ބްރެޒިލްގެ ކުރީގެ ރައީސް ޖައިރް ބޮލްސޮނާރޯގެ ފައިގައި ޓެގް އަޅުވަން ބްރެޒިލްގެ ފުލުހުންގެ މައްޗަށް އެ ގައުމުގެ ސުޕްރީމް ކޯޓުން އަމުރު ކޮށްފިއެވެ.

އޭގެ އިތުރުން 2019 އިން 2022 އަށް ލެޓިން އެމެރިކާގެ އެންމެ ބޮޑު ގައުމު ވެރިކަން ކުރެއްވި ރައީސް ޖައިރް ބޮލްސޮނާރޯގެ ގެ އާއި މައި އޮފީސް ފެޑެރަލް ފުލުހުން ވަނީ ރެއިޑްކޮށްފައެވެ. އަދި އޭނާ ގައުމުން ފިލައިގެން ހިނގައިދާނެކަމުގެ ކަންބޮޑުވުން އޮތް ކަމަށް ބުނެ އޭނާގެ ފައިގައި މޮނިޓަރެއް އެޅުވުމަށް ކޯޓުން ވަނީ އަމުރުކޮށްފައެވެ.

ހުކުރު ދުވަހު ނެރުނު ބަޔާނެއްގައި ފުލުހުން ބުނެފައި ވަނީ، ބަރެޒިލްގެ ސުޕްރީމް ކޯޓުން އަމުރު ކޮށްގެން ސާރޗް ވޮރަންޓްތަކެއް ނެރެފައިވާ ކަމަށެވެ.

ބްރެޒިލްގެ ސުޕްރީމް ކޯޓުން ފަހުން މި ރެއިޑް ކަށަވަރުކޮށްދިނެވެ. އަދި ގައުމުގެ ޕްރޮސެކިއުޓަރ ޖެނެރަލް އާ ޙަވާލާދީ ބުނެފައި ވަނީ، 2023 ވަނަ އަހަރުގެ ޖެނުއަރީ މަހު ރައީސް ލުއިޒް އިނާސިއޯ ލޫލާ ޑަ ސިލްވާގެ އިންތިޚާބީ ކާމިޔާބީގެ ނަތީޖާ ބަދަލު ކުރައްވަން އޭނާ މަސައްކަތް ކުރެއްވި ކަމުގެ ތުހުމަތުގައި ހިނގަމުންދާ ޝަރީޢަތުގެ ތެރޭގައި ބޮލްސޮނާރޯ ގައުމުން ފިލައިގެން ދިއުމުގެ ފުރުސަތު އޮތް ކަމުގައެވެ.

ކޯޓުން އަމުރު ކޮށްފައިވާ ކަންތައްތަކުގެ ތެރޭގައި ބޮލްސޮނާރޯގެ ފައިގައި މޮނިޓަރެއް އެޅުވުމުގެ އިތުރުން، ސޯޝަލް މީޑިއާ ބޭނުންކުރުން ހުއްޓާލުމަށާއި، ބޭރުގެ އޮފިޝަލުންނާ ހުރިހާ ގުޅުމެއް ކަނޑާލުން ހިމެނެއެވެ. އަދި ބްރެޒިލްގައި ހުރި ބޭރުގެ އެމްބަސީތަކާއި ކޮންސިއުލޭޓްތަކާ ކައިރިވުން ވެސް އޭނާ އަށް މަނާކޮށްފައި ވެއެވެ.

އެންމެ މަތީ ކޯޓުން ބުނެފައި ވަނީ ބްރެޒިލްގެ ފުލުހުން ބޮލްސޮނާރޯ އަށް ތުހުމަތު ކުރާ ގޮތުގައި އޭނާ ވަނީ އޭނާގެ ދަރިކަލުން، ބްރެޒިލްގެ ޤާނޫނު ހަދާ މަޖިލީހުގެ މެންބަރެއް ކަމުގައިވާ އެޑުއާޑޯ އާ ގުޅިގެން އެމެރިކާގެ ރައީސް ޑޮނަލްޑް ޓްރަމްޕްގެ ސަރުކާރަށް ނުފޫޒު ފޯރުވައި، ބްރެޒިލްގެ މައްޗަށް އިގްތިސާދީ ދަތިކުރުމުގެ ފިޔަވަޅު އަޅަން މަސަައްކަތް ކުރައްވާފައި ކަމަށެވެ.

މި ތުހުމަތު ގުޅިފައި ވަނީ މި މަހުގެ ކުރީކޮޅު ޓްރަމްޕް ބްރެޒިލް އަށް ދެއްވި އިންޒާރަކާ އެވެ. ޓްރަމްޕް ވިދާޅުވީ، ބޮލްސޮނާރޯ އަށް ޤާނޫނީ ލުޔެއް ނުދޭނަމަ، ބްރެޒިލް އިން އެމެރިކާ އަށް އެތެރެ ކުރާ މުދަލަށް 50 އިންސައްތައިގެ ޓެރިފް އެއް ދައްކަން ޖެހޭނެ ކަމަށެވެ.

އެންމެ ފަހުގެ މި ފިޔަވަޅުތަކާ ގުޅިގެން ބޮލްސޮނާރޯގެ ވަކީލުން ވަނީ "އޭނާގެ މައްޗަށް އަޅާފައިވާ ހަރުކަށި ފިޔަވަޅުތަކާމެދު" "ހައިރާން ކަމާއި ކަންބޮޑުވުން" ފާޅުކޮށްފައެވެ. އަދި އެމީހުން އިތުރަށް ބުނެފައި ވަނީ ބޮލްސޮނާރޯ މިހާތަނަށް ކޯޓުގެ އަމުރުތަކަށް ތަބާވެފައިވާ ކަމަށެވެ.

ސޯޝަލް މީޑިއާގައި ކުރި ޕޯސްޓެއްގައި އެޑުއާޑޯ ބޮލްސޮނާރޯ ހާމަ ކޮށްފައި ވަނީ މި ފިޔަވަޅު ތަކަކީ އޭނާގެ ބައްޕަ ބުރާސްފަތި ދުވަހު ޕޯސްޓް ކުރެއްވި ވީޑިއޯ އަކަށް ބަދަލު ހިފަން ކުރި ކަމެއް ކަމުގައެވެ. އެ ވީޑިއޯ ގައި އޭނާ ވަނީ ޓްރަމްޕްގެ އެހީތެރި ކަމަށް ޝުކުރު އަދާ ކުރައްވާފައެވެ.

ހުކުރު ދުވަހު ނޫސްވެރިންނާ ވާހަކަ ދައްކަވަމުން ކުރީގެ ރައީސް ބޮލްސޮނާރޯ ވަނީ އޭނާ ގައުމުން ފިއްލަވަން އުޅުއްވާ ކަމުގެތުހުމަތު ދޮގު ކުރައްވާފައެވެ.

"މަޤްޞަދަކީ އެންމެ މަތީ ދަރަޖައިގެ ފުރައްސާރަ ކުރުން،" އޭނާ ވިދާޅުވިއެވެ.

ފާއިތުވި ހަފްތާގައި ޓްރޫތް ސޯޝަލްގައި ކުރެއްވި ޕޯސްޓެއްގައި ޓްރަމްޕް ވިދާޅުވެފައި ވަނީ ބްރެޒިލްގެ އިދާރާތަކުން ކުރާހާ ވެސް ކަމަކީ ދުވާލާއި ރޭގަނޑު، މަހުން މަހަށް، އަހަރުން އަހަރަށް، ބޮލްސޮނާރޯ ގެ ފަހަތުން ދުވުން ކަމަށެވެ.

ޓްރަމްޕް ވިދާޅުވީ، އޭނާ ކުށްވެރި ވެފައި ވަނީ އެއްވެސް ކުށެއް ކޮށްގެން ނޫން ކަމަށާއި، ހަމަ އެކަނި ކުރެއްވި ކަމަކީ ރައްޔިތުންނަށް ޓަކައި ގުރުބާން ވުން ކަމުގައެވެ.

ހޯމަ ދުވަހުގެ އާންމު ކުރި 517 ޞަފްޙާގެ ލިޔުމެއްގައި ބްރެޒިލްގެ ޕްރޮސެކިއުޓަރ ޖެނެރަލް ޕައުލޯ ގޮނެޓް ގޮވާލާފައި ވަނީ ބޮލްސޮނާރޯ އަށް ތުހުމަތު ކުރެވޭ ކުށްތަކަށް އޭނާގެ މައްޗަށް ޝަރީއަތް ހިންގުމަށެވެ. މިކަމުގެ ސަބަބުން ކުރީގެ ވެރިޔާ އެތައް އަހަރެއް ވަންދެން ޖަލުގައި ހޭދަކުރަން ޖެހިދާނެއެވެ.

ފްރޮސެކިއުޓަރ ޖެނެރަލް ވިދާޅުވީ ކުރީގެ ރައީސް ގެ މައްޗަށް ތުހުމަތު ކުރެވޭ ކުށްތަކަށް ލިބިފައިވާ "ހެކިތައް ސާފު" ކަމަށެވެ. އޭނާ ވިދާޅުވީ ދަޢުވާ ލިބިފައިވާ ފަރާތުން ވަނީ ސިސްޓަމެޓިކް ކޮށް، އޭނާގެ މުޅި ދައުރުގައި އަދި ވޯޓުން ބަލިވުމަށްފަހުގައި ވެސް، ޑިމޮކްރެޓިކް ޤާނޫނުގެ ވެރިކަން ހަލާކު ކުރުމަށް ހިތްވަރުދީފައި،" ކަމަށެވެ.

ޓްރަމްޕް އަކީ ވެސް އޭނާގެ ފުރަތަމަ ދައުރަށް ފަހު ހަތަރު ޖިނާއީ ދަޢުވާއަކާ ކުރިމަތިލައްވަން ޖެހިވަޑައިގަތް ބޭފުޅެކެވެ. އޭގެ ތެރޭގައި 2020 ގެ އިިންތިޚާބުގައި އޭނާ ބަލިވި ނަތީޖާ ބަދަލު ކުރައްވަން މަސައްކަތް ކުރެއްވި ކަމުގެ ދަޢުވާއެއް ވެސް ހިމެނެއެވެ. އޭނާ ވެސް، ބޮލްސޮނާރޯ ފަދައިން، ތަކުރާރުކޮށް ވިދާޅުވަމުން ގެންގޮސްފައި ވަނީ އޭނާ އަކީ ސިޔާސީ "ވިޗް ހަންޓެއް" ގެ ޝިކާރަ އަކަށް ވެފައިވާ މީހެއް ކަމަށެވެ.

"ޓްރޮޕިކްސްގެ ޓްރަމްޕް" ގެ ނަމުން މަޝްހޫރުވެފައިވާ ބޮލްސޮނާރޯ އާ ޓްރަމްޕް އާ ދެބޭފުޅުންނަކީ ވަރަށް ގާތް ރަހްމަތްތެރިންނެވެ. މި ގުޅުން ފެށުނީ 2017 އިން 2021 އަށް ދިޔަ ޓްރަމްޕްގެ ފުރަތަމަ ދައުރުގައެވެ.