އާޖެންޓީނާގެ ފައިސާގެ ނޫޓުގައި އެ ޤައުމުގެ ފުޓުބޯޅަ ޓީމުގެ ކެޕްޓަން ލިއޮނަލް މެސީގެ ފޮޓޯ ޖެހުމަށް ސެންޓްރަލް ބޭންކުން މަޝްވަރާ ކުރުމަށް ފަށައިފި އެވެ.
ރިޕޯޓުތައް ބުނާ ގޮތުގައި މިއީ އާޖެންޓީނާއާއެކު މެސީ، މިއަހަރުފެ ފީފާ ވޯލްޑް ކަޕް މުބާރާތް ކާމިޔާބު ކުރުމާއެކު ސެންޓްރަލް ބޭންކުން ފާޅު ކުރި ޝައުޤުވެރި ކަމެކެވެ. މިއަހަރުގެ ވޯލްޑް ކަޕް މުބާރާތް އާޖެންޓީނާ އިން ކާމިޔާބު ކުރުމުން އެކަމުގެ އުފާ ފާޅު ކުރުމަށް އެ ޤައުމުގައި އަންނަނީ ގިނަ ހަރަކާތްތަކެއް ވެސް ބާއްވަމުންނެވެ. 36 އަހަރު ފަހުން ވޯލްޑް ކަޕް އާޖެންޓީނާ އިން ކާމިޔާބު ކުރުން އެންމެ ޚާއްސަވާ ކުޅުންތެރިޔަކީ ވެސް މެސީ އެވެ.
އާޖެންޓީނާގައި ބޭނުން ކުރަމުން އަންނަ ފައިސާގެ ނަމަކީ ޕެސޯ އެވެ. މީޑިއާ ތަކުގައި ރިޕޯޓުކޮށްފައިވާ ގޮތުން އާޖެންޓީނާގެ ސެންޓްރަލް ބޭންކުން ބޭނުންވަނީ ޕެސޯގެ 1000 އަދަދުގެ ނޫޓުގައި މެސީގެ ފޮޓޯ ޖެހުމަށެވެ. އެ އަދަދަކީ މެސީގެ ޖާޒީ ނަންބަރާ ގުޅުވައިގެން ޖެހުމަށް ބޭނުންވާ އަދަދެއް ކަމަށް ވެސް ރިޕޯޓުތައް ބުނެ އެވެ. އެ ނޫޓުގައި މެސީގެ ފޮޓޯގެ އިތުރުން މުޅި ޓީމުގެ ފޮޓޯ ވެސް ޖެހުމަށް ވަނީ ނިންމާފަ އެވެ.
މީގެ ކުރިން ވެސް އާޖެންޓީނާ އިން ވަނީ އެ ޤައުމުގެ ފުޓުބޯޅަ ޓީމާއި ގުޅުވައިގެން ފައިސާގެ ނޫޓެއް ނެރެފަ އެވެ. އެއީ އަމިއްލަ ޤައުމުގައި 1978 ވަނަ އަހަރު މުބާރާތް ބާއްވައިގެން އާޖެންޓީނާ އިން ވޯލްޑް ކަޕް ކާމިޔާބު ކުރުމުންނެވެ.
ވޯލްޑް ކަޕް ކާމިޔާބު ކުރުމުގެ އިތުރުން މިއަހަރުގ މުބާރާތުގައި މެސީ ވަނީ މޮޅު ކުޅުންތެރިޔާގެ މަގާމު ވެސް ހޯދާފަ އެވެ. މުބާރާތުގައި މެސީ ވަނީ ގިނަ ރެކޯޑުތަަކެއް ވެސް ހަދާފަ އެވެ. އެއީ ވޯލްޑް ކަޕް މުބާރާތުގެ މޮޅު ކުޅުންތެރިޔާކަން ދެ މުބާރާތެއްގެ ހޯދި ފުރަތަމަ ކުޅުންތެރިޔާ އާއި، ވޯލްޑް ކަޕްގައި އެންމެ ގިނަ މެޗު ކުޅުނު ކުޅުންތެރިޔާ އާއި، ވޯލްޑް ކަޕްގެ އެއް މުބާރާތެއްގައި އެންމެ ގިނަ މެޗުގެ މޮޅު ކުޅުންތެރިޔާ ހޯދުމާއި އަދި ވޯލްޑް ކަޕްގެ ހުރިހާ ބުރެއްގައި ލަނޑު ޖެހި ފުރަތަމަ ކުޅުންތެރިޔާގެ ރެކޯޑެވެ.
