މިނިސްޓްރީ ގެ ދޮރުމަތީގައި ބޮމެއް ގޮއްވާލައިގެން ޠާލިބާން ސަރުކާރުގެ ރެފިއުޖީންނާ ބެހޭ މިނިސްޓަރު ޚަލީލް ޙައްޤާނީ އަވަހާރަ ކޮށްލައިފިއެވެ.

މިއީ 2021 ގައި އަފްޣާނިސްތާނުގައި ޠާލިބާނުން ވެރިކަމަށް އައި ފަހުން އެންމެ އިސް މަޤާމެއްގައި ހުރި މީހަކު އަވަހާރަކޮށްލި ފުރަތަމަ ފަހަރެވެ. 

އަފްޣާނިސްތާނުގެ ދާޚިލީ ކަންކަމާ ބެހޭ މިނިސްޓްރީން ބުނި ގޮތުގައި، ޙައްޤާނީ އަވަހާރަ ކޮށްލީ އޭނާގެ އޮފީހުން ނުކުންނެވި ވަގުތު އެއްޗެއް ގޮއްވާލައިގެންނެވެ.

މި ހާދިސާގައި އިތުރު 6 މީހުން މަރުވެފައިވެއެވެ. 

ޚަލީލް ޙައްޤާނީ އަކީ ޠާލިބާނުގެ ތެރޭގައި ނުފޫޒު ގަދަ ޙައްޤާނީ ނެޓްވޯކްގެ އިސް މެންބަރެކެވެ. އެމެރިކާ އިން އޭނާ ވަނީ ބައިނަލްއަޤްވާމީ ޓެރަރިސްޓެއްގެ ގޮތުގައި ކަނޑައަޅާ އޭނާ އާ ބެހޭ މައުލޫމާތު ދިން ފަރާތަކަށް 5 މިލިއަން ޑޮލަރު ކަނޑައަޅާފައެވެ. 

އިސްލާމިކް ސްޓޭޓް ގްރޫޕް (އައިއެސް) އިން ވަނީ މި ހަމަލާގެ ޒިންމާ ނަގާފައެވެ. 

އައިއެސްގެ "ނިއުސް އޭޖެންސީ" އަމާގުން ނެރުނު ބަޔާނެއްގައި ބުނެފައިވާ ގޮތުގައި، އައިއެސްގެ ހަނގުރާމަވެރިއަކު މިނިސްޓަރުގެ އޮފީހުގެ ބޭރުގައި މަޑުކޮށްގެން ހުރެ، އޭނާ ނުކުންނެވި ވަގުތު އެއްޗެއް ގޮއްވާލީއެވެ. 

ރޮއިޓަރސް ނިއުސް އޭޖެންސީން ބުނި ގޮތުގައި، ޠާލިބާނުގެ ތަރުޖަމާނެއް ވަނީ ޙައްޤާނީ އަވަހާރަވީ އައިއެސްގެ ހަމަލާއެއްގައިކަން ކަށަވަރުކޮށްދީފައެވެ. 

ޚަލީލް ޙައްޤާނީގެ އަޚު ޖަލާލުއްދީނަކީ 1980 ގެ އަހަރުތަކުގައި އަފްޣާނިސްތާނުގައި ސޯވިއެޓް ސިފައިންނާ ދެކޮޅަށް ހަނގުރާމަކުރި މަޝްހޫރު ގެރިއްލާ ލީޑަރެކެވެ. އަދި ޠާލިބާނުގެ 20 އަހަރުގެ ހަނގުރާމައިގައި ގިނަ ހަމަލާތަކެއް ދިން ޙައްޤާނީ ނެޓްވޯކް އުފެއްދީ ވެސް އޭނާއެވެ. 

އަވަހާރަކޮށްލި މިނިސްޓަރުގެ ބޭބެ ޖަލާލުއްދީނުގެ ދަރިފުޅު ސިރާޖުއްދީން ޙައްޤާނީއަކީ މިހާރުގެ ޠާލިބާން ސަރުކާރުގެ އެތެރޭގެ ކަންކަމާ ބެހޭ މިނިސްޓަރެވެ. 

2021 ގައި އަފްޣާނިސްތާނުގައ ތިބި ބޭރުގެ ސިފައިން އެ ގައުމުން ފައިބައިގެން ދިޔުމާއެކު ޠާލިބާނުންގެ ފުރިހަމަ ބާރު އެ ގައުމުގައި ހިންގަން ފެށިފަހުން އާންމު ސަލާމަތީ ހާލަތު ރަނގަޅުވެފައިވީ ނަމަވެސް، ތަންތަން ގޮއްވުމާއި ފިދާއީ ހަމަލާ ތައް އެ ޤައުމުގައި އަދިވެސް ދޭތެރެ ދޭތެރެއިން ހިނގަމުން އަންނަކަން ފާހަގަ ކުރެވެއެވެ. 

މި ހަމަލާތަކުގެ ތެރެއިން ގިނަ ހަމަލާތަކުގެ ޒިންމާ ނަގަމުން އަންނަނީ އިސްލާމިކް ސްޓޭޓް ޚުރާސާން ޕްރޮވިންސް ނުވަތަ އައިއެސްކޭޕީއިންނެވެ.