ސަޕޯޓަރުން ގިނަވެ ބަސް ނުދުއްވިގެން އާޖެންޓީނާ ކުޅުންތެރިން ހެލިކޮޕްޓަރަށް

ފީފާ ވޯލްޑް ކަޕް މުބާރާތް ކާމިޔާބު ކުރުމުގެ އުފާ ފާޅުކުރުމަށް އާޖެންޓީނާ ކުޅުންތެރިން ކުރިއަށް ގެންދިޔަ ޕެރޭޑުގެ ތެރެއިން ސަޕޯޓަރުން ގިނަވެ، ކުޅުންތެރިން ތިބި ބަސް ނުދެއްވިގެން ހެލިކޮޕްޓަރަށް ބަދަލުވާން ޖެހިއްޖެއެވެ.

މިއަހަރުގެ މުބާރާތް ކާމިޔާބުކުރުމަށް ފަހު އާޖެންޓީނާގެ ކުޅުންތެރިންނާއި އޮފިޝަލުން އެނބުރި ޤައުމަށް އައުމުން ވަނީ ރަތް ދޫލައިގެ ހޫނު މަރުޙަބާއެއް ކިޔައިފައެވެ. އެއަށްފަހު އުފާ ފާޅުކުރުމަށް ވަނީ ބަސް ޕެރޭޑެއް ކުރިއަށް ގެންގޮސްފައެވެ. އެ އުފަލުގައި ބައިވެރިވުމަށް އެތައް ހާސް ސަޕޯޓަރުން ވަނީ އާޖެންޓީނާގެ ވެރި ރަށް ބިއުނޯސް އައިރެސް އަށް ޖަމާވެފައެވެ. ކެޕްޓަން ލިއޮނަލް މެސީ އާއި އެހެން ކުޅުންތެރިން ބަހުގައި ތިބިއިރު، ޖަމާވެފައި ތިބި ސަޕޯޓަރުންގެ އަދަދު ގިނަވުމުގެ ސަބަބުން ޖެހުނީ ހެލިކޮޕްޓަރަށް ބަދަލުވާށެވެ. ބަސް ނުދުއްވިގެން ހެލިކޮޕްޓަރަށް ކުޅުންތެރިން ބަދަލުވީއިރު، އެންމެ ފުރަތަމަ ބަދަލުވީ މެސީއެވެ. އެއަށްފަހު އެހެން ކުޅުންތެރިން ވަނީ ބަދަލުވެފައެވެ.

36 އަހަރަށްފަހު ވޯލްޑް ކަޕް ކާމިޔާބު ކުރެވުމުގެ އުފާ ފާޅުކުރުމަށް އާޖެންޓީނާ އިން އަންނަނީ ގިނަ ކަންކަން ކުރަމުންނެވެ. އެގޮތުން އެ ޤައުމުގެ ސަރުކާރުން ވަނީ އަންގާރަ ދުވަހު ސަރުކާރު ބަންދުކޮށްފައެވެ. ސަބަބަކީ އާޖެންޓީނާގެ ވީހާވެސް ގިނަ ރައްޔިތުންނަށް ކާމިޔާބީގެ އުފަލުގައި ބައިވެރިވުމުގެ ފުރުސަތު ދިނުމަށް ކަމަށް އެ ޤައުމުގެ ސަރުކާރުން ވަނީ ބުނެފައެވެ. އާޖެންޓީނާ އަށް ލިބުނު ކާމިޔާބީ ފާހަގަކުރުމަށް ހަތަރު މިލިއަނެއްހާ މީހުން އެ ސަރަހައްދަށް ޖަމާވި ކަމަށް ރިޕޯޓުތައް ބުނެއެވެ. ބިއުނޯސް އައިރެސްގައި ހުންނަ ތާރީޚީ ބިނާއެއް ކަމަށްވާ އޮބެލިސްކޯއާ ހަމައިން ބަހަށް ވަނީ ދުއްވޭ ގޮތް ނުވެފައެވެ. ކުޅުންތެރިން ހެލިކޮޕްޓަރަށް ބަދަލު ކުރީ އެހާ ހިސާބުންނެވެ.

މިއަހަރުގެ މުބާރާތް އާޖެންޓީނާ އިން ކާމިޔާބުކުރީ ފައިނަލްގައި ޕެނަލްޓީއިން ފްރާންސް ބަލިކޮށްގެންނެވެ.