ބުސްކެޓްސް ގައުމީ ޓީމަށް ކުޅުން ހުއްޓާލައިފި

ސާޖިއޯ ބުސްކެޓްސް, ސްޕެއިންގެ ގައުމީ ޓީމަށް ކުޅުން ހުއްޓާލައިފިއެވެ.

އުމުރުން 34 އަހަރުގެ މިޑްފީލްޑަރު ގައުމީ ޓީމަށް ކުޅުން ހުއްޓާލިކަން އިއުލާންކުރީ ހޮނިހިރު ދުވަހުގެ ވަގުތެއްގައެވެ. ބުސްކެޓްސް ވަނީ މިހާރު ގަތަރުގައި ކުރިއަށްދާ ފީފާ ވޯލްޑް ކަޕް ފުޓުބޯޅަ މުބާރާތުގައިވެސް ސްޕެއިނާއެކު ކުޅެފައެވެ. މިއަހަރުގެ މުބާރާތުގެ ގަދަ 16ން ސްޕެއިން ކެޓިއިރު، ޓީމުގެ ކެޕްޓަނެއްގެ ޒިންމާ އަދާކޮށްފައިވަނީ ވެސް ބުސްކެޓްސްއެވެ.

ކުޅުން ހުއްޓާލިކަން އިއުލާން ކުރަމުން ބުސްކެޓްސް ބުނީ، ގައުމީ ޓީމާއެކު އޭނާ ހޭދަކުރި ދިގު މުއްދަތުގައި އަބަދުވެސް މަސައްކަތް ކޮށްފައިވަނީ ޓީމުގެ ހައްގުގައި ކަމަށެވެ. މީގެ އިތުރުން ބުސްކެޓްސް ބުނީ އޭނާއަށް ގަބޫލުކުރެވޭ ގޮތުގައި މި ވަގުތަކީ ގައުމީ ޓީމާ ދުރަށް ދާން އެންމެ އެކަށީގެންވާ ވަގުތުކަމަށެވެ.

ބުސްކެޓްސް ގައުމީ ޓީމަށް ކުޅެން ފެށީ 2009 ވަނަ އަހަރުއެވެ. އޭގެ ފަހުން މިވީ 13 އަހަރުގެ ތެރޭގައި އޭނާ ވަނީ ގިނަ ކާމިޔާބީތަކެއް ހޯދާފައެވެ. ބުސްކެޓްސް ވަނީ ސްޕެއިނާއެކު 2010 ވަނަ އަހަރުގެ ފީފާ ވޯލްޑް ކަޕް މުބާރާތާއި، 2012 ވަނަ އަހަރުގެ ޔޫރޯ ފުޓުބޯޅަ މުބާރާތް ކާމިޔާބުކޮށްފައެވެ. ހަމައެއާއެކު 21-2020 ވަނަަ އަހަރުގެ ޔުއެފާ ނޭޝަންސް ލީގުގެ ރަނަރަޕްކަން ވެސް ހޯދިއެވެ. ގައުމީ ޓީމަށް އޭނާ ވަނީ 143 މެޗު ކުޅެދީ، 2 ލަނޑު ޖަހާފައެވެ.

ބުސްކެޓްސް ގައުމީ ޓީމަށް ކުޅުން ހުއްޓާލިއިރު، އޭނާ ކުޅެމުން އަންނަ ކުލަބް ބާސެލޯނާއަށްވެސް މި ސީޒަން ނިމުމަށްފަހު ކުޅުން ހުއްޓާލާނެ ކަމުގެ އަޑުތައް ވަނީ ފެތުރިފައެވެ. ނަމަވެސް ކުލަބް ފުޓުބޯޅައިގައި މިހާތަނަށް ބުސްކެޓްސް ވަކި ގޮތެއް ރަސްމީކޮށް ނިންމާފައި ނުވާކަމަށް ރިޕޯޓުތައް ބުނެއެވެ.