އުރީދޫ ފުޓްބޯލް ފޯރި ލަކީޑްރޯއިން ހޮވުނު ހަތަރު ނަސީބުވެރިންނާ ޓިކެޓް ހަވާލުކޮށްފި

މިހާރު ކުރިއަށްދާ ފީފާ ވޯލްޑް ކަޕް 2022 އާ ގުޅުވައިގެން އުރީދޫ އިން ކުރިއަށްގެންދިޔަ "ފުޓްބޯލް ފޯރި" ލަކީޑްރޯއިން ހޮވުނު ހަތަރު ނަސީބުވެރިންނާ ޓިކެޓް ހަވާލުކޮށްފިއެވެ.

ލަކީޑްރޯއިން ހޮވުނު ފަރާތްތަކަށް އުރީދޫ އިން ދީފައިވަނީ ވޯލްޑްކަޕްގެ ސެމީ ފައިނަލުގައި ފްރާންސްއާއި މޮރޮކޯ ބައްދަލު ކުރާ މެޗުގެ ޓިކެޓެވެ. ބުދަ ދުވަހުގެ ރޭ ދަންވަރު 12:00 ގައި ފަށާ މި މެޗު ލައިވްކޮށް ބަލާލުމަށް އެ ފަރާތްތަކުން ޤަތަރަށް ފުރާނެއެވެ.

މި ހާއްސަ ލަކީޑްރޯއަކީ ސުޕަރނެޓް އަދި ޕޯސްޓްޕެއިޑް ކަސްޓަމަރުންނާއި ޕްރީޕެއިޑް ރީޗާޖް ކުރި ކަސްޓަމަރުންނާއި އުރީދޫ ބިލަށް ފައިސާ ދެއްކުމާއި މޫލީ މެދުވެރިކޮށް ވިޔަފާރި ކުރާ ކަސްޓަމަރުން ނުވަތަ އެމް-ފައިސާގެ ހިދުމަތުގެ މުއާމަލާތްކުރާ ކަސްޓަމަރުން ހިމެނޭ ގޮތަށް މި އަހަރުގެ އޮގަސްޓް މަހުގެ 2 ވަނަ ދުވަހުން ފެށިގެން 31 އޮކްޓޯބަރު 2022 ގެ ނިޔަލަށް ކުރިއަށްގެންދިޔަ ލަކީޑްރޯއެކެވެ. 

އުރީދޫ ފުޓްބޯލް ފޯރި ލަކީ ޑްރޯ ގެ ނަސީބުވެރިން އެންމެ ފުރަތަމަ ހޮވާފައިވަނީ 7 ނޮވެމްބަރު 2022 ގައި ރާއްޖެ ޓީވީގެ ރޯޑް ޓު ވޯލްޑްކަޕް ޝޯގައި ލައިވްކޮށެވެ. ފުރަތަމަ ހޮވުނު ނަސީބުވެރިންގެ ތެރެއިން ބައެއްފަރާތްތަކަށް ދަތުރު ނުކުރެވޭތީ 12 ޑިސެމްބަރު 2022 ގައި ރީޑްރޯ އެއް ނަގާފައިވާ ކަމަށް އުރީދޫއިން މައުލޫމާތުދެއެވެ.

މި ރީޑްރޯއާއެކު ޤަތަރަށް ދަތުރުކުރާ ނަސީބުވެރިންގެ ގޮތުގައި ހޮވިފައިވަނީ އުރީދޫގެ ޕްރީޕެއިޑް ކަސްޓަމަރުން ކަމަށްވާ މުހައްމަދު އަބްދުލް ސައްތާރު އާއި އަހުމަދު މައުރޫފް އާއި، އަހުމަދު ޝިހާމް އަދި ޕޯސްޓްޕެއިޑް ކަސްޓަމަރެއް ކަމަށްވާ ހާފިޒް ސައީދެވެ. މި ހަތަރު މީހުންނަށް މެޗުގެ ޓިކެޓުގެ އިތުރުން ޤަތަރަށް ރިޓާން ޓިކެޓާއި އެކޮމޮޑޭޝަން ވެސް އުރީދޫއިން ވަނީ ހަމަޖައްސާފައެވެ. އަދި މި ހަތަރު ނަސީބުވެރިންނަށް ޤަތަރުގައި 4 ދުވަހާއި 3 ރޭ ތިބޭއިރު ފީފާ ވޯލްޑް ކަޕް 2022 ގެ ހަރަކާތްތަކުގެ އިތުރުން ދޯހާ ސިޓީގެ ރީތިކަމާއި ސަގާފަތް ތަޖުރިބާކޮށްލުމުގެ ފުރުސަތު ލިބިގެންދާނެ ކަމަށް ވެސް އުރީދޫއިން މައުލޫމާތުދެއެވެ.

މިއީ އުރީދޫ ފުޓްބޯލް ފޯރީ ކެމްޕެއިންގެ ދަށުން ރާއްޖޭގެ އެކި ކަންކޮޅުތަކުގައި ތިބި ރައްޔިތުންނަށް އުފާވެރި އަދި ކުލަގަދަ ވޯލްޑް ކަޕް ގެ ތަޖުރިބާ އެއް ހޯދައިދިނުމުގެ މަގްސަދުގައި ފެށި ގިނަ ހަރަކާތްތަކާއި ހާއްސަ އޮފަރ ތަކުގެ ތެރޭގައި ހިމެނޭ ހަރަކާތެކެވެ. މި ލަކީޑްރޯގެ އިތުރުން އުރީދޫ މޯލްޑިވްސް އިން ވަނީ އެ ކުންފުނީގެ ބްރޭންޑް އެމްބެސެޑަރު ހަބޭސް ބޮޑުބެރު ގްރޫޕާއެކު ހާއްސަ ލަވައެއް ތައާރަފްކޮށްފައެވެ.

މީގެ އިތުރުން އުރީދޫ އިން ވަނީ އާޓިފިޝަލް ބީޗްގައި ކުޑަކުދިންނަށް ހާއްސަ ފުޓުބޯޅައިގެ ހަވީރެއްވެސް ބާއްވާފައެވެ. އަދި ފީފާ ވޯލްޑް ކަޕް ގެ ތަޖުރިބާ އިތުރަށް ފުރިހަމަކޮށް، މެޗުތަކުގެ އުފާ ގިނަ ބަޔަކަށް ހޯދައިދިނުމުގެ ގޮތުން ރާއްޖޭގެ މީހުން ދިރިއުޅޭ ކޮންމެ ރަށެއްގައި އުރީދޫ ފޭން ޒޯންތައްވެސް ވަނީ ގާއިމުކޮށްފައެވެ.