިލުކުރުމުގެ ހުރިހާ ދޮރެއް އަންހެން ދަރިވަރުންނަށް ބަންދުކުރުމަށް ނިންމި ނިންމުމެވެ. ސަރުކާރުން ހިންގާ ޕަބްލިކް ޔުނިވަރސިޓީތަކުގެ އިތުރުން، ޕްރައިވެޓް ޔުނިވަރސިޓީތަކަށްވެސް އެކަން ތަންފީޒުކުރުމަށް މަޖުބޫރުކުރިއެވެ.

މި ފަހަރުގެ ވެރިކަން ތަފާތުވާނެ ކަމަށް ވައުދުވަމުން އަފްޣާނިސްތާނުގެ ކޮންޓްރޯލް ނެގި ތާލިބާނުންގެ މި ނިންމުމަށް ބައިނަލްއަގުވާމީ ފެންވަރުގައި ބޮޑެތި ފާޑުކިއުންތަކެއް ވަނީ އަމާޒުވެފައެވެ. އދ.ން މިކަން ކުށްވެރިކޮށްފައިވާއިރު، އެމެރިކާއިން ވަނީ ތާލިބާނުން ޖަވާބުދާރީކުރެވޭނެ ގޮތްތައް ބަލަމުން ދާ ކަމަށް ބުނެފައެވެ.

އަފްޣާނިސްތާނުގައި އަމިއްލަ ސަރުކާރުން ހިންގަމުންދާ ތާލިބާނުންގެ ނިންމުމުގެ ސަބަބުން ސީދާ ގޮތުން އެންމެ ފުން އަސަރެއް ކުރުވި ބަޔަކީ އަފްޣާނިސްތާނުގެ އަންހެން ދަރިވަރުންނެވެ.

އެތައް ދަރިވަރުންނެއް، މުސްތަގުބަލަށް ކުރި ފޮނި އުއްމީދުތައް މިއަދު ވަނީ ވިއްސި ވިހާލިވެފައެވެ. ކަރުނަ އެޅުން ނޫން ގޮތެއް ނެތެވެ.

އަންހެން ދަރިވަރުންގެ މަތީ ތައުލީމަށް ތާލިބާނުން ހުރަސް އެޅި އެޅުމާއެކު، ބައިނަލްއަގުވާމީ މައިދާނުގައި އިތުބާރު ހޯދުމަށް އެ ޖަމާއަތުން ކުރާ މަސައްކަތަކަށް ހިޔަނި އެޅިގެން ދާނެ ކަމަށް ބެލެވެއެވެ.

ތާލިބާނުންނާ ދެކޮޅަށް ބައިނަލްއަގުވާމީ ފެންވަރުގައި ތަންފީޒުކުރަމުންދާ ދަތި ކުރުމުގެ ފިޔަވަޅުތަކަށް ލުއި ލިބުމުގެ ފުރުސަތު ހައްތަހާ ނާދިރުވީއެވެ.