ކ. މާލެ
|
15 ޑިސެންބަރ 2022 | ބުރާސްފަތި 07:02
ފްރާންސް އަދި މޮރޮކޯ ކުޅުނު މެޗުގެ ތެރެއިން
ފްރާންސް އަދި މޮރޮކޯ ކުޅުނު މެޗުގެ ތެރެއިން
ރޮއިޓާސް
ފީފާ ވޯލްޑް ކަޕް
އެންމެ ފަހުގެ ޗެމްޕިއަން ފްރާންސް ފައިނަލަށް
 
ފްރާންސް މޮޅުވީ 2-0ން

ފީފާ ވޯލްޑް ކަޕްގެ ސެމީ ފައިނަލުގައި މޮރޯކޯ ބަލިކޮށް އެންމެ ފަހުގެ ޗެމްޕިއަން ފްރާންސް، ފައިނަލަށް ދަތުރުކޮށްފިއެވެ.

އަލް ބައިތު ސްޓޭޑިއަމްގައި ކުޅުނު މި މެޗު ފްރާންސުން ކާމިޔާބުކުރީ 2-0ންނެވެ. ފުރަތަމަ ހާފުގެ ފަސްވަނަ މިނެޓުގައި ފްރާންސަށް ލީޑު ނަގައިދިނީ ތިއޯ ހެނާންޑޭޒްއެވެ. މިއާއެކު މޮރޯކޯއަށް ވަނީ ކުރިއަށް ޖެހިގެން ލަނޑު ޖެހުމަށް މަސައްކަތް ކުރަން މަޖުބޫރު ވެފައެވެ. ނަމަވެސް މެޗުގެ ފަހު ވަގުތާއި ހަމައަށް މޮރޯކޯއިން ކުރި މަސައްކަތް ވަނީ ނާކާމިޔާބު ވެފައެވެ. ފްރާންސްގެ ދެވަނަ ލަނޑަކީ ބަދަލަކަށް ކުޅެން އެރި ރަންޑާލް ކޯލޯ މުއާނީ ކާމިޔާބުކޮށްދިން ލަނޑެކެވެ.

މީގެ ކުރިން ފަސް ފަހަރު މި ދެޓީމު ވަނީ ބައްދަލުކޮށްފައެވެ. އޭގެތެރެއިން ތިން މެޗުން ފްރާންސް މޮޅުވިއިރު އަނެއް ދެމެޗުވީ އެއްވަރެވެ. މިހާތަނަށް މޮރޯކޯ އަތުން ފްރާންސް ބަލިވެފައެއް ނުވެއެވެ.

މިއީ ފްރާންސްގެ ހަތްވަނަ ވޯލްޑް ކަޕް ސެމީ ފައިނަލެވެ. އެންމެ ފުރަތަމަ ސެމީ ފައިނަލުގައި ވާދަކުރި ތިންފަހަރު (1958،1982،1986) އެޓީމުވީ ބައްޔެވެ. އޭގެ ފަހުން (1998،2006،2018) ގައި ކުޅުނު ސެމީފައިނަލް މެޗުތައް އެޓީމުން ކާމިޔާބުކުރިއެވެ.

ސެމީ ފައިނަލުން ބަލިވި ނަމަވެސް މޮރޯކޯއިން މުބާރާތް ނިންމާލާނީ ޝަރަފަކާއެކުއެވެ. މޮރޯކޯއަކީ އިސްލާމީ އަދި އެފްރިކާ ބައްރުގެ ގައުމަކުން ވޯލްޑް ކަޕްގެ ސެމީ ފައިނަލުގައި ވާދަކުރި ފުރަތަމަ ގައުމެވެ. ތިންވަނަ ހޮވާ މެޗުގައި ހޮނިހިރު ދުވަހުގެރޭ މޮރޯކޯ ވާދަކުރަން ޖެހޭނީ ފުރަތަމަ ސެމީ ފައިނަލުން ބަލިވި ކްރޮއޭޝިޔާއާއެވެ.

ފައިނަލުގައި ފްރާންސް ވާދަކުރަން ޖެހޭނީ އާޖެންޓީނާއާއެވެ. ފްރާންސް އަދި އާޖެންޓީނާވެސް ވަނީ މުބާރާތުގެ ތަށި ދެފަހަރު ކާމިޔާބުކޮށްފައެވެ. އެހެންކަމުން މި ދެޓީމުވެސް ނުކުންނާނީ ތިންވަނަ ފަހަރަށް މުބާރާތް ކާމިޔާބު ކުރުމަށެވެ. މުބާރާތުގެ ފައިނަލް މެޗު އޮންނާނީ އާދީއްތަ ދުވަހުގެރޭ ރާއްޖެ ގަޑިން އަށެއް ޖަހާއިރުއެވެ.

އެންމެ ފަހުން އަޕްޑޭޓް ކުރީ: 3 ހަފްތާ ކުރިން
ރިވިއު ކުރީ: މަރްޔަމް ދާނިޝް ނަޝީދު
0%
0%
0%
0%
0%
100%
ކޮމެންޓް