ޗެލްސީގެ ޓެކްނިކަލް ޑިރެކްޓަރަކަށް ވިވެލް ހަމަޖައްސައިފި

ޗެލްސީގެ އައު ޓެކްނިކަލް ޑިރެކްޓަރުގެ މަގާމަށް ކްރިސްޓޮފާ ވިވެލް ހަމަޖައްސައިފިއެވެ.

ވިވެލް އަކީ އެ ޗެލްސީގެ އޯނަރު ޓޮޑް ބޮހްލީ ކުލަބާ ހަވާލުވެ އެ މަގާމަށް ގެންނަން ބޭނުންވި މީހެކެވެ. އެ މަގާމަށް ވިވެލް ހަމަޖެއްސުމާއެކު އޭނާ ބުނީ، ދުނިޔޭގެ ފުޓުބޯޅައިގައި އެންމެ ރީތި އަދި ކާމިޔާބާ ހަމަ އަށް ވާސިލްވެވޭނެ ޕްރޮޖެކްޓެއް ހިންގަމުން އަންނަނީ ޗެލްސީގައި ކަމަށެވެ. އޭނާ ބުނީ ޗެލްސީ ކަހަލަ ގަދަ ބާރަކާ ގުޅުމަކީ ލިބޭ ވަރަށް ބޮޑު އުފަލަކާއި ޝަރަފެއް ކަމަށެވެ. ވިވެލް ބުނީ އޭނާއާއެކު ޗެލްސީން ދާން ބޭނުންވާ މިސްރާބަށް ދެވޭނެ ކަމުގެ ޔަޤީންކަން ކުލަބުގެ ވެރިންނާއި، އަދި އެންމެހައި ސަޕޯޓަރުންނަށް ވެސް ދޭން ބޭނުންވާ ކަމަށެވެ.

ޖަރުމަނަށް އުފަން އުމުރުން 35 އަހަރުގެ ވިވެލް ވަނީ މީގެ ކުރިން އާރްބީ ލައިޕްޒިގްގައި މަސައްކަތްކޮށްފައެވެ. އެގޮތުން އެ ޓީމުގެ ހެޑް އޮފް ސްކައުޓިން، ޓެކްނިކަލް ޑިރެކްޓަރު އަދި ސްޕޯޓިން ޑިރެކްޓަރު ކަން ވެސް އޭނާ ވަނީ އަދާކޮށްފައެވެ. ލައިޕްޒިގްގެ ކުރިން ހޮފެންހަމްގައި ވެސް ވިވެލް ވަނީ މަސައްކަތްކޮށްފައެވެ.

ވިވެލް ޓެކްނިކަލް ޑިރެކްޓަރުގެ މާގަމަށް ޗެލްސީން ހަމަޖައްސާފައި ވަނީ އެތައް ދުވަހެއްގެ މަސައްކަތުންނެވެ. މީޑިއާ ރިޕޯޓުތައް ބުނާ ގޮތުން ޗެލްސީން އަންނަނީ ކުރިއަށް އޮތް ޓްރާންސްފާ ބާޒާރުގައި ޓީމަށް އިތުރު ކުޅުންތެރިން ހޯދުމުގެ މަސައްކަތް ވެސް ކުރަމުންނެވެ. އެކަމުގެ މަޝްވަރާތައް މިހާރު އަންނަނީ ކޯޗު ގްރަހަމް ޕޮޓާއާ ކުރަމުން ކަމަށާއި، ކުޅުންތެރިން ހޯދުމުގައި ޕޮޓާގެ ލަފާ ވަރަށް ބޮޑަށް ހޯދާނެ ކަމަށް ވެސް ރިޕޯޓުތައް ބުނެ އެވެ.