ލ. މުންޑޫ، ނޫވިލު، އަލީ ޒިޔަދަމް މަރާލި މައްސަލައިގައި, 7 އަހަރަށްފަހު ޙުކުމް ކުރެއްވުމާއި ހިސާބަށް މިވަނީ ގޮސްފައެވެ.
މި މައްސަލައިގައި ޑިސެމްބަރު މަހުގެ 18 ވަނަ ދުވަހު ޙުކުމް ކުރައްވާނެކަމަށް 24 ނޮވެމްބަރުގައި އޮތް އަޑުއެހުމުގައި މައްސަލަ ބައްލަވާ ގާޒީ ވަނީ ވިދާޅުވެފައެވެ. އެގޮތުން ޙުކުމް ކުރެއްވުމުގެ އަޑުއެހުން 18 ޑިސެމްބަރުވާ އާދިއްތަ ދުވަހުގެ ހެނދުނު 09:00ށް ވަނީ ތާވަލު ކުރައްވާފައެވެ.
ކްރިމިނަލް ކޯޓުގައި މި މައްސަލައާ ގުޅިގެން ދައުވާ އުފުލާފައިވަނީ ލ މުންޑޫއަށް ނިސްބަތްވާ މުޙައްމަދު ޝަނޫންއާއި އަލީ ސިފާމްގެ މައްޗަށެވެ. ދެމީހުންގެ މައްޗަށްވެސް އުފުލާފައިވަނީ ތޫނު އެއްޗެއް ބޭނުންކޮށްގެން ޤަސްދުގައި މީހަކު މެރުމުގެ ކުށުގެ ދައުވާއެވެ. އެ ދެ މީހުންގެ މައްޗަށް ދައުވާ އުފުލާފައިވަނީ 2015 ވަނަ އަހަރުގެ މާޗް 20 ވަނަ ދުވަހުގެ ރޭ 10:30 އެހާއިރު އެރަށު ވަގުތީހިޔާ ކައިރިން ޒިޔަދަމް ހިނގާފައި ދަނިކޮށް އޭނާއަށް ޙަމަލާދީ މަރާލާފައިވާކަމަށް ބުނެއެވެ.
ކްރިމިނަލް ކޯޓުގައި މިހާރު މި މައްސަލަ ބައްލަވަމުން ގެންދަވަނީ ގާޒީ އިސްމާއިލް ޝަފީއުއެވެ. މި މައްސަލައަކީ ގާޒީ ބައްލަވަމުން ގެންދަވާ މައްސަލަތަކުގެ ތެރެއިން އެންމެ ގިނަ ދުވަސްވީ އެއް މައްސަލަކަން މީގެ ކުރިން ބޭއްވި އަޑުއެހުމެއްގައި ގާޒީ ޝަފީއު ވަނީ ވިދާޅުވެފައެވެ.
ޒިޔަދަމްގެ މަރަށް 7 އަހަރުވެފައިވާއިރު، މިއަހަރުގެ ތެރޭގައި ވަނީ މި މައްސަލައިގެ ޚުލާސާ ބަޔާންވެސް އިއްވާފައެވެ. 24 ނޮވެމްބަރުގެ އަޑުއެހުމަކީ މި މައްސަލައިގެ ޙުކުމް ކުރެއްވުމުގެ ކުރިން ގާޒީ ސާފު ކުރައްވަން ބޭނުންވާ ކަންކަން ސާފު ކުރެއްވުމަށް ބޭއްވެވި އަޑުއެހުމެކެވެ. އެގޮތުން ޝަރީއަތުން ސާފު ކުރަން ބޭނުންވާ ސުވާލުތައް ގާޒީ ވަނީ ކިޔާދެއްވާފައެވެ. އަދި 4 ޑިސެމްބަރުގެ ކުރިން އެކަންކަމަށް ލިއުމުން ޖަވާބު ދިނުމަށް ގާޒީ ވަނީ ދެފަރާތަށްވެސް އަންގަވާފައެވެ.
ޝަރީއަތުން ސާފު ކުރަން ބޭނުންވި ކަންކަމުގެ ތެރޭގައި، މި މައްސަލައިގައި ޒިޔަދަމްއަށް ޙަމަލާ ދިން ކަމަށް ބުނާ ވަޅި ތަހުގީގުގެ ތެރެއިން ރިކަވަރ ކުރެވުނުތޯ ވަނީ ސުވާލު ކުރައްވާފައެވެ. އަދި އެ ވަޅިއާއި ސިފާމްއާ ގުޅުވާލެވޭ އެއްވެސް ހެއްކެއް އެބަހުރިތޯވެސް ގާޒީ ސުވާލު ކުރެއްވިއެވެ.
ގާޒީ ވަނީ ސިފާމް ވަގުތީހިޔާއަށް ވަންއިރު ދޮރު ފަޅާލާފައި ވަންކަމަށް ސިއްރު ހެކިވެރިޔާ ބުނެފައިވާކަން ފާހަގަ ކުރައްވައި، އެކަމަށް ބާރުދޭ ކަމެއް ހެކިތަކުން ނުވަތަ މައްސަލައިގެ ސީން އޮފް ކްރައިމް ރިޕޯޓުތަކުން ވިޔަސް ހިމެނިފައިވޭތޯ ސުވާލު ކުރައްވާފައެވެ.
މީގެ އިތުރުންވެސް އިތުރު ކަންކަން ޝަރީއަތުން ވަނީ ސާފުކޮށްފައެވެ.
