އަމިއްލަ ދަނޑުގައި މޮޅުވެ، ޕީއެސްޖީ އަށް ފައިނަލަށް ދެވޭނެ: އެންރީކޭ

ޔުއެފާ ޗެމްޕިއަންސް ލީގުގެ ސެމީ ފައިނަލްގެ ފުރަތަމަ ލެގުން ބަލިވި ނަމަވެސް، އަމިއްލަ ދަނޑުގައި ކުޅޭ ދެ ވަނަ ލެގުން މޮޅުވެ، ފްރާންސްގެ ޕެރިސް ސެއިންޓް ޖާމަން (ޕީއެސްޖީ) އަށް ފައިނަލަށް ދެވޭނެ ކަމުގެ ޔަގީންކަން އޮތް ކަމަށް އެ ޓީމުގެ ކޯޗު ލުއިސް އެންރީކޭ ބުނެފި އެވެ.

އޭނާ މިހެން ބުނީ ޑޯޓްމަންޑުގެ އަމިއްލަ ދަނޑުގައި ކުޅުނު ފުރަތަމަ ލެގުގައި ޕީއެސްޖީ 1-0 އިން ބަލިވި މެޗަށްފަހު އޮތް ނޫސްވެރިންގެ ބައްދަލުވުމުގައި ވާހަކަ ދައްކަމުންނެވެ.

އެންރީކޭ ބުނީ، އެންމެނަށް ވެސް ފެނުނީ ދެ ޓީމު ވެސް ވަރަށް ރަނގަޅު ކުޅުމެއް ކުޅުނު މަންޒަރު ކަމަށާއި، ދެ ޓީމަށް ވެސް ބޯޅަ ލިބޭ ވަގުތުގައި ރަނގަޅަށް ކުޅެފައިވާ ކަމަށެވެ. މެޗުގައި ދެ ޓީމުން ވެސް ލަނޑު ޖަހާނެ ގިނަ ފުރުސަތުތަކެއް ތަނަވަސްކުރިކަން ފާހަގަކޮށް އެންރީކޭ ބުނީ، ލަނޑު ޖެހުމުގެ ނަސީބު ލިބުނީ ހަމައެކަނި އިދިކޮޅު ޓީމަށް ކަމަށެވެ. ޕީއެސްޖީ އަށް މެޗުގައި ލިބުނު ފުރުސަތުތައް ނިންމާ ނުލެވުނީ ނަސީބު ދެރެވުމުން ކަމަށް ވެސް އޭނާ ވަނީ ބުނެފަ އެވެ.

މުބާރާތުގެ ގަދަ 16 ވަނަ ބުރު އަދި ކުއާޓާ ފައިނަލްގެ މެޗުތަކަށް ބަލާއިރު، ޑޯޓްމަންޑުން ދެ ވަނަ ލެގު ކުޅެން ޖެހުނީ އެމީހުންގެ އަމިއްލަ ދަނޑުގައި ކަމަށް އެންރީކޭ ބުންޏެވެ. އެއާ ޚިލާފަށް، ސެމީ ފައިނަލްގެ ދެ ވަނަ ލެގު ޕީއެސްޖީގެ ދަނޑުގައި ކުޅެން ޖެހުމަކީ، ޕީއެސްޖީ އަށް އެކަމުގެ ފައިދާ ނެގޭނެ ކަމެއް ކަަމަށް ވެސް އޭނާ ބުންޏެވެ.

އެންރީކޭ ބުނީ އޭނާ އަށް އޮތް ޔަގީންކަމަކީ، ފުރަތަމަ ލެގުގައި ހެދުނު ކުދި ކުދި ގޯސްތައް ރަނގަޅުކޮށްލައި، ޕީއެސްޖީ އަށް ދެ ވަނަ ލެގު ކާމިޔާބު ކުރެވޭނެ ކަމުގެ ޔަގީންކަން ކަމަށެވެ. ޚާއްސަކޮށް ޕީއެސްޖީގެ އަމިއްލަ ސަޕޯޓަރުންގެ ކުރިމަތީގައި އެންމެ ބޭނުންވާ ނަތީޖާ ނެރެވޭނެ ކަމުގެ އުންމީދު ބޮޑު ކަމަށް ވެސް އޭނާ ބުންޏެވެ.

ޕީއެސްޖީގެ ދަނޑުގައި ކުޅޭ ދެ ވަނަ ލެގުގެ މެޗު އޮންނާނީ އަންނަ ހަފުތާގެ އަންގާރަ ދުވަހުގެ ރޭ އެވެ.