ފީފާ ވޯލްޑް ކަޕް ކާމިޔާބު ނުކުރެވޭނެ ހާލަތެއް މެދުވެރިވި ނަމަވެސް އާޖެންޓީނާގެ ކެޕްޓަން ލިއޮނަލް މެސީ އަކީ އެންމެ މޮޅު ކުޅުންތެރިޔާކަމަށް މެންޗެސްޓަރ ސިޓީގެ ކޯޗު ޕެޕް ގާޑިއޯލާ ބުނެފިއެވެ.

ގާޑިއޯލާ މިހެން ބުނީ މިއަހަރުގެ ވޯލްޑް ކަޕް މުބާރާތް އާޖެންޓީނާ އަދި މެސީ ކާމިޔާބު ކުރުމާ ގުޅޭ ގޮތުން ވާހަކަ ދައްކަމުންނެވެ. ގާޑިއޯލާ ބުނީ ކޮންމެ މީހަކަށް ވެސް އެމީހެއްގެ އަމިއްލަ ޚިޔާލު ފާޅު ކުރެވޭނެ ކަމަށެވެ. ނަމަވެސް މެސީ އަކީ މިހާތަނަށް އުފެދުނު އެންމެ މޮޅު ކުޅުންތެރިޔާކަމާ މެދު އެއްވެސް މީހަކަށް ސުވާލު ނޫފެއްދޭނެ ކަމަށެވެ. ގާޑިއޯލާ ބުނީ އޭނާ އަށް ޤަބޫލު ކުރެވޭ ގޮތުގައި މެސީ އަކީ އެންމެ މޮޅު ކުޅުންތެރިޔާއެވެ. މީގެ އިތުރުން މެސީކޮށްފައިވާ ކަންކަން އެހެން ކުޅުންތެރިޔަކަށް ކުރެވޭނެ ކަމާމެދު ސުވާލު އުފެދޭ ކަމަށާއިި، އެކަން ޤަބޫލު ކުރަން ވެސް ދަތި ކަމަށެވެ.

ގާޑިއޯލާ ބުނީ ޕެލޭ އާއި އަލްފްރެޑޯ ޑީ ސްޓެފާނޯ އަދި ޑިއޭގޯ މަރަޑޯނާގެ ކުޅުން ފެނިފައި ތިބި މީހުންގެ ޚިޔާލު ތަފާތު ވާނެ ކަމަށެވެ. ނަމަވެސް އޭގެ އަނެއް ކޮޅަށް ބަލާނަމަ، ވޯލްޑް ކަޕް މުބާރާތް ކާމިޔާބު ނުކޮށް ވެސް އެންމެ މޮޅު ކުޅުންތެރިޔަކީ މެސީ ކަމަށް ގާޑިއޯލާ ބުންޏެވެ.

މީގެ އިތުރުން ގާޑިއޯލާ ވަނީ ސިޓީގެ ކުޅުންތެރިންނާ ގުޅޭ ގޮތުން ވެސް ވާހަކަ ދައްކާފައެވެ. އޭނާ ބުނީ ވޯލްޑް ކަޕް ނުކުޅެ ތިބި ކުޅުންތެރިންނަށްވުރެ، މުބާރާތް ކުޅުނު ކުޅުންތެރިންގެ ހާލަތު ރަނގަޅުވާނެ ކަމަށް ޤަބޫލު ކުރެވޭ ކަމަށެވެ. އޭނާ ބުނީ ސާޖިއޯ ގޯމެޒް އާއި އާލިން ހާލަންޑް އާއި ރިޔާދް މާރޭޒް، އަދި ކޯލް ޕާލްމާ ފަދަ ކުޅުންތެރިން ތިބީ ކޮންމެ ވެސް ވަރަކަށް ކުޅުމުގެ ފޯމު ގެއްލިފައި ކަމަށެވެ. އޭނާ ބުނީ ވޯލްޑް ކަޕް ކުޅުން ކުޅުންތެރިންނާ އަޅުވާ ބަލާއިރު އެކަން ފާހަގަވެފައިވާ ކަމަށެވެ. އެކަން އެގޮތަށްވީ ސަބަބެއްގެ ގޮތުގައި ގާޑިއޯލާ ބުނީ އެ ކުޅުންތެރިން ކޮންމެ ދުވަހު ކަހަލަ ގޮތަކަށް ފަރިތަކުރުންތައް ކުރިއަށް ގެންދިޔަ ނަމަވެސް، އަނެއް ބައި ކުޅުންތެރިން ޗުއްޓީގައި ތިބުން ކަމަށެވެ. ގާޑިއޯލާ ބުނީ އަލުން ތައްޔާރުވުމަށް ލިބިފައިވާ ވަގުތުގައި މަސައްކަތް ކުރަން ޖެހޭ ކަމަށެވެ.

ސިޓީގެ މެޗެއް އެންމެ އަވަހަށް އޮންނާނީ ހުކުރު ދުވަހުއެވެ. ކަރަބޯ ކަޕްގައި އެ ޓީމު ނުކުންނާނީ ވާދަވެރި ލިވަޕޫލާ ދެކޮޅަށެވެ.