ޒިޔަދަމްގެ މަރު: ޝަނޫންގެ މައްޗަށް ގަސްތުމަރު އަދި ސިފާމްގެ މައްޗަށް ބައިވެރިވިކަމުގެ ކުށް ސާބިތުވެއްޖެ
18 ޑިސެމްބަރު 2022 | އާދީއްތަ 06:06ޒިޔަދަމްއާއި، ސިފާމް އަދި ޝަނޫންއަކީވެސް އެއްކޮށް އުޅުނު 3 މީހުން
މި މައްސަލާގައި ދައުލަތުން ދައުވާ އުފުލާފައިވަނީ ހީނާވިލާ، މުހައްމަދު ޝަނޫނާއި، ބީޗްވިލާ އަލީ ސިފާމްގެ މައްޗަށް
ލ. މުންޑޫ، ނޫވިލު، އަލީ ޒިޔަދަމް މަރާލި މައްސަލައިގައި, 7 އަހަރަށްފަހު ކުށް ސާބިތުވާކަމަށް ނިންމައިފިއެވެ.
ކްރިމިނަލް ކޯޓުގައި މި މައްސަލައާ ގުޅިގެން ދައުވާ އުފުލާފައިވަނީ ލ މުންޑޫއަށް ނިސްބަތްވާ މުޙައްމަދު ޝަނޫންއާއި އަލީ ސިފާމްގެ މައްޗަށެވެ. ދެމީހުންގެ މައްޗަށްވެސް އުފުލާފައިވަނީ ތޫނު އެއްޗެއް ބޭނުންކޮށްގެން ޤަސްދުގައި މީހަކު މެރުމުގެ ކުށުގެ ދައުވާއެވެ.
ކަން ހިނގި ގޮތުގެ ޚުލާސާ:
ދައުލަތުން ހުށައަޅާފައިވާ ހެކިތަކާ ޙަވާލާދީ ޝަރީއަތުން ފާހަގަކޮށްފައިވާ ގޮތުގައި، ޒިޔަދަމްއާއި، ސިފާމް އަދި ޝަނޫންއަކީވެސް އެއްކޮށް އުޅުނު 3 މީހުންނެވެ. މި ޙާދިސާ ހިނގި ރޭ އެމީހުން އެއްކޮށް ތިބީ ބަނގުރާ ބޯން ކަމަށާއި، ހަމަނުޖެހުން އުފެދެން މެދުވެރިވީ ޒިޔަދަމް ސިފާމްގެ ކޮށްކޮއާ ގުޅޭގޮތުން ދެއްކި ވާހަކައަކާއި ގުޅިގެންކަން ޝަރީއަތުން ހެކިތަކާ ޙަވާލާދީ ފާހަގަ ކުރެއްވިއެވެ.
އެވަގުތު ޒުވާބު ކުރުމުގެ ތެރޭގައި އަލީ ޒިޔަދަމްއާއި ސިފާމްއާ ދެމެދު މާރާމާރީ ހިނގަން ފެށުމުން، ޝަނޫންވެސް އައިސް ހަމަނުޖެހުން ހިންގައި، މާރާމާރީ ހިންގާފައިވެއެވެ. އަދި ޝަނޫން ވަނީ ތިލައިގައި 8 އިންޗި ހުންނަ ވަޅިއެއް ޒިޔަދަމްގެ ބުރަކައްޓާއި ފަޔަށް ހަރާފައެވެ. އެހިސާބުން، ޒިޔަދަމް ދުވެފައި ގޮސް އެރަށު ވަގުތީހިޔާގޭގެ ބަދިގެއަށް ވަދެ ދޮރު ލެއްޕުމުންވެސް ޝަނޫންއާއި ސިފާމް ވަނީ އައިސް އޭނާއަށް ޙަމަލާދީ މާރާމާރީ ހިންގާފައެވެ.
އެހެންނަމަވެސް، އެ މާރާމާރީގައި ސިފާމް ބައިވެރިވިނަމަވެސް، އޭނާ ޒިޔަދަމްއަށް ވަޅިން ޙަމަލާދިންތަން ފެނުނުކަމަށް އެއްވެސް ހެކިވެރިއަކު ހެކިބަސް ދީފައެއް ނުވެއެވެ. ބަދިގޭގައި ހުރިއިރު އޭނާ އަތުގައި ވަޅިއެއް އޮތްތަން ފެނުނު ކަމަށް ބުނުން ފިޔަވައި، އެ ބަހަށް ބާރު ލިބިދޭ އިތުރު ހެއްކެއް ނެތެވެ.
ގާޒީގެ ނިންމެވުން:
އޭގެ ތެރެއިން ޝަނޫންގެ މައްޗަށް ވަނީ ތޫނު އެއްޗެއް ބޭނުންކޮށްގެން ޤަސްދުގައި މީހަކު މެރުމުގެ ކުށް އެއްވެސް ޝައްކެއް ނެތް މިންވަރަށް ސާބިތުވާކަމަށް އާދިއްތަ ދުވަހު އޮތް އަޑުއެހުމުގައި މައްސަލަ ބައްލަވާ ގާޒީ ނިންމެވިއެވެ.
އެހެންނަމަވެސް، ސިފާމްގެ މައްޗަށް އެ ކުށް ސާބިތު ކުރެވޭ މިންވަރަށް ކުށުގެ ރުކުންތައް ދައުލަތުން ސާބިތުކޮށްދެވިފައެއް ނުވެއެވެ. އެކަމާ ގުޅިގެން ގާޒީ ވިދާޅުވީ، ޖިނާއީ އިޖުރާއަތުގެ ޤާނޫނުގެ 87 ވަނަ މާއްދާއަށް ބަލާއިރު، ދައުވާ އުފުލާފައިވާ ކުށް ސާބިތުވާ މިންވަރަށް ހެކި ނެތްނަމަވެސް، ކުށުގެ އަމަލުން ފުރިހަމަވާ އެހެން ކުށެއްގެ ރުކުންތައް ސާބިތުވާނަމަ، އެ ކުށެއް އޭނާގެ މައްޗަށް ސާބިތުވާކަމަށް ނިންމިދާނެ ކަމަށެވެ.
އެގޮތުން ބަލާއިރު، ސިފާމްވެސް މި އަމަލު ހިންގުމުގައި އެހީތެރިވެފައިވާކަމާއި، ޒިޔަދަމްއާއި މަރާމާރާރީ ހިންގުމުގެ އިތުރުން، އޭނާ މަރުވެގެން ދިޔަ އަމަލުތައް ހިންގުމުގައި މަގުފަހި ކޮށްދީފައިވާކަން ޝަރީއަތަށް ހުށައެެޅިފައިވާ ހެކިތަކުން ސާބިތުވާކަމަށް ގާޒީ ވިދާޅުވިއެވެ. ވުމާއެކު، ތޫނު އެއްޗެއް ބޭނުންކޮށްގެން ޤަސްދުގައި މީހަކު މެރުމުގައި ބައިވެރިވުމުގެ ކުށް އެކަށީގެންވާ ޝައްކެއް ނެތް މިންވަރަށް ޝަރީއަތަށް ސާބިތުވާކަމަށް ގާޒީ ނިންމެވިއެވެ.
ދެން އޮންނާނީ މި މައްސަލައިގެ ވާރިސުންގެ ބަސް ނެގުމެވެ. އެގޮތުން 10 ދުވަސް ތެރޭގައި އަދަބާ ގުޅޭގޮތުން ގޮތެއް ނިންމެވުމުގެ އަޑުއެހުން ބާއްވަން ޖެހޭކަން ފާހަގަ ކުރައްވައި ގާޒީ ވަނީ، ޒިޔަދަމްގެ ވާރިސުންގެ މައުލޫމާތު ޝަރީއަތަށް ހިއްސާކޮށްދިނުމަށް ދައުލަތުގެ ކިބައިން އެދިލައްވާފައެވެ.
ކްރިމިނަލް ކޯޓުގައި މިހާރު މި މައްސަލަ ބައްލަވަމުން ގެންދަވަނީ ގާޒީ އިސްމާއިލް ޝަފީއުއެވެ. 7 އަހަރަށްވުރެ ގިނަ ދުވަސްވެފައިވާ މި މައްސަލައަކީ ގާޒީ ބައްލަވަމުން ގެންދަވާ މައްސަލަތަކުގެ ތެރެއިން އެންމެ ގިނަ ދުވަސްވީ އެއް މައްސަލައެވެ.
