ފީފާ ވޯލްޑް ކަޕް ގަދަ 16 ގައި އެންމެ ފަހުގެ ޗެމްޕިއަން ފްރާންސްއާ ދެކޮޅަށް ނުކުންނައިރު، އެ ޓީމުގެ ކީލިއަން އެމްބާޕޭ ހުއްޓުވުމަށް ޕޮލެންޑުގެ ޑިފެންޑަރުންނަށް ސްކޫޓަރ އެއް ހޯދަން ޖެހިދާނެ ކަމަށް ޕޮލެންޑުގެ ފޯވާޑް އާކަންޑިއުސް މިލިކް ބުނެފިއެވެ.

މިލިކް މިހެން ބުނީ މެޗުގެ ކުރިން އޮތް ޕްރެސްގައި ކޯޗު ޗެސްލޭ މިކްނިއޭވިޗާއެކު ބައިވެރިވެ ވާހަކަ ދައްކަމުންނެވެ. އޭނާ ބުނީ މެޗުގެ ކުރިން އަމާޒުވާނެ އެންމެ ބޮޑު ސުވާލަކީ ވެސް އެމްބާޕޭ ހުއްޓުވުމުގެ ސުވާލު ކަމަށެވެ. އަދި އޭގެ ޖަވާބުގައި ބުނެވެެން އޮތީ އެމްބާޕޭ ހުއްޓުވުމަށް ޕޮލެންޑުގެ ފަހަތުގައި ތިބޭ ކުޅުންތެރިންނަށް ސްކޫޓަރއެއް ގަންނަން ޖެހިދާނެ ކަމަށެވެ. ސަބަބަނީ އެއީ އެހާވެސް އުނދަގޫ ކަމަކަށްވާނެތީ ކަމަށް މިލިކް ބުންޏެވެ. އޭނާ ބުނީ ދުނިޔޭގައި ތިބި މޮޅެތި ބައެއް ކުޅުންތެރިންނާ ދެކޮޅަށް ކުޅުމަކީ ކޮންމެހެން ވެސް އުނދަގޫ ކަމަކަށްވާނެ ކަމަށެވެ. އަދި ކުރިއަށް އޮތް މެޗުގައި ޑިފެންސުން ވެސް މަސައްކަތް ކުރަން ޖެހޭނީ އެންމެން އެއްކޮށް ކަމަށާއި، އެއް ކުޅުންތެރިޔަކަށް އެމްބާޕޭ ނުހުއްޓުވޭނެ ކަމަށެވެ.

ޕްރެސްގައި ވާހަކަ ދައްކަމުން ކޯޗު މިކްނިއޭވިޗް ބުނީ ޑިފެންސިވްކޮށް ނުކުޅޭ ޓީމެއް ނަމަ، ތިބެން ޖެހޭނީ ގޭގައި ވޯލްޑް ކަޕް ބަލަން ކަމަށެވެ. އޭނާ ބުނީ މުބާރާތުގެ ގްރޫޕް ސްޓޭޖު ފަހަނައަޅާ ދިޔުމަށް ޕޮލެންޑުން ވަކި ޚާއްސަ ކަމެއް ކުރި ކަމަށާއި، މިހާރު މުޅިން ތަފާތުކޮށް ކުޅެން އުޅެފިނަމަ މުބާރާތުން ބޭރުވާނެ ކަމަށެވެ. އަދި ދަނޑު މަތީގައި އެންމެ ރަނގަޅު ގޮތަކީ ކޮބައިތޯ ބަލާނެ ކަމަށާއި، ދުނިޔޭގެ އެންމެ ފަހުގެ ޗެމްޕިއަން ޓީމާ ދެކޮޅަށް ކުޅުމަކީ ލިބޭ އުފަލެއް ކަމަށެވެ. އޭނާ ސިފަކުރީ އެއީ ޕޮލެންޑުގެ ކުޅުންތެރިންނަށް ލިބޭ ހަދިޔާއެއްގެ ގޮތުގައެވެ.

މުބާރާތުގައި ފްރާންސް އަދި ޕޮލެންޑް ވާދަކުރާ މެޗު ފަށާނީ އާދިއްތަ ދުވަހުގެ ރޭ ރާއްޖެ ގަޑިން 20:00 ގައެވެ.