"ރައީސް ބޭކާރު ކަންތައްތައް ކުރައްވާއިރު ޅިޔަނުން ނަސޭހަތް ނުދެއްވަނީތޯ؟": ޑރ އިޔާޒް

ފުވައްމުލަކު ސިޓީގައި ފެނުގެ ދަތިކަމުގެ ޝަކުވާތައް އިތުރުވެ، ރައްޔިތުން ބިކަ ވެފައިވާ މި ދަނޑިވަޅުގައި، ރައީސުލްޖުމްހޫރިއްޔާ ޑރ. މުހައްމަދު މުއިއްޒު ކުރައްވަމުންދާ "ބޭކާރު ކަންތައްތައް" ހުއްޓުވުމަށް އެމަނިކުފާނުގެ ޅިޔަނުން އެއްވެސް ނަޞޭޙަތެއް ނުދެއްވަނީތޯ ދީނީ ޢިލްމުވެރިޔާ ޑރ. މުޙައްމަދު އިޔާޒް ޢަބްދުއްލަޠީފް ސުވާލު އުފައްދަވައިފި އެވެ.

އެކްސް ގައި ކުރި ޕޯސްޓެއްގައި ޑރ. އިޔާޒް ވަނީ، ރާއްޖޭގެ އެކި ސަރަޙައްދުތަކުން ފެނުގެ ދަތިކަމުގެ ޝަކުވާތައް އިތުރުވެފައިވާ މި ދަނޑިވަޅުގައި، ރައީސް ޑރ. މުއިއްޒު ޢަމަލު ކުރައްވަމުން ގެންދަވާ ގޮތާމެދު ކަންބޮޑުވުން ފާޅުކުރައްވާފަ އެވެ. އެގޮތުން ޑރ. އިޔާޒް ވިދާޅުވީ، ރައީސް މުއިއްޒު ގެންދަވަނީ، ރައްޔިތުން ފެނަށް ޖެހި، ޒަރޫރީ ބޭނުންތައް ފުއްދުމުގައި ދަތިކަން ކުރިމަތިވެފައި ވާއިރު ވެސް، ތިމާ އަށް ތާއީދު އޮތްކަން ދެއްކުމަށް ބޭކާރު ކަންތައްތައް ކުރައްވަމުން ކަމަށެވެ.

Advertisement

ޑރ. އިޔާޒް މިހެން ވިދާޅުވެފައިވާއިރު، މިހާރު ފުވައްމުލަކު ރައްޔިތުން ފެނަށްޖެހި ބިކަވުމުން، އެ ސިޓީއަށް ބޯފެން ގެންދިޔުމަށް މޯލްޑިވިއަނުން އެ ރަށަށް ޗާޓަރ ކޮށްގެން އަޅަމުންދާ ފްލައިޓުތަކުން، ހުކުރު ދުވަހު ވެރިކަންކުރާ ޕީއެންސީއިން މާލޭގައި ބާއްވާ ޖަލްސާއަށް މީހުން ގެނެސްފައިވާކަން ވަނީ އެނގިފަ އެވެ.

މައުލޫމާތު ލިބިފައިވާ ގޮތުގައި މިހާތަނަށް ހައެއްކަ ފްލައިޓުގައި ފުވައްމުލަކުން މާލެއަށް މީހުން ގެނެސްފައިވާކަން ފާހަގަކުރެވެ އެވެ. މި ދަތުރުތަކުގައި ގެނައި ފަރާތްތަކުގެ ތެރޭގައި ޕީއެންސީގެ ސަޕޯޓަރުންނާއި، ސަރުކާރުގެ ކުންފުނިތަކާއި ސިޔާސީ މަޤާމުތަކުގައި ތިބި މީހުން ހިމެނެ އެވެ. ފުވައްމުލަކުގެ އިތުރުން، ރާއްޖޭގެ އެކި ކަންކޮޅުތަކުން އެސްއޯއީތަކުގެ މުވައްޒަފުންނާއި ސަރުކާރުގެ މުވައްޒަފުން ވެސް ޕީއެންސީ ޖަލްސާއަށް މާލެ ގެންނަން ވަނީ ފަށާފަ އެވެ. އެމީހުންގެ ހުރުމާއި ކެއުން އަދި ދަތުރުގެ ހަރަދު ވެސް ހަމަޖައްސަނީ ސަރުކާރު ހިންގާ ޕާޓީ ޕީއެންސީ އިންނެވެ. އޭގެ އިތުރުން ޕޮކެޓް މަނީ ދޭކަން ވެސް ވަނީ އެނގިފަ އެވެ. ބައެއް ފަރާތްތަކުން ހާމަ ކޮށްފައިވާ ގޮތުގައި ޕީއެންސީ އިން ބާއްވާ ޖަލްސާ އަށް މީހުން ގެނައުމަށް ނުފޫޒު އާއި ބާރު ބޭނުން ކުރުމުގެ އިތުރުން 50 މިލިއަން ރުފިޔާ ވަނީ ހޭދަ ކޮށްފަ އެވެ.