ޕެންޝަން ގާނޫނުގެ ދަށުން އެމްއެމްއޭ ގެ ބޮންޑު ގައި އިންވެސްޓު ކުރެވިދާނެތޯ ސުވާލު އުފެދިއްޖެ، ސަރުކާރަށް 2.5 ބިލިއަން ރުފިޔާ ހޯދަައިދޭން މެދުވެރިއެއްގެ ދައުރު އަދާކޮށްދީފިނަ ޑޮލަރުން އިންޓަރެސްޓް ދޭނެ

ޕެންޝަން ގާނޫނުގެ ދަށުން މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ބޮންޑު ގައި ޕެންޝަން ފަނޑުން އިންވެސްޓު ކުރެވިދާނެތޯ ސުވާލު އުފެދޭ ކަމަށް މާލީ ދާއިރާގެ ތަޖުރިބާކާރަކު ވިދާޅުވެއްޖެ އެވެ.

ނަން ނުޖެހުމުގެ ޝަރުތުގެ މަތިން އޭނާ ވިދާޅުވީ، ޕެންޝަން ގާނޫނުގައި ޕެންޝަން އެސެޓްސް އިންވެސްޓް ކުރެވޭނެ 4 ދާއިރާ އެއް ވަރަށް ސާފުކޮށް ބަޔާން ކޮށްފައިވާ ކަމަށާއި، އޭގެ ތެރޭގައި އެމްއެމްއޭ ގެ ބޮންޑު ހިމެނޭ ކަމަށް ގަބޫލު ނުކުރެވޭ ކަމުގައެވެ.

ދިވެހި ރާއްޖޭގެ ޕެންޝަނާ ބެހޭ ގާނޫނުގެ 16 ވަނަ މާއްދާގެ (ރ) ގައި ޕެންޝަން އެސެޓްސް ދިވެހި ރާއްޖޭގައި އިންވެސްޓް ކުރަން ވާނީ ގާނޫނުގައި ބަޔާން ކޮށްފައިވާ 4 ގޮތުން ކުރެ ގޮތަކަށް ކަމަށް ވަރަށް ސާފުކޮށް ވަނީ ބުނެފައެވެ.

އެއީ:

1. ބޭންކުތަކުގެ އެކައުންޓްތަކާއި، ބޭންކުތަކުގައި ހުންނަ ޑިޕޮސިޓްތައް ފަދަ މަނިޓަރީ ފަންޑްތައް؛
2. ދިވެހި ސަރުކާރުގެ ކަމާ ބެހޭ ފަރާތަކުން އެފަރާތުން ގެރެންޓީ ކުރާ މިންވަރަކަށް ދޫކުރާ ސެކިއުރިޓީސް ތައް؛
3. ވިޔަފާރި ކުރާ ތަންތަނުން ދޫކުރާ ސެކިއުރިޓީސް ތަކުގެ ތެރެއިން ރާއްޖޭގައި ހުންނަ ލައިސަންސް އޮތް ސްޓޮކް އެކްސްޗޭންޖެއް ގައި ލިސްޓް ކުރެވިފައިވާ ސެކިއުރިޓީސް ތައް؛ އަދި
4. ރާއްޖޭގައި ގަވައިދުން ހުއްދަ ލިބިފައިވާ މިއުޗުއަލް ފަންޑާއި އިންވެސްޓްމަންޓް ފަންޑުތައް.

މި ދާއިރާތައް ފާހަގަ ކުރެވިފައިވާއިރު، މީގެ ތެރޭގައި އެމްއެމްއޭގެ ބޮންޑަށް ޕެންޝަން ފަންޑުން އިންވެސްޓް ކުރުމަކީ ސާފުކޮށް އެނގެން އޮތް ކަމެއް ނޫން ކަމަށް ތަޖުރިބާކާރު ވިދާޅުވިއެވެ.

އޭނާ އިތުރަށް ވިދާޅުވި ގޮޮތުގައި، ގާނޫނުގައި ވަރަށް ސާފު ކޮށް "ޕެންޝަން އެސެޓްސް އިންވެސްޓް ކުރަންވާނީ ގާނޫނުގައި ކަނޑައެޅިފައިވާ ގޮތުގެ މަތިން އަދި ހަމަ އެކަނި ސްކީމުގެ ބައިވެރިންނާއި ބެނިފިޝަރީންނަށް އެންމެ ބޮޑު ފައިދާ އެއް ލިބޭ ގޮތުގެ މަތިން ކަަމަށް،" ބުނެފައިވާ ކަމަށެވެ.

އިތުބާރު ހުރި މަސްދަރަކުން މައުލޫމާތު ލިބިފައިވާ ގޮތުގައި ސަރުކާރުގެ ރޭވުމަކީ ޕެންޝަން ފަންޑަށް 2.5 ބިލިއަން ރުފިޔާ އެމްއެމްއޭ އިން ވެއްދުމަށެވެ. އަދި އެއާއެކު އެ އަދަދަށް ވާ ވަަރަށް ޕެންޝަން ފަންޑުން ފިނޭންސް މިނިސްޓްރީން ވިއްކާ ޓީ-ބިލު ގަނެ އެ ފައިސާ ފިނޭންސް މިނިސްޓްރީ އަށް ލިބޭ ގޮތް ހަދައިދިނުމަށެވެ.

ތަޖުރިބާކާރުގެ ނަޒަރުގައި އެމްއެމްއޭ އިން މިކަން ކޮށްފިނަމަ އެކަން ބެލެވޭނީ ކަނޑައެޅިގެން ފައިސާ ޗާޕު ކުރުން ކަމުގައެވެ.

"ފައިސާ ޗާޕު ކުުރުމުގެ ޑެފިނިޝަން އަށް މާރީތި ކޮށްވެސް އޭރުން އެ ފެތެނީ، އެއީ އިތުރު ފައިސާ ސަރކިއުލޭޝަންގެ ތެރެއަށް ވެއްދުން ކަމަށްވާތީ؛" އޭނާ ވިދާޅުވިއެވެ.

ޕެންޝަން ފަންޑު މެދުވެރިކޮށްގެން ސަރުކާރުން ހިންގަން މިއުޅޭ މުއާމަލާތާ މެދު ޕެންޝަން ފަންޑުގެ ބޯޑުގެ މެމްބަރުންގެ މެދުގައި ޚިޔާލު ތަފާތުވެފައިވަ ކަމަށް މައުލޫމާތު ލިބިފައިވެއެވެ.

އެގޮތުން ބޯޑުން މިކަން ފާސް ކުރުމަށް ހުސްވި ހަފްތާގައި ބޭއްވި ބައްދަލުވުމުގައި ބޯޑުން ފާސްވާ ގޮތް ވަނީ ނުވެފައެވެ.

އިތުބާރު ހުރި މަސްދަރަކުން މައުލޫމާތު ލިބިފައިވާ ގޮތުގައި 2.5 ބިލިއަން ރުފިޔާ ހޯދަައިދޭން މެދުވެރިއެއްގެ ދައުރު ޕެންޝަން ފަންޑުން އަދާ ކޮށްދީފި ނަމަ ޓީބީލުގެ އިންޓަރެސްޓަށް ވާ އަދަދު ޑޮލަރުން ދިނުމަށް ވެސް ސަރުކާރުން ވަނީ ހުށަހަޅާފައެވެ. އެހެން ނަމަވެސް ޑޮލަރުން ލިބޭ ބައި ބަހައްޓަން ވާނީ އެމްއެމްއޭ ގައި ކަމަށް ވަނީ ބުނެފައެވެ. ސަރުކާރުން ޕެންޝަން ފަންޑުގެ ޝައުގުވެރިކަން މިކަމަށް ހޯދުމަށް ބުނެފައިވާ ކަމަށް ވަނީ ޑޮލަރުން ބައެއް ލިބޭ ނަމަ ޕެންޝަން ފަންޑުން ރާއްޖެއިން ބޭރުގައި އިންވެސްޓް ކުރުމަށް ފުރުސަތު އިތުރުވާނެ ކަމަށެވެ.

މި ސަރުކާރުން އިގްތިސާދީ އެޖެންޑާ ކުރިއަށް ގެންދާނީ ފައިސާ ޗާޕު ނުކޮށް ކަމަށް ރައީސް މުހައްމަދު މުއިއްޒު ތަކުރާރުކޮށް ވަނީ ވިދާޅުވެފައެވެ.