ޕާކިސްތާނުގެ "މިނީ ބްރެޒީލް" ގެ ޢުއްމީދު، ޙަޤީޤަތަކަށް ވެދާނެބާ؟

ލިޔާރީގެ ހިރަފުސް ބޯ މަގުތައް މަތީގައި ޒުވާން ފުރައިގެ ފިރިހެން ކުދިން ބޯޅައެއްގައި ކޮއްޓަމުން ދިޔައިރު، ވައިގެ ތެރޭގައި ވިހުރެމުން ދިޔައީ ޤަޠަރުގައި މިހާރު ކުރިއަށްދާ ވޯލްޑްކަޕް ފުޓުބޯޅަ މުބާރާތުގައި ވާދަ ކުރާ ޤައުމުތަކުގެ ދިދަތަކެވެ. ޕާކިސްތާނުގައި އޮތެއް ކަމަކު، މި އަވަށަށް ނިސްބަތް ކުރަނީ "މިނީ ބްރެޒީލް"ގެ ނަމުންނެވެ. އެ ސަރަޙައްދުގައި ފުޓުބޯޅައަށް ދެވިފައި އޮތް ހާއްސަ ލޯތްބެއްގެ ސަބަބުންނެވެ.

ލިޔާރީއަކީ ޕާކިސްތާނުގެ ބަނދަރުމަތީ ސިޓީއެއް ކަމަށް ވާ ކަރާޗީގެ އެންމެ ފަޤީރު އަވަށްތަކުގެ ތެރޭގައި ގުނާލެވޭ އަވަށެކެވެ. ނަމަވެސް ކޮންމެ 4 އަހަރަކުން 1 އަހަރު، މި އަވަށަށްވެސް ފުޓުބޯޅައިގެ ޢީދު އާދެއެވެ. ބްރެޒީލްއާއި، ސްޕެއިން އަދި ޕޯޗުގަލްގެ ޤައުމީ ކުލަތަކުން އަވަށް އިތުރު ދިރުމެއް ގެނެސް ދެނީ ފުޓުބޯޅައަށް އިންތިހާ ލޯބި ކުރާ އަވަށުގެ ރަށްވެހިންގެ އަމިއްލަ މަސައްކަތުންނެވެ.

މި ފަހަރުގެ ވޯލްޑްކަޕްއާ ދިމާކޮށް ލިޔާރީއިން ފެނިގެންދާ ކުރެހުންތަކުގެ ތެރޭގައި ޕޯޗުގަލްގެ ތަރި ކްރިސްޓިއާނޯ ރޮނާލްޑޯ، އާޖެންޓީނާގެ ލައޮނަލް މެސީ އަދި ބްރެޒީލްގެ ތަރި ނޭމާ ފަދަ ކުޅުންތެރިންގެ ފޮޓޯތައް ހިމެނެއެވެ.

ޕާކިސްތާނަކީ އަދި މިހާތަނަށް، ވޯލްޑް ކަޕް ކުޅެން ކޮލިފައި ވެފައި ވާ ޤައުމެއް ނޫނެވެ. ނަމަވެސް އެ ޤައުމަށް ނިސްބަތްވާ ގިނަ ޢަދަދެއްގެ ޒުވާނުން ދަނީ ފުޓުބޯޅަ އެކަޑަމީތަކާ ގުޅި، ތަމްރީނުތައް ފުރިހަމަ ކުރަމުންނެވެ. ލިޔާރީއަކީ، ޕާކިސްތާނުގެ ފުޓުބޯޅަ، އާ ހަރުފަތަކަށް ގެންގޮސްދިނުމުގެ ޢަޒުމުގައި އޮތް އަވަށެކެވެ. އެ އަވަށުގެ ކުދިންނަކީ، ކޮންމެ ދުވަހަކުވެސް އެތައް ވަގުތެއް، ފުޓުބޯޅަ ފަރިތަކުރުންތަކުގައި އުޅޭ ކުދި ބައެކެވެ.

ޤަތަރުގައި ކުރިއަށްދާ ވޯލްޑްކަޕް މެޗުތައް ބެލުމުގެ ފޯރިވެސް ލިޔާރީގައި ގަދައެވެ. މެޗު ބެލުން އޮންނަނީ ބޮޑު ސްކްރީންތަކުގައި އަޅުވައިގެންނެވެ.

ވޯލްޑްކަޕް ފުޓުބޯޅަ މުބާރާތުގެ ނަތީޖާ ކޮންމެ ގޮތަކަށް ނުކުތް ކަމުގައި ވީ ނަމަވެސް، ލިޔާރީގައި އޮތް ފުޓުބޯޅައިގެ ފޯރި، މިއިން ދުވަހަކު ކެނޑިގެން ދާނެހެނެއް ހީއެއް ނުވެއެވެ.