މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ރިޒަރވް ބޭންކް އޮފް އިންޑިއާއެކު 200 މިލިއަން ޑޮލަރުގެ ކަރަންސީ ސްވަޕް އެގްރީމަންޓެއްގައި ސޮއިކޮށްފިއެވެ.
އެމްއެމްއޭއިން ބުނީ މި އެއްބަސްވުމަކީ ސާކުގެ ކަރަންސީ ސްވަޕް ފްރޭމްވޯކުގެ ދަށުން ސޮއިކުރެވުނު އެއްބަސްވުމެއް ކަމަށެވެ. މީގެ ސަބަބުން އެމްއެމްއޭއަށް 200 މިލިއަން ޑޮލަރާ ހަމައަށް ރިޒަރވް ބޭންކް އޮފް އިންޑިއާއިން ޑޮލަރު ނެގޭނެ ކަމަށް އެ އިދާރާއިން ބުނެއެވެ.
މި އެއްބަސްވުމުގެ ސަަބަބުން ރާއްޖޭގައި ބޭރު ފައިސާގެ ރިޒާވް ހިފެހެއްޓުމަށް އެހީ ލިބިގެންދާނެ ކަމަށް ވެސް އެމްއެމްއޭއިން ބުނެއެވެ.
ތަފާސްހިސާބުތައް ދައްކާ ގޮތުގައި ނޮވެމްބަރު މަހުގެ ނިޔަލަށް ރާއްޖޭގެ ރިޒާވުގައި ހުރީ 604 މިލިއަން ޑޮލަރެވެ. މީގެ ތެރެއިން ބޭނުން ކުރެވޭ ނުވަތަ ޔޫޒަބަލް ރިޒާވުގެ ގޮތުގައި ހުރީ 219 މިލިއަން ޑޮލަރެވެ.
ކަރަންސީ ސްވަޕް އެގްރީމަންޓުގެ ދަށުން އެމްއެމްއޭއިން ރިޒަރވް ބޭންކް އޮފް އިންޑިއާއިން ނަގާ ޑޮލަރަށް ވާ އަދަދަށް ދިވެހި ފައިސާ އެ ބޭންކުގައި ބަހައްޓާނެއެވެ.
