ރައީސް މުއިއްޒަކީ މިހާތަނަށް އެންމެ އަވަހަށް އޮފް ކެނޑުނު ވެރިޔާ: ފުވައްމުލައް ސިޓީގެ ކުރީގެ މޭޔަރު ފަލާހު
މިއަދު މި ގައުމުގައި ރައީސްއަކު ހުންނަ ކަމުގެ އިހުސާސެއް ނުވޭ
ފަށާއިރު ޕްރޮގްރާމްގައި ފުވައްމުލައް ސިޓީގެ ކުރީގެ މޭޔަރު އަބްދުﷲ ފަލާހު ޝަރީފް ވާހަކަ ދައްކަވަނީ
ރައީސް ޑރ.މުހައްމަދު މުއިއްޒަކީ މިހާތަނަށް އެންމެ އަވަހަށް އޮފް ކެނޑުނު ވެރިޔާ ކަމަށް ފުވައްމުލައް ސިޓީގެ ކުރީގެ މޭޔަރު އަބްދުﷲ ފަލާހު ޝަރީފް ވިދާޅުވެއްޖެ އެވެ.
ރާއްޖެޓީވީގެ ފަށާއިރު ޕްރޮގްރާމްގައި ފުވައްމުލަކުގެ ކުރީގެ މޭޔަރު ފަލާހު ވަނީ މި ސަރުކާރަށް ވަރަށް ބޮޑަށް ފާޑު ވިދާޅުވެ ވާހަކަ ދައްކަވާފަ އެވެ.
މިއަދު މި ގައުމުގައި ރައީސްއަކު ހުންނަ ކަމުގެ އިހުސާސް ނުވާ ކަމަށާއި، ރައްޔިތުންނަށް ދިމާވަމުންދާ ތަކުލީފުތަކާ އުދަނގޫތައް ރައީސް އަށް އެނގިވަޑައިނުގަންނަވާ ކަމަށް އޭނާ ވިދާޅުވި އެވެ. މިހާތަނަށް ރައީސް މުއިއްޒު ވިދާޅުވާ ކޮންމެ ވާހަކައެއް ދަނީ ދިމާ އިދިކޮޅަށްކަން ފާހަގަކުރައްވައި ފަލާހު ވިދާޅުވީ މި ސަރުކާރުގެ ހަރަދު ކުޑަ ކުރުމުގެ ސިޔާސަތަކާއެކު ހަރަދު އިންތިހާ އަށް ބޮޑުވި ކަމަށެވެ. ސިޔާސީ މީހުންގެ އަދަދު ނޭނގޭ މިންވަރަށް އިތުރުކޮށް ރައްޔިތުންނަށް ދަތި ކުރަމުންދާ ކަމަށް އޭނާ ވިދާޅުވި އެވެ.
މީގެ އިތުރުން ފަލާހު ވިދާޅުވީ ޑޮލަރުގެ އަގު ދަށް ކުރުމަށް އައި މި ސަރުކާރުގައި ޑޮލަރުގެ އަގު މަތިކޮށް ކަޅު ބާޒާރު ފުޅާ ކޮށްފައިވާ ކަމަށާއި، ދުންފަތް ކޮންޓްރޯލް ކުރުމުގެ ސިޔާސަތު ތައާރަފްކޮށް ސިނގިރޭޓާއި، ވޭޕްގެ ކަޅު ބާޒާރެއް ވެސް އުފައްދާފައިވާ ކަމަށެވެ.
ފަލާހު ވިދާޅުވީ ޖުމްހޫރީ ވެރިކަމުގައި މިހާތަނަށް މިހައި އަވަހަށް އޮފް ކެނޑިގެން ދިޔަ ވެރިއަކީ ރައީސް މުއިއްޒު ކަމަށާއި، އެމަނިކުފާނަށް ރައްޔިތުންގެ އިތުބާރު ގެއްލިފައިވާ ކަމަށެވެ.
މިއަށްވުރެ އަވަހަށް އޮފް ކެނޑުނު ވެރިއަކު ރައީސްއަކު ނާދޭ. މިއަށްވުރެ އަވަހަށް އޮފް ކެނޑުނު ވެރިކަމެއް އަޅުގަނޑުމެންގެ ހަޔާތުގައި އަޅުގަނޑުމެން ނުދެކެން. އަޅުގަނޑުމެން ދުނިޔެއަށް އައިރުގައި މައުމޫން އޭގެފަހުން ރައީސް ނަޝީދު، ރައީސް ނަޝީދުގެ ވެރިކަން ބަގާވާތަކުން ވެރިކަން ނިންމި ނަމަވެސް އޮފް ނުކެނޑޭ. ގައުމެއްގައި ކަންކަން ހިނގާ ކަމުގެ އިހުސާސް ކޮންމެ ރައްޔިތަކަށް ކުރެވޭނުންތޯ. ރައީސް ޔާމީނަށް ފަހު ރައީސް އިބޫ. މިއިން އެއްވެސް ބޭފުޅެއްގެ އޮފް ނުކެނޑޭނުންތޯ.ފުވައްމުލައް ސިޓީގެ ކުރީގެ މޭޔަރު ކަމަށް އަބްދުﷲ ފަލާހު ޝަރީފް
މީގެ އިތުރުން ފަލާހު ވަނީ ފުވައްމުލަކުގެ ފެނުގެ ޚިދުމަތް ކެނޑިފައިވާތީ އެކަމުގެ ކަންބޮޑުވުން ވެސް ފާޅު ކުރައްވާފަ އެވެ.
ފަލާހު ވިދާޅުވީ ފެނުގެ މައްސަލަ ދިމާވަމުންދާތާ އަހަރަކަށް ވުރެ ގިނަ ދުވަސް ވެފައިވާ ކަމަށާއި، އެސިޓީގެ ރައްޔިތުން ފެނަށް ޖެއްސީ މަގާމުތަކުގައި ތިއްބެވި ބޭފުޅުން ކަމަށެވެ. އެ ބޭފުޅުން ޒިންމާ ނުނަގާ ކަމަށާއި، ސަރުކާރުން ވަރަށް ބޮޑަށް އިހުމާލު ވެފައިވާ ކަމަށެވެ.
ފަލާހު ވިދާޅުވީ ފުވައްމުލަކަށް ދިމާވި ފެނުގެ މައްސަލަ އަށް ދާއިމީ ހައްލެއް ލިބޭނެ އިރެއް ނޭނގޭ ކަމަށާއި، އެކަމުގެ ފުރިހަމަ މައުލޫމާތު ކަމާކުޅޭ އިދާރާތަކުން ދެމުން ނުދާ ކަމަށެވެ.
