ފުވައްމުލަކު މަގުތައް ހެދުމުގެ މަސައްކަތް ނާއިބު ރައީސް ބައްލަވާލައްވައިފި

ފުވައްމުލައް ސިޓީގެ މަގުތައް ހެދުމުގެ މަސައްކަތް ނާއިބު ރައީސް ފައިސަލް ނަސީމް ބައްލަވާލައްވައިފިއެވެ.

ފުވައްމުލައް ސިޓީގެ މަގުތައް ހެދުމުގެ މަސައްކަތް ނާއިބު ރައީސް ބައްލަވާލައްވާފައިވަނީ އެމަނިކުފާނު ފުވައްމުލައް ސިޓީއަށް ކުރައްވަމުންގެންދަވާ ދަތުރުފުޅުގެ ތެރެއިން އާދިއްތަ ދުވަހުއެވެ.

ފުވައްމުލައް ސިޓީގެ މަގުތައް ހެދުމުގެ މަސައްކަތް ކުރިއަށްގެންދަނީ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އިންނެވެ. ނާއިބު ރައީސް ވަނީ މަސައްކަތުގެ އެންމެ ފަހުގެ މައުލޫމާތުތައް އޮޅުންފިލުއްވާފައެވެ.

ފުވައްމުލަކުގެ އެތެރޭގެ މަގުތައް ހެދުމުގެ މަޝްރޫޢުގެ ދަށުން، 122،659 އަކަމީޓަރުގެ ސަރަޙައްދެއްގައި ސަބްބޭސް ތައްޔާރުކުރުމުގެ މަސައްކަތާއި، 95،239 އަކަމީޓަރުގެ ސަރަޙައްދެއްގައި ތާރު އެޅުމަށް ވަނީ ހަމަޖެހިފައެވެ. މީގެ އިތުރުން 27،450 އަކަމީޓަރުގެ ސަރަޙައްދެއްގައި ދުވާރު ހެދުމާއި، މަގުމަތީ ނިޝާން ހަރުކުރުމާއި މަގުބައްތި ހަރުކުރުމާއި، 19،940 މީޓަރުގެ ސަރަޙައްދެއްގައި ފެންހިންދާ ނިޒާމެއް ޤާއިމުކުރުމުގެ މަސައްކަތް ވެސް ކުރުމަށް ވަނީ ހަމަޖެހިފައެވެ.