ރާއްޖޭގެ ވައި ނުސާފުވުމުގައި ސަރަޙައްދީ އަދި ލޯކަލް ސަބަބުތައްވެސް ހިމެނޭކަމަށް އެންވަޔަރަމަންޓް މިނިސްޓްރީން ބުނެފިއެވެ.

ދިވެހިރާއްޖޭގެ ވައި ނުސާފުވުމާ ގުޅިފައިވާ ކަންތައްތަކާއި ގުޅޭގޮތުން މިނިސްޓްރީން ނެރުނު ބަޔާނެއްގައި ބުނީ، ވައި ނުސާފުވުމަށް ދިމާވާ ސަބަބުތަކުގެ ތެރޭގައި "ލޯކަލް" އަދި ސަރަހައްދީ ގައުމުތަކުގެ ވައި ތަޣައްޔަރުވުން ހިމެނޭ ކަމަށެވެ. އެގޮތުން "ލޯކަލް" ވައި ނުސާފުވުމަކީ ދިވެހިރާއްޖޭގައި މިހާރު ދިމާވެފައިވާ ބޮޑު ކަންބޮޑުވުމެއްކަން ފާހަގަކޮށް މިނިސްޓްރީން ބުނީ، ދިވެހިރާއްޖޭގެ ވައި ތަޣައްޔަރުވުމަށް ކުރިމަތިވާ މައިގަނޑު ސަބަބުތަކަށް ބަލާއިރު އިންޖީނުލީ އުޅަނދުތަކުން ބޭރުކުރާ ދުމާއި، ކަރަންޓު އުފެއްދުމާއި، އިމާރާތްކުރުމުގެ ސިނާއަތް ހިމެނޭ ކަމަށެވެ.

މިނިސްޓްރީން ބުނީ، މި ދުވަސްވަރު ދިވެހިރާއްޖެއަށް ކުރިމަތިވެފައިވާ ވައި ނުސާފުވުމަކީ ހުޅަނގުން އިރަށް ވައި ބަދަލުވުމާއި ގުޅިގެން އިރުދެކުނު އޭޝިއާ ސަރަހައްދުން އަންނަ ހިރަފުހާއި ދުމުގެ ސަބަބުން ދިމާވެފައިވާ ވައި ނުސާފުވުމެއް ކަމަށެވެ. އެގޮތުން ސަރަހައްދީ ވައި ނުސާފުވުމަކީ މޫސުމާ ގުޅިފައިވާ ކަމެއްކަމަށް މިނިސްޓްރީން މައުލޫމާތު ދެއެވެ.

އަދި ޑިސެމްބަރު މަހާއި އޭޕްރީލް މަހަކީ ދެމޫސުން ބަދަލުވާ ދުވަސްކޮޅެއް ކަމަށްވާއިރު، ކޮންމެ އަހަރެއްގެ ވެސް މޫސުން ބަދަލުވާ މުއްދަތުގައި ދިވެހިރާއްޖޭގެ ވައި ނުސާފުވެ، ފުސްކަން އިތުރުވެގެންދާކަމަށް މިނިސްޓްރީން ބުނެއެވެ.

މީގެ އިތުރުން މި ދުވަސްވަރަކީ ދެކުނު އިންޑިއާގެ ފިނި މޫސުން ފެށުމާ ދިމާކޮށް ދަނޑުވެރިން ފަޅު އެންދުމުގެ މަސައްކަތްވެސް ކުރިއަށް ގެންދާ ދުވަސްވަރެއްކަން ފާހަގަކޮށް މިނިސްޓްރީން އިތުރަށް ބުނީ، ދިރާސާތަކުން ދައްކާ ގޮތުގައި އިންޑިއާ ކަނޑުގެ އުތުރުން ދައުރުވެގެން އަންނަ ނުސާފު ވައި، ދިވެހިރާއްޖެއާ ހަމައަށް ފޯރައި، ދިވެހިރާއްޖޭގެ ވައި ތަޣައްޔަރުކުރުވާ ކަމަށެވެ. މިނިސްޓްރީން ބުނާ ގޮތުގައި މީގެ އަސަރުތައް އެންމެ ބޮޑަށް ކުރަނީ އުތުރާއި މެދުރާއްޖެތެރޭގެ ސަރަހައްދުތަކަށެވެ.

ރާއްޖެއަށް ވައި ނުސާފުވެފައިވާ މިންވަރު ބަލައި، ރައްކާތެރިކަމުގެ ފިޔަވަޅުތައް އެޅުމަށް ހެލްތު ޕްރޮޓެކްޝަން އެޖެންސީ(އެޗްޕީއޭ) އިންވެސް ވަނީ އިލްތިމާސްކޮށްފައެވެ.

މިނިސްޓްރީ އޮފް އެންވަޔަރަންމަންޓް އެންޑް ޓެކްނޮލޮޖީގެ އައިކިޔު އެއާ ވިޝުއަލް އެޕް މެދުވެރިކޮށް މިދުވަސްވަރު ރާއްޖޭގެ ވައިނުސާފުވާ މިންވަރު ބަލައިލެވޭނެއެވެ. ވައިގެ ސާފުމިން ވަޒަންކުރާ "އައިކިއު އެއާ" އިން 6 މިންގަނޑަކުން ވައިގެ ސާފުމިން ބަލާއިރު، އެ ރާއްޖޭގެ ބައެއް ސަރަޙައްދުތަކުގެ ވައިގެ ތަޣައްޔަރުކަން މިހާރު ހުރީ ތިން ވަނަ ދަރަޖައިގައެވެ.

ވައި ނުސާފު ވަގުތުގައި ސަމާލުކަން ދޭންވީ ކަންތައްތަކުގެ ތެރޭގައި ފުއްޕާމޭގެ ބަލިތަކާއި ހިތުގެ ބަލި އަދި އެލާޖީ މައްސަލަތައް ހުންނަ މީހުން ގެއިން ބޭރުގައި ގިނަ ވަގުތު ހޭދަ ނުކުރުމާއި ކުޑަކުދިންނާއި ދޮށީ އުމުރުގެ މީހުންނާއި މާބަނޑު މީހުން ބޭރުގައި ގިނަ ވަގުތު ހޭދަ ނުކުރުން ހިމެނެއެވެ.

ވައިގެ ތެރޭގައި ދައުރުވާ ލޮލަށް ފެންނަވަރުގެ ކުނޑި، ހިރަފުސް އަދި ދުމުގެ އިތުރުން ވައިގެ ތެރޭގައި ދއުރުވާ ލޮލަށް ނުފެންނަ ކުނޑި އަދި ދިޔާ ތަކެއްޗަކީ ނޭވާލުމުގެ ނިޒާމުން ހަށިގަނޑަށްވަދެ ފުއްޕާމެއާއި ހަމައަށް ވާސިލުވެ، ސިއްޙަތަށް ނުރައްކާ ކުރުވާ އެއްޗެކެވެ.