ޝަރީއާ ދާއިރާގެ އިލްމުވެރިންނާއެކު އެމްއެމްއޭއިން ފޯރަމެއް ބާއްވައިފި
21 ޑިސެމްބަރު 2022 | ބުދަ 02:34މި ފޯރަމްގައި ރާއްޖޭގައި ހިދުމަތްދޭ ހުރިހާ އިސްލާމިކް ފައިނޭންޝަލް އިންސްޓިޓިއުޝަންތަކުން ބައިވެރިވި
އެމްއެމްއޭއިން ބޭއްވި ފޯރަމް
'ޝަރިއާ ސްކޮލާސް ޑައިލޮގް' ނަމުގައި މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ފޯރަމެއް ބާއްވައިފިއެވެ.
މި ފޯރަމަކީ ރާއްޖޭގެ އިސްލާމިކް ފައިނޭންސް ދާއިރާ އަށް ދިމާވާ ގޮންޖެހުތަކާއި އެ ގޮންޖެހުންތަކަށް ގެނެވިދާނެ ހައްލުތަކާ ބެހޭގޮތުން މަޝްވަރާކުރުމުގެ މަގުސަދުގައި ބޭއްވި ފޯރަމެއް ކަމަށް އެމްއެމްއޭއިން ބުނެއެވެ. މި ފޯރަމްގައި އިސްލާމިކް ފައިނޭންސް ދާއިރާގެ ބޭފުޅުން އެމްއެމްއޭ ޝަރިއާ ކައުންސިލާ ކުރަން ބޭނުންވާ ސުވާލުތައްކޮށް ދާއިރާ އާއި ގުޅޭ ކަންކަމުގައި މަޝްވަރާކޮށްފައިވެއެވެ.
މި ފޯރަމްގައި ރާއްޖޭގައި ހިދުމަތްދޭ ހުރިހާ އިސްލާމިކް ފައިނޭންޝަލް އިންސްޓިޓިއުޝަންތަކުން ބައިވެރިވިއެވެ. މި ފޯރަމްގައި ދާއިރާގައި ހަރަކާތްތެރިވާ ފަރާތްތަކުން ގުޅިގެން އިސްލާމިކް ފައިނޭންސިން ކުރިއެރުވުމަށް އިތުރަށް ކުރެވިދާނެ މަސައްކަތްތަކާ ބެހޭގޮތުންވެސް މަޝްވަރާކުރިއެވެ.
މި ފޯރަމްގައި ވާހަކަ ދައްކަވަމުން އެމްއެމްއޭގެ ގަވަރުނަރު އަލީ ހާޝިމް ވިދާޅުވީ އެމްއެމްއޭގެ ޕޮލިސީތައް ބައްޓަންކޮށްފައި ހުންނާނީ އިސްލާމިކް ފައިނޭންސް އިންސްޓިޓިއުޝަންތަކަށް ވެސް އެހެން ފަރާތްތަކާއި ވާދަކުރެވޭނެހެން ފަހި ގޮތަކަށް ކަމަށެވެ.
މީގެ އިތުރުން މި ފޯރަމްގައި ލިބޭ ޚިޔާލާއި މަޝްވަރާއާއެކު ރަނގަޅު ހެޔޮ ބަދަލުތަކެއް ގެނެވޭނެ ކަމަށް އުއްމީދުކުރައްވާ ކަމަށްވެސް ހާޝިމް ވިދާޅުވިއެވެ.
