ވޯލްޑްކަޕަށް ފަހު ދޯހާއިން އިންތިހާ އަށް ފަޅުކަން

ދުނިޔޭގެ ޗެމްޕިއަނުންގެ ގޮތުގައި އޮތް ފަރަންސޭސިވިލާތް ބަލިކޮށް، އާޖެންޓީނާއިން 3 ވަނަ ފަހަރަށް ވޯލްޑްކަޕް ތަށި އުފުލާލި ފޯރި ގަދަ މެޗަށް ފަހު، ޑިސެމްބަރު 19 ވީ ހޯމަ ދުވަހު، ޤަޠަރުގެ ވެރިރަށް ދޯހާއިން ފެނިގެން ދިޔައީ މުޅިން ތަފާތު މަންޒަރެކެވެ. އިވެމުން ދިޔައީ ތަފާތު އަޑެކެވެ.

މަހެއްހާ ދުވަހަށް ދެމިގެން ދިޔަ، ބައިނަލްއަޤުވާމީ އެންމެ ވާދަވެރި ފުޓުބޯޅަ މުބާރާތުގެ މެޗުތައް ބަލާލުމަށް ދުނިޔޭގެ އެކި ކަންކޮޅުތަކުން އެތައް މިލިއަން ބަޔަކު ޒިޔާރަތް ކުރި ދޯހާގެ މަގުތައް މިއަދު އޮތީ މުޅިންހެން ފަޅުވެފައެވެ. މުޅި ތަނަށް ވެރިވެފައި ވަނީ އާދަޔާ ޚިލާފު ހިމޭން ކަމެކެވެ. ފުޓުބޯޅައިގެ ސަޕޯޓަރުންނާއި ފަތުރުވެރި މެހެމާނުންގެ ހިލަމެއްވެސް ނެތޭ ބުނެވިދާނެއެވެ.

މުބާރާތް ކުޅުނު ހުރިހާ ޓީމެއް ޤަޠަރުން ފުރާފައި ވާއިރު، ސަޕޯޓަރުންވެސް ޤަޠަރު ދޫކޮށް ފުރައިފިއެވެ. ވޯލްޑްކަޕަށް ހާއްސަކޮށްގެން ދޯހާގައި ދެމި ފޮތިގަނޑުތަކާއި، ހަރުކުރި ބިލްބޯޑްތައް ނެގުމުގެ މަސައްކަތް ކުރިއަށް ދާ އިރު، މުބާރާތަށް ހާއްސަކޮށްގެން ދޯހާގެ އެކި ހިސާބުތަކުގައި ޖެހި ބެރިކޭޑްތައްވެސް މިހާރު ދަނީ ނަގަމުންނެވެ.

ގުނާ ޢަދަދު ނުކުރެވޭ ސޯޝަލް މީޑިއާ ޕޯސްޓްތަކުން ފެނިގެންދިޔަ ބެކްޑްރޮޕް ތަކެއް މިހާރަކު ނެތެވެ. ވޯލްޑްކަޕަށް ހާއްސަކޮށްގެން ހަރުކުރި ހުރިހާ ފަރުމާއެއް ނަގާ، މުޅި ސިޓީ ދޮވެލާފައި އޮތް ފަދައެވެ.

އައްސޭރިފަށުގެ ސަރަޙައްދަށް ބަލާއިރު، މުޅި މަންޒަރަށް އިތުރު ފުރިހަމަ ކަމެއް ގެނެސްދިން ހައިވަކަރު އޮޑި ފަހަރުތައްވެސް ނަގިލި ނަގާ، ދަތުރަށް ފުރައިފިއެވެ. މަންޒަރުގައި ވަނީ ފަޅުކަމެވެ.

ޓޮމަސް ކެޕާއާއި ޖެސިކާ އިނަމޮރާޓޯއަކީ ވޯލްޑްކަޕްގެ މެޗުތައް ބަލާލުމަށް ދޯހާއަށް ދިޔަ ދެމީހުންނެވެ. ފައިނަލް މެޗަށް ފަހު، ޖެހިގެން އަދި ދުވަހުގެ ފަޅުކަމުގެ އިޙްސާސް އެ 2 މީހުންވެސް ކުރިއެވެ.

ސޫކް ރެސްޓޯރަންޓްގެ ޝިފްޓް ލީޑަރެއްގެ ގޮތުގައި ހުރި އަޙްމަދު ރައްމާލު ބުނި ގޮތުގައި، މުޅި ސިޓީ ހުސްވެގެން ދިޔަ ގޮތުން އޭނާ އަދިވެސް ހުރީ ހައިރާން ކަމެއްގެ ތެރޭގައެވެ.

ކޮންމެ ގޮތަކަށް މިހާރު ކަން އޮތް ކަމުގައި ވީ ނަމަވެސް، ވޯލްޑްކަޕަކީ އެއް ގޮތަށް ވުރެ ގިނަ ގޮތުން، ޤަޠަރަށް އައި ޢީދެއް ކަމާ މެދު ދެބަސް ވެވޭކަށް ނެތެވެ.

ސޫކް ބާޒާރު ސަރަޙައްދުގައި އަދިވެސް ކޮންމެވެސް ވަރަކަށް ފަތުރުވެރިން އެބަ އުޅެއެވެ. ރެސްޓޯރަންޓްތަކުގައިވެސް ހިސާބަކަށް މީހުން އުޅެއެވެ. ނަމަވެސް، ވޯލްޑްކަޕްގެ މެޗުތަކާއެކު ފެނުނު ވަރާ ގާތްވެސް ނުކުރެއެވެ. ޤަޠަރުގެ ޢުއްމީދަކަށް ވެފައި އޮތީ މި ފަހަރުގެ ވޯލްޑްކަޕާއެކު ފަތުރުވެރިންގެ މެދުގައި މަޤުބޫލު މަންޒިލަކަށް ޤަޠަރުވެގެން ދިއުމެވެ. ނަމަވެސް، އެކަން ޙަޤީޤަތަކަށް ވެދާނެ ކަމާ މެދު، މި މަންޒަރުތަކުން ވަނީ ޒާތަކަށް ސުވާލު އުފައްދާފައެވެ.