ކުނި މަދުކުރުމުގެ އައު ޓާގެޓް ތަކެއް ނަމޫނާ ރަށްތަކުން ހުށަހަޅައިފި
ރަށްތަކުގެ ކައުންސިލް ރައީސުން ވަނީ ސޮނެވާ ނަމޫނާ ޕްރޮގްރާމްގެ ބައްދަލުވުމުގައި މި ލަނޑުދަނޑިތައް މިނިސްޓަރުންނަށް ހުށަހަޅައި، ސޮއިކޮށްފަ
ކުނި މަދުކުރުމުގެ އައު ޓާގެޓްތަކެއް ހުށަހަޅާފައިވޭ
ކުނި މަދުކޮށް ކުރިއަށްވުރެ ފުރިހަމައަށް، ދެމެހެއްޓެނިވި ގޮތުގައި ކުނި މެނޭޖްކުރާނެ ގޮތުގެ އައު އުންމީދީ ތަޞައްވުރެއް ބ.، ނ. އަދި ދ. އަތޮޅުގެ 11 ރަށު ކައުންސިލްއެއްގެ ރައީސުން ސަރުކާރުގެ މިނިސްޓަރުންނަށާއި މަޖިލިސް މެންބަރުންނަށް ހުށަހަޅައިފިއެވެ.
މިގޮތުން މި ރަށްތަކުގެ ކައުންސިލް ރައީސުން ވަނީ ސޮނެވާ ނަމޫނާ ޕްރޮގްރާމްގެ ބައްދަލުވުމުގައިމި ލަނޑުދަނޑިތައް މިނިސްޓަރުންނަށް ހުށަހަޅައި، ސޮއިކޮށްފައެވެ. މި ލަނޑުދަނޑިތައް އެކުލަވާލާފައި ވަނީ އޮކްޓޫބަރު މަހު ސޮނެވާ ނަމޫނާ ޕްރޮގްރާމްގެ ކުރިއަށް ހުރި މަސައްކަތް ރާވަން ސޮނެވާ ފުށީގައި ބޭއްވުނު ވޯކްޝޮޕެއްގައެވެ.
މިނިސްޓަރ އޮފް އެންވަޔަރަންމަންޓް، ކްލައިމެޓް ޗޭންޖް އެންޑް ޓެކްނޮލޮޖީ އާމިނަތު ޝައުނާ އާއި މިނިސްޓަރ އޮފް ޓޫރިޒަމް ޑރ. އަބްދުالله މައުސޫމް އާއި ލޯކަލް ގަވަރމަންޓް އޮތޯރިޓީގެ ސީ.އީ.އޯ. އާއި ރައްޔިތުންގެ މަޖިލީހުގެ ލާމަރުކަޒީ ކޮމިޓީގެ ޗެއަރ މެންބަރު އަލީ ނިޔާޒް ބ. އަތޮޅު ކިހާދޫގައި ބޭއްވުނު މި ބައްދަލުވުމުގައި ބައިވެރިވެވަޑައިގެންނެވިއެވެ.
މި ލަނޑުދަނޑިތައް ހުށައެޅުމުގެ އިތުރުން، ރަށު ކައުންސިލް ރައީސުންވަނީ ރަށްތަކުގައި ކުނި މެނޭޖްކުރުމުގެ މަސައްކަތް އިތުރަށް ވަރުގަދަ ކުރުމަށާއި ރަށުތެރެއަށް އުކާލެވޭ ސިންގަލް ޔޫސް ޕްލާސްޓިކް ކުނި މަދުކުރުމުގެ މަސައްކަތް ކުރުމަށް ސަރުކާރަށް ގޮވާލާފައެވެ.
މި ބައްދަލުވުމަށްފަހު މިނިސްޓަރުންނަށް ކިހާދޫގެ ގޭބިސީތަކުން ކުނި ވަކިކުރާގޮތާއި އެ ރަށުގެ ކުނި މެނޭޖްކުރާ އިކޯ ސެންޓްރޯ ދައްކާލެވުނެވެ. އަދި މީގެ އިތުރުން މިނިސްޓަރުންނަށްވަނީ އެ ރަށުގައި މޫދުގައި ރައްކާތެރިކޮށް އުޅެން ދަސްކޮށްދީ، ތިމާވެއްޓަށް ކުރާ ޤަދަރު އިތުރުކުރުމަށް ހިންގާ "ޝޯ ޓު އޯޕަން ވޯޓަރ ސްވިމިންގް ޕްރޮގްރާމްގެ" މައުލޫމާތު ދީފައެވެ.
މީގެ އިތުރުން، ބ. އަތޮޅުގެ ނަމޫނާ ރަށްތަކުގެ އަންހެނުންގެ ތަރައްޤީއަށް މަސައްކަތް ކުރާ ކޮމިޓީތަކުން އިސްވެ ކުރިއަށް ހިންގާ އަލުން ބަލުން ރީސޭލް މާކެޓްގައި މިނިސްޓަރުން ބައިވެރިވެވަޑައިގެންނެވިއެވެ. މި މާކެޓަކީ ބ. މާޅޮސް، ދަރަވަންދޫ، ކިހާދޫ، ދޮންފަނު، ކުޑަރިކިލު، ކަމަދޫ އަދި ކެންދޫގައި އުފެދޭ ސެކަންޑް ހޭންޑް މުދާ ދައުރުކޮށް ބޭނުންކުރުމަށް ހިންގޭ މާކެޓެކެވެ.
