"ސޮނެވާ ނަމޫނާ" އާއި "ކަމަދޫ އިން" އެކުގައި، ޓަކަކޫރާ މެތަޑް އާއި އެކު ގެސްޓް ހައުސް އިން އުފެދޭ ކާބޯތަކެތީގެ ކުނި މެނޭޖްކުރުން ބަދަލުކޮށްލަނީ!
ސޮނެވާ ނަމޫނާ އާއި ކަމަދޫ އިން ގުޅިގެން ގެސްޓުހައުސްގައި އުފެދޭ ކާބޯތަކެތީގެ ކުނި މެނޭޖްކުރުމުގެ މަސައްކަތް ނޮވެމްބަރ 5 ގައި ވަނީ ފަށާފައި
ސޮނެވާ ނަމޫނާ އާއި ކަމަދޫ އިން އެކުގައި މަސައްކަތް ކުރުމަށް ވަނީ އެއްބަސްވެފައި
ގެސްޓުހައުސްތަކުގައި އުފެދޭ ކާބޯތަކެތީގެ ކުނި މެނޭޖްކުރުމަށް ކަމަދޫ އިން އާއި ސޮނެވާ ނަމޫނާ މަސައްކަތް ފަށައިފި އެވެ.
ސޮނެވާ ނަމޫނާ އިން ބ. އަތޮޅު ކަމަދޫގައި ހިންގާ ގެސްޓުހައުސްއެއް ކަމުގައިވާ ކަމަދޫ އިން އާއި ސޮނެވާ ނަމޫނާ ގުޅިގެން ގެސްޓުހައުސްގައި އުފެދޭ ކާބޯތަކެތީގެ ކުނި މެނޭޖްކުރުމުގެ މަސައްކަތް ފަށާފައި ވަނީ މި ހިނގާ ނޮވެމްބަރ މަހުގެ 5 ވަނަ ދުވަހު އެވެ.
ސޮނެވާ ނަމޫނާއާއި ކަމަދޫ އިން ގުޅިގެން މި ކުރާ މަސައްކަތުގައި ބޭނުން ކުރާނީ އަގުހެޔޮ އަދި ދެމެހެއްޓެނިވި ގޮތުގައި ފަސޭހަކަމާއިއެކު ބޭނުންކުރެވޭ ޓަކަކޫރާ މެތަޑެވެ. ޓަކަކޫރާ މެތަޑް އަކީ ކާބޯތަކެތީގެ ކުނި އޭގެ ޒާތުގައި ކޮމްޕޯސްޓަށް ވަރަށް ފަސޭހަކަމާ އެކު ބަދަލުކޮށްލާ ގޮތެކެވެ.
މި މަސައްކަތުގެ އަމާޒަކީ ކުރިއަށް އޮތް 6 މަސްދުވަހުގެ ތެރޭގައި ގެސްޓުހައުސްއިން އުފެދޭ ބަދިގެ ކުނި އެތަނުގައި ޒިންމާދާރުކަމާއެކު މެނޭޖްކޮށް އުކާލަން ޖެހޭ ކުނީގެ މިންވަރު މަދުކުރުން ކަމަށް ވެސް ސޮނެވާ ނަމޫނާ އިން ވަނީ ބުނެފައެވެ.
ގެސްޓުހައުސްތަކުން އުފެދޭ ކުނީގެ އަދަދު މަދުކުރުމަށް މި ކަމުން މަގުފަހިވެގެންދާނެ އެވެ. ހަމައެހެންމެ މި ބަދަލުގެ ސަބަބުން ވޭސްޓްމެނޭޖްމަންޓް ސިސްޓަމަށް ފަސޭހަވެގެން ދާނެކަމަށް ވެސް ސޮނެވާ ނަމޫނާ އިން ބުނެ އެވެ.
މިއީ މީހުން ދިރިއުޅޭ ރަށްރަށުގައި ފަތުރުވެރިކަމުގެ ދާއިރާއާ ގުޅުން ހުރި ވިޔަފާރިތަކުން އުފައްދާ ކުނި ދެމެހެއްޓެނިވި ގޮތެއްގައި މެނޭޖް ކުރުމަށް ސޮނެވާ ނަމޫނާ އިން ކުރަމުންދާ މަސައްކަަތަށް އިތުރުވި ހަރުފަތެއް ކަން ފާހަގަކޮށްލެވެ އެވެ.
ޓަކަކޫރާ މެތަޑަކީ ސޮނެވާ ނަމޫނާއިން މީހުން ދިރިއުޅޭ އެހެން ރަށްރަށުގައި ބޭނުންކޮށް މި ކަމުގެ ހެޔޮ ނަތީޖާ މިހާރު ވެސް ހާސިލްކޮށްފައިވާ މެތަޑް އެއްކަން ފާހަގަކޮށްލެވެ އެވެ. އެގޮތުން، ފާއިތުވީ 3 އަހަރުގެ ތެރޭގައި މި މެތަޑްގެ ހުނަރު ލިބި، ފަންނީ ތަޖުރިބާ ސޮނެވާ ނަމޫނާ ހޯދާފައިވެ އެވެ. އެގޮތުން ބ. ކިހާދޫ، ބ. ކެންދޫ، ބ. ކުޑަރިކިލު، ބ. ދޮންފަނުގައި ގޭގޭގައި އުފެދޭ ބަދިގޭކުނި އެ ގެއެއްގައި މެނޭޖު ކުރާނެ ގޮތެއް ހޯދުމުގެ ގޮތުން ކާދު ސަތޭކައިގެ ނަމުގައި ވަނީ ޕްރޮގުރާމެއް ހިންގާފަ އެވެ. މީގެ އިތުރުން ރަށު ފެންވަރުގައި ބަދިގޭގެ ކުނި މެނޭޖުކުރުމަށް ނ.ކުޑަފަރީ ކައުންސިލް އާއި އެކު ވަނީ ވަރަށް ކާމިޔާބު ކަމާއެކު އެރަށުގައި ކާދު ސަތޭކަ ޕްރޮގުރާމް ވެސް ހިންގާފަ އެވެ.
މި މަސައްކަތް ތައާރަފްކުރެވުނު ރަށްތަކުގައި އުކާލަންޖެހޭ ބަދިގޭގައި އުފެދޭ ކުނީގެ ނިސްބަތް 30 އިންސައްތައިން ކުޑަކުރެވި ރަނގަޅު ނަތީޖާއެއް ހޯދިފައިވާކަން ސޮނެވާ ނަމޫނާ އިން ފާހަގަކުރެ އެވެ. އެހެންކަމުން މި މަސައްކަތްތަކުގެ ނަތީޖާތަކަށް ބެލުމަށް ފަހު މިހާރު ގެސްޓުހައުސްތަކާއެކު ފަށަން ނިންމީ ކަމަށް ސޮނެވާ ނަމޫނާ އިން ބުނެ އެވެ.
މި މަސައްކަތަކީ ރަށު ފެންވަރުގައި ގެސްޓުހައުސްތަކުން އުފެދޭ ކުނީގެ މައްސަލަ ހައްލުކުރުމަށް އެޅޭ މުހިއްމު ފިޔަވަޅަކަށް ވާނެ ކަމަށް އެ ފަރާތުން އުންމީދު ކުރެ އެވެ. އަދި މި މަސައްކަތުގެ ނަތީޖާ އަށް ބަލާ، އިތުރަށް މި މަސައްކަތް ފުޅާ ކުރުމަކީ ސޮނެވާ ނަމޫނާގެ އުންމީދެކެވެ.
