ސްޕެއިންގެ ގައުމީ ޓީމުން އިސްތިއުފާދިނުމަށްފަހު މިހާރު ބޭނުންވަނީ އަލުން އެނބުރި ކުލަބު ފުޓުބޯޅައަށް އަންނަންކަމަށް، ލުއިސް އެންރީކޭ ބުނެފިއެވެ.
އުމުރުން 52 އަހަރުގެ އެންރީކޭ އެންމެ ފަހުން ހުރީ ސްޕެއިންގެ ގައުމީ ޓީމުގެ ކޯޗުކަމުގެ މަގާމުގައެވެ. އެ މަގާމުން އޭނާ އިސްތިއުފާދިނީ މުބާރާތުގެ ގަދަ 16ގައި މޮރޮކޯ އަތުން ބަލިވުމާއެކުއެވެ. ސްޕެއިންގެ ކޯޗުކަމާ އެންރީކޭ ހަވާލުވީ 2018 ވަނަ އަހަރުއެވެ. އޭގެ ފަހުންވެސް އެންރީކޭއަށް ވަނީ އެކި ފަހަރު މަތިން ކުލަބުތަކުގެ ހުށަހެޅުންތައް ލިބިފައެވެ. ނަމަވެސް އޭނާ ބުނަމުން އައީ ސްޕެއިނާއެކު ވޯލްޑް ކަަޕަށް ފޯކަސްކުރަމުން އަންނަ ވާހަކައެވެ.
ވޯލްޑް ކަޕް ފެށެން ކުޑަ ދުވަސްކޮޅަކަށްވެފައި ވަނިކޮށް، އެންރީކޭ އެތުލެޓިކޯ މެޑްރިޑާ ހަވާލުވާނެ ކަމުގެ އަަޑުތައްވެސް ފެތުރުނެވެ. ރިޕޯޓުތައް ބުނިގޮތުގައި ވޯލްޑް ކަޕަށްފަހު އެތުލެޓިކޯއާ ހަވާލުވުމަށް އެންރީކޭ ވަނީ އެ ކުލަބުގެ އިސްވެރިންނާއި ބައެއް ކުޅުންތެރިންނާއެކު ސިއްރު ބައްދަލުވުންތަކެއްވެސް ބާއްވާފައެވެ.
ސްޕެއިންގެ ކޯޗުކަމުން އިސްތިއުފާދިނުމަށްފަހު އިބާއީއަށް ދިން އިންޓަވިޔުއެއްގައި އެންރީކޭ ބުނީ، މިހާރު އޭނާ ބޭނުންވަނީ ކުލަބް ފުޓުބޯޅައަށް އަންނަން ކަަމަށެވެ. އޭނާ ބުނީ ސްޕެއިންގައި ލިބުނު ތަޖުރިބާއާއެކު ކުލަބަކާ ހަވާލުވާން ބޭނުންވާކަމަށެވެ. މިއީ ސްޕެއިންގެ ކޯޗުކަމުން އިސްތިއުފާ ދިނުމަށްފަހު އެންރީކޭ މިފަދައިން ވާހަކަ ދެއްކި ފުރަތަމަ ފަހަރެވެ.
އެންމެ ފަހުން އެންރީކޭ ކޯޗުކަން ކޮށްދިން ކުލަބަކީ ސްޕެއިންގެ ބާސެލޯނާއެވެ. 2014 ވަނަ އަހަރު އެ ކުލަބާ ހަވާލުވުމަށްފަހު އޭނާ ބާސެލޯނާ ދޫކޮށްލީ 2017 ވަނަ އަހަރުއެވެ. އޭރު އޭނާ ވަނީ ބާސެލޯނާއެކު ގިނަ ކާމިޔާބީތަކެއްވެސް ހޯދާފައެވެ. ބާސެލޯނާއާއެކު އެންރީކޭ ވަނީ 10 ތަށި ކާމިޔާބުކޮށްފައެވެ.
