ދުނިޔޭގެ ފުޓުބޯޅައިގެ މައި އިދާރާ (ފީފާ) އިން ލެޖެންޑް ކަޕެއް ބާއްވަން ނިންމައި، ގުރު ނަގައިފިއެވެ.

އާދިއްތަ ދުވަހުގެ ރޭ ޤަތަރުގެ ވެރިރަށް ދޯހާގައި ބޭއްވި ރަސްމިއްޔާތުގައި ފީފާގެ ރައީސް ޖިއާނީ އިންފަންޓީނޯގެ އިތުރުން ފުޓުބޯޅަ ލެޖެންޑުން ވެސް ވަނީ ބައިވެރިވެފައެވެ. އޭގެ ތެރޭގައި ބްރެޒިލްގެ ފުޓުބޯޅަ ލެޖެންޑް ރޮބާޓޯ ކާލޯސް ވެސް ހިމެނެއެވެ. ލެޖެންޑް ކަޕްގައި ޖުމުލަ 100 އަށްވުރެ ގިނަ ފުޓުބޯޅަ ލެޖެންޑުން ބައިވެެރިވާން ވަނީ ނިންމާފައެވެ.

ލެޖެންޑް ކަޕް ބާއްވަން ނިންމާފައިވަނީ މިހާރު ޤަތަރުގައި ކުރިއަށްދާ ފީފާ ވޯލްޑް ކަޕް ފުޓުބޯޅަ މުބާރާތުގެ ފައިނަލްގެ ދެ ދުވަސް ކުރިންނެވެ. މުބާރާތުގެ ފައިނަލް މެޗު ކުޅުމަށް ހަމަޖެހިފައިވަނީ މި މަހުގެ 18 ވަނަ ދުވަހު ލުސައިލް ސްޓޭޑިއަމްގައެވެ. ލެޖެންޑް ކަޕް ކުރިއަށް ދާނީ މި މަހުގެ 15 އިން 16 އަށެވެ. ދެ ދުވަހުގެ މުއްދަތަށް ކުރިއަށްދާ މި ކަޕްގައި އަށް ޓީމަކުން ވާދަކުރާނެއެވެ.

މުބާރާތުގައި ކުރީގެ މަޝްހޫރު ގިނަ ކުޅުންތެރިން ވެސް ބައިވެރިވާން ވަނީ ނިންމާފައެވެ. އޭގެ ތެރޭގައި ސްޕެއިން އަދި ރެއާލް މެޑްރިޑުގެ ލެޖެންޑްރީ ގޯލް ކީޕަރު އިކާ ކަސިއަސް، ސްޕެއިން އަދި ބާސެލޯނާގެ ކުރީގެ ޑިފެންޑަރު ކާލްސް ޕުޔޯލް، ބްރެޒިލްގެ ކަފޫ، އިޓަލީގެ ފްރެންޗެސްކޯ ޓޮޓީ، ބްރެޒިލްގެ ކަކާ، އައިވަރީ ކޯސްޓުގެ ޑިޑިއޭ ޑްރޮގްބާ، މޮރޮކޯގެ މަހްދީ ބެނާޓިއާ، އޮމާންގެ ގޯލް ކީޕަރި އަލީ އަލް ހަބްސީ އަދި އިންގްލެންޑުގެ ޖޯން ޓެރީ ފަދަ ލެޖެންޑުން ހިމެނެއެވެ.

މި މުބާރާތުގެ ގުރު ނެގުމަށް ބޭއްވި ރަސްމިއްޔާތުގައި އިންފަންޓީނޯ ވަނީ މިއަހަރުގެ ވޯލްޑް ކަޕްގައި ބާކީ އޮތް ހަތަރު ޓީމަށް މަރުޙަބާ ވިދާޅުވެފައެވެ. އެއީ އެންމެ ފަހުގެ ޗެމްޕިއަން ފްރާންސް، އެންމެ ފަހުގެ ރަނަރަޕް ކްރޮއޭޝިއާ، އާޖެންޓީނާގެ އިތުރުން މޮރޮކޯއެވެ. މިއަހަރުގެ މުބާރާތުގެ ސެމީ ފައިނަލްގައި އާޖެންޓީނާ ނުކުންނާނީ ކްރޮއޭޝިއާއާ ދެކޮޅަށެވެ. ފްރާންސް ނުކުންނާނީ މޮރޮކޯއާ ދެކޮޅަށެވެ. ސެމީ ފައިނަލްގެ މެޗުތައް ފަށާނީ އަންގާރަ ދުވަހުއެވެ.