ކޮންމެ ބޭންކަކުން ވެސް ވަކި އިންސައްތައެއް ހައުސިންގ ފަންޑަށް ދޭން ލާޒިމުކުރާ ގޮތަށް ގަވާއިދެއް ހަދައިފި

ކޮންމެ ބޭންކަކުން ވެސް ލޯނާއި ދަރަނީގެ ގޮތުގައި ލިބެންޖެހޭ ފައިސާގެ ތެރެއިން ވަކި އިންސައްތައެއް ހައުސިންގ ފަންޑަށް ދޭން ލާޒިމުކުރާ ގޮތަށް ގަވާއިދެއް އެކުލަވާލައިފި އެވެ.

މިއީ "އިންކްލޫސިވް ނޭޝަނަލް އެފޯޑަބަލް ހައުސިންގ ސްކީމާ ބެހޭ ގަވާއިދު" ގެ ދަށުން ލާޒިމު ކޮށްފައިވާ ކަމެކެވެ. އެމްއެމްއޭ އިން އެކުލަވާލި މި ގަވާއިދުގައި ބުނެފައިވަނީ މިއީ ގެދޮރު ގަތުމަށް ބޭނުންވާ ފައިނޭންސިންގ، އިސްލާމިކް ފައިނޭންސިންގ ގެ އުސޫލުތަކާ އެއްގޮތްވާ މަތީން އަގުހެޔޮކޮށް ލިބޭނެ ގޮތް ހަމަޖެއްސުމަށް ޓަކައި އިންކްލޫސިވް ނޭޝަނަލް އެފޯޑަބަލް ހައުސިންގ ސްކީމާއި އެ ސްކީމުގެ ފަންޑު ގާއިމުކޮށް ހިންގުމުގެ ކަންކަން ބަޔާންކުރުމުގެ ގަވާއިދު ކަމުގައެވެ.

އެމްއެމްއޭ އިން ބޭންކުތަކަށް މަޖުބޫރު ކޮށްގެން ގެދޮރު ގަންނަން ދޫކުރާ ލޯނު ދޭން ޖެހޭ ގޮތަށް ހެދި މި ގަވާއިދުގައި ބުނަނީ ސްކީމްގެ މައިގަނޑު މަގުސަދަކީ، ގްރޭޓަރ މާލެ ސަރަހައްދުގައި ގެދޮރު ގަތުމަށް ބޭނުންވާ ފައިނޭންސިންގ އަގުހެޔޮކޮށް ލިބޭނެ ގޮތް މަގުފަހިކޮށްދިނުން ކަމަށެވެ. އަދި މި ސްކީމް ހިންގާނީ 5 އަހަރު ދުވަހުގެ މުއްދަތަށް ކަމަށް ބުނެފައިވެ އެވެ.

އެގޮތުން އެމްއެމްއޭ އިން އެހެން ގޮތަކަށް ކަނޑަނާޅާހައި ހިނދަކު، ކޮންމެ ބޭންކަކުން ވެސް، އެ ބޭންކަކަށް ލޯނާއި ދަރަނީގެ ގޮތުގައި ލިބެންޖެހޭ ޖުމުލަ ފައިސާގެ ތެރެއިން 10% އާއި 15% އާ ދެމެދުގެ އަދަދެއް، ފަންޑަށް ދޫކުރަންވާނެ އެވެ. އަދި މި ފައިސާ، އޮތޯރިޓީން އަންގާ ގޮތަށް އަދި އަންގާ ތާރީޚަށް، ކޮންމެ ބޭންކަކުން ވެސް ފަންޑަށް ދޫކުރަންވާނެ ކަމަށް ބުނެފައިވެ އެވެ.

މި ފަންޑުން ފައިނޭންސް ދޫކުރެވޭނީ ދެ ބާވަތެއްގެ ފައިނޭންސިންގ އަށް ކަމަށް މި ގަވާއިދުގައި ބުނެއެވެ. އެއީ ލީސް އެންޑިނގް ވިތް އޯނަރޝިޕް ފެސިލިޓީ އަދި އެންޑް-ޔޫޒަރ ފައިނޭންސިންގ ފެސިލިޓީ އެވެ.

މި ގަވާއިދުގައި ބުނާ ގޮތުން މި އިން ކޮންމެ ބާވަތެއްގެ ފައިނޭންސިންގ ފެސިލިޓީއަށް ދޫކުރާނެ ފަންޑުގެ މިންވަރު ކަނޑައަޅާނީ އެމްއެމްއޭ އިންނެވެ. އަދި ފަންޑުން ދޫކުރާ ފައިނޭންސިންގ ފެސިލިޓީގެ މުއްދަތަކީ 25 އަހަރު ކަމަށް ގަވާއިދުގައި ބުނާ އިރު ފަންޑުން ފައިނޭންސިންގ ފެސިލިޓީ ދޫކުރެވޭނީ، ގެދޮރުވެރިކަމުގެ މިލްކުވެރިކަން ނެތް، ފުރަތަމަ ފަހަރަށް ގެދޮރު ގަންނަ، އަދި އޮތޯރިޓީން ކަނޑައަޅާ އިތުރު ޝަރުތުތައް ފުރިހަމަވާ މީހަކަށެވެ.

މީގެ އިތުރުން އެއްވެސް ބޭންކަކުން ނުވަތަ ސްކީމް ހިންގާ އިދާރާއިން، މި ގަވާއިދާ ނުވަތަ އޮތޯރިޓީން އަންގާ އެންގުމަކާ ޚިލާފުވެއްޖެ ނަމަ، މޯލްޑިވްސް މަނިޓަރީ އޮތޯރިޓީގެ ޤާނޫނުގެ 40 ވަނަ މާއްދާގެ (ށ) ގައިވާ ގޮތަށް އެ ފަރާތެއް ޖޫރިމަނާ ކުރެވޭނެ ކަމަށް ބުނެފައިވެ އެވެ.