މެސީއާއެކު ޕީއެސްޖީ އަށް އަނގަބަހުން އެއްބަސްވުމަކަށް އާދެވިއްޖެ

ފްރާންސްގެ ޕެރިސް ސެއިންޓް ޖާމަން (ޕީއެސްޖީ) އަށް ކުޅެމުން އަންނަ އާޖެންޓީނާގެ ކެޕްޓަން ލިއޮނަލް މެސީއާއެކު އެ ކުލަބަށް އަނގަ ބަހުން އެއްބަސްވުމަކަށް އާދެވިއްޖެ ކަމަށް މީޑިއާ ރިޕޯޓުތައް ބުނެފިއެވެ.

މެސީ ބާސެލޯނާ ދޫކޮށް ޕީއެސްޖީ އަށް ބަދަލުވީ 2021 ވަނަ އަހަރު އެވެ. އޭނާ އެ ކުލަބަށް ސޮއި ކުރީ ދެ އަހަރު ދުވަހުގެ އެއްބަސްވުމެއްގެ ދަށުންނެވެ. އެ އެއްބަސްވުމުގެ މުއްދަތު ހަމަވާނީ އަންނަ އަހަރުއެވެ. ޕީއެސްޖީން ބޭނުންވަނީ މެސީ އެ ކުލަބުގައި މަޑުކުރުމަށެވެ. އެހެންކަމުން މިއަހަރުގެ ވޯލްޑް ކަޕް މުބާރާތް ނިމުމާއެކު މެސީއާ އެ މަޝްވަރާތައް ކުރުމަށް ޕީއެސްޖީން އޮތީ ތައްޔާރަށެވެ. މިއަހަރުގެ ވޯލްޑް ކަޕް މެސީ ވަނީ އާޖެންޓީނާއާއެކު އުފުލާލާފައެވެ. އެއާއެކު ޕީއެސްޖީގެ ރައީސް ވަނީ ޤަތަރުގައި ފައިނަލް މެޗަށްފަހު މެސީއާ ބައްދަލު ވެސް ކޮށްފައެވެ.

ރިޕޯޓުތައް ބުނާ ގޮތުން ޕީއެސްޖީ އަށް މިހާރު ވަނީ އެއްބަސްވުމުގެ މުއްދަތު އިތުރު ކުރުމާ ގުޅޭ ގޮތުން މެސީއާއެކު އަނގަބަހުން އެއްބަސްވުމަކަށް އާދެވިފައެވެ. ނަމަވެސް އެއްބަސްވުން އައު ކުރަނީ ކިހާ މުއްދަތަކަށްކަމެއް އަދި މެސީގެ މުސާރައަށް އަންނާނެ ބަދަލެއް ނިންމާފައި ނުވާއިރު، އެ ނިންމުން ނިންމާނީ ވަރަށް އަވަހަށް ދެން އޮންނަ ބައްދަލުވުމެއްގައި ކަމަށް ވެސް ރިޕޯޓުތައް ބުނެއެވެ. ޕީއެސްޖީން މިހާރު އަންނަނީ އެކަމާ ގުޅިގެން ކުރަން ޖެހޭ އެހެނިހެން ކަންކަން ކުރަމުން ކަމަށް ވެސް ރިޕޯޓުތައް ބުނެއެވެ.

ޕީއެސްޖީން މެސީއާއެކު އަނގަ ބަހުން އެއްބަސްވުމަކަށް އައިސްފައިވާއިރު، އޭނާގެ ކުރީގެ ކުލަބު ބާސެލޯނާ އިން ވެސް މެސީ އަލުން ގެންނަން ބޭނުންވާ ކަމަށް ރިޕޯޓުތައް ވަނީ ބުނެފައެވެ. އަދި ބާސެލޯނާ އިން އެކަމަށް މަސައްކަތް ކުރަމުން އަންނަ ކަމަށް ވެސް ރިޕޯޓުކޮށްފައިވެއެވެ.