ދެއްކި ވާހަކަތަކާއި ހިލާފަށް މިސްމެނޭޖްމަންޓުގެ ސަބަބުން މި ސަރުކާރަށް ފައިސާ ޗާޕުކުރުން ނޫން އެހެން ގޮތެއް ނެތް: ފައްޔާޒު

މި ސަރުކާރު ވެރިކަމަށް އަންނަން ދެއްކި ވާހަކަތަކާއި ހިލާފަށް މިސްމެނޭޖްމަންޓުގެ ސަބަބުން މި ސަރުކާރަށް ފައިސާ ޗާޕުކުރުން ނޫން އެހެން ގޮތެއް ނެތް ކަމަށް ކުރީގެ އިކޮނަމިކް މިނިސްޓަރު ފައްޔާޒު އިސްމާއިލް ވިދާޅުވެއްޖެއެވެ.

ޕެންޝަން އޮފީސް މެދުވެރިކޮށް ސަރުކާރުން އެމްއެމްއޭ ލައްވާ ޗާޕު ކުރާ 2.5 ބިލިއަން ރުފިޔާ އާއި ގުޅިގެން އެކްސްގައި ކުރެއްވި ޕޯސްޓެއްގައި ވިދާޅުވީ ސަރުކާރުން އެމްއެމްއޭ މެދުވެރިކޮށް ފައިސާ ޗާޕު ކުރަން މަޖުބޫރު ކުރަމުންދާކަމީ އަޖައިބުވާންޖެހޭ ކަމެއް ނޫން ކަމަށެވެ.

ފައްޔާޒު ވިދާޅުވީ އެންމެ ކަންބޮޑުވާ ކަމަކީ މި މުއާމަލާތް ސްޓްރަކްޗާ ކޮށްފައިވަނީ ސަރުކާރުން ޒިންމާ ނުނަގާ ގޮތަށް ކަމާއި، ސަރުކާރުން އެމްއެމްއޭއިން ބޮންޑު ގަތުމުގެ ނަމުގައި ކުރާ ކަމަކީ ފައިސާ ޗާޕުކުރުން ކަމަށެވެ. އަދި، މިކަން "އިންވެސްޓްމަންޓެއް" ގެ ގޮތުގައި ގިންތިކުރުމަށްޓަކައި، މި ސަރުކާރުން ވަނީ މޯލްޑިވްސް ޕެންޝަން އެޑްމިނިސްޓްރޭޝަން އޮފީސް ޝާމިލްކޮށްގެން މިކަން "އިންވެސްޓްމަންޓް އެރޭންޖްމަންޓެއް" ފަދަ ގޮތަކަށް ހަދާ އޮޅުވާލާފައި ކަމަށެވެ.

މިކަމުގެ ސަބަބުން ރިޓަޔަރމަންޓް ޕެންޝަން ސްކީމްގެ ނަޒާހަތްތެރިކަން ނުރައްކަލުގެ ތެރެއަށް ވައްޓާލާ، އަދި، މިފަދަ އަމަލެއްގައި ޕެންޝަން ފަންޑުން ބައިވެރިވާން މަޖުބޫރުވާއިރު، މި ސަރުކާރު ކަމެއް ކުރަން ކޮންމެ ހިސާބަކަށް ވެސް ގޮސްދާނެކަން މިއިން ތަސައްވުރު ކުރެވޭ ކަމަށެވެ. ފައްޔާޒު ވިދާޅުވީ މި ސަރުކާރުން ހަމައެކަނި ފައިސާ ޗާޕްކުރާ ކުރަނީ ނޫން ކަމަށާއި، މިކަމުގެ ސަބަބުން އެތައް ހާސް ދިވެހިންގެ ރިޓަޔަރމަންޓް ސެކިއުރިޓީ އަށް ނުރައްކާވެ، އެމީހުންގެ އިޖުތިމާއީ ރައްކާތެރިކަން ކަށަވަރު ކުރުމަށް ނިންމާފައިވާ ނިޒާމަށް ކުރާ އިތުބާރު ގެއްލިގެންދާނެ ކަމަށެވެ.

އަދި މިފަދަ މަކަރުވެރި އަދި ނުބައި ގޮތްތައް ބޭނުން ކުރުމުގެ ބަދަލުގައި ރައީސް ޑރ. މުހައްމަދު މުއިއްޒު އެމަނިކުފާނުގެ ވައުދުފުޅުގެ މަތިން ހަނދާން ނައްތާލައްވާފައިކަން ސަރުކާރުން ގަބޫލުކޮށް، ފައިސާ ޗާޕު ކުރަން ނިންމާ ކޮންމެ ނިންމުމެއް މަޖިލީހަށް ހުށަހަޅަން ޖެހޭނެ ކަމަށެވެ. އަދި ދެ ފުށް ފެންނަ ގޮތަކަށް ޤާނޫނީ އިޖުރާޢަތްތަކާ އެއްގޮތްވާ ގޮތުގެ މަތިން، ރާއްޖޭގެ ޙާލަތު ރައްޔިތުންނާ ޙިއްޞާކޮށް، މިކަމުގެ ސަބަބުން ދިވެހި ރުފިޔާގެ އަގު ދަށްވެ، އިންފްލޭޝަން އިތުރުވެ، ރައްޔިތުން ކުރާ ހޭދަ ދަށްވެގެންދާނެ ކަމަށް ފައްޔާޒު ވަނީ ވިދާޅުވެފައެވެ.

ސަރުކާރުން ކުރާ މަސައްކަތަކީ މިހައިތަނަށް ޕެންޝަން ފަންޑުން އިންވެސްޓްކުރުމުގައި ގެންގުޅެމުން އައި ހުރިހައި ހަމަތަކެއް މުގުރައިލައި، ކަނޑައެޅިފައިވާ އުސޫލުތަކާ ޚިލާފަށް، އެ ފަންޑުގައި ހުރި ފައިސާ ސަރުކާރަށް ނަގަން މޯލްޑިވްސް މަނިޓަރީ އޮތޯރިޓީ އިސްވެ އޮވެ، މަސައްކަތް ކުރުމެވެ. ސަބަބަކީ މި ސަރުކާރަށް ހަރަދުތައް ކުޑަނުކުރެވި ބަޖެޓަށް ފައިސާ ނުހޯދުމެވެ. އަދި ބޭރުގެ ލޯނުތަކާއި އެހީތައް ހޯދުމުގައި ސަރުކާރު ފެއިލްވެ ފައިސާ ޗާޕްކުރަން އެންމެފަހުން ސަރުކާރަށް ވަނީ މަޖުބޫރުވެފައެވެ.

މި ސަރުކާރުން ކުއްލިއަކަށް 2.5 ބިލިއަން ރުފިޔާ ޗާޕުކުރަން ނިންމައިފައި މި ވަނީ، ރައްޔިތުންގެ މަޖިލީހުން ފާސްކޮށްފައިވާ، 2025 ވަނަ އަހަރުގެ ދައުލަތުގެ ބަޖެޓުގައި، ދައުލަތަށް ފައިސާ ހޯދާނެ ކަމަށް މިނިސްޓަރ އޮފް ފިނޭންސް ބަޔާންކޮށްފައިވާ ކަންކަމާ ހިލާފަށެވެ.