ސިމާއޯ ކޯސްޓާ އަށް 40،000 ޑޮލަރު ދޭން ފީފާ އިން އަންގައިފި

ޤައުމީ ފުޓުބޯޅަ ޓީމުގެ ކުރީގެ އެސިސްޓެންޓް ކޯޗު ސިމާއޯ ކޯސްޓާ އަށް ބަދަލުދޭން ފީފާ އިން ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އަށް އަންގައިފިއެވެ.

ޤައުމީ ޓީމުގެ އެސިސްޓެންޓް ކޯޗުކަމުގެ މަގާމަށް ސިމާއޯ ހަމަޖެއްސީ މިދިޔަ އަހަރުގެ ޑިސެމްބަރު މަހުއެވެ. އެއީ އޭރު ޤައުމީ ޓީމާ ހަވާލުވި މިހާރުގެ ކޯޗު ފްރެންޗެސްކޯ މޮރިއޭރޯގެ އެސިސްޓެންޓެއްގެ ގޮތުގައެވެ. ނަމަވެސް މިއަހަރުގެ ޖެނުއަރީ މަހުން ފެށިގެން ސިމާއޯ މަސައްކަތް ކޮށްފައިވާ ހަތް މަސް ދުވަހަށް އޭނާ އަށް އެފްއޭއެމް އިން މުސާރަ ދީފައެއް ނުވެއެވެ. ސިމާއޯ އަށް ބަދަލުދޭން ފީފާ އިން އެންގީ ހޮނިހިރު ދުވަހުއެވެ.

މުސާރަ ނުދިނުމުގެ މައްސަލަ ސިމާއޯގެ ފަރާތުން ފީފާ އަށް ހުށަހެޅީ މިއަހަރުގެ ސެޕްޓެމްބަރު މަހުގެ ތެރޭގައެވެ. ފީފާ އިން އެ މައްސަލަ ބެލުމަށްފަހު މިހާރު ވަނީ ސިމާއޯ އަށް ބަދަލުދިނުމަށް އެފްއޭއެމަށް އަންގާފައެވެ. ފީފާ އިން އެންގީ ސިމާއޯ އަށް 40،000 (ސާޅީސް ހާސް) ޑޮލަރު ދެއްކުމަށެވެ. ސިމާއޯ އަށް ފައިސާ ދެއްކުމަށް ފީފާ އިން އެފްއޭއެމަށް ދީފައިވަނީ 45 ދުވަހުގެ މުއްދަތެކެވެ.

މުސާރަ ނުދެވުމުގެ ސަބަބުން ސިމާއޯ ވަނީ ސެޕްޓެމްބަރު މަހު އެސިސްޓެންޓް ކޯޗުކަމުން އިސްތިއުފާ ދީފައެވެ. ސިމާއޯގެ އިތުރުން ވެސް ޤައުމީ ޓީމުގައި ކުރިން މަސައްކަތްކޮށްފައިވާ ކޯޗުންނާއި، އެސިސްޓެންޓް ކޯޗުންނަށް ބަދަލުދޭން ވެސް ފީފާ އިން އެފްއޭއެމަށް އެންގިއެވެ. މީގެ ތެރެއިން ޤައުމީ އަންހެން ޓީމުގެ ކޯޗަކަށް ގެނައި ސާބިއާގެ ޑޭވޯ ބާބާ އަށް ބަދަލުގެ ގޮތުގައި ދައްކަން ޖެހޭ ފައިސާ އެފްއޭއެމުން ވަނީ ދައްކާފައެވެ.

ކޯޗުންނަށް މުސާރަ ނުދެވުމުގެ އިތުރުން އެފްއޭއެމްގެ މާލީ އެހެނިހެން މައްސަލަތައް ވެސް މި ފަހުން ވަނީ ފެންމަތިވެފައެވެ.